Salamo 22
22
Fitarainana mafy noho ny fahoriana, ary fisaorana noho ny fahafahana, sy filazana ny handrosoan’ny fanjakan’Andriamanitra.
1Ho an’ny mpiventy hira. Alaieleth-hasahara. Salamo nataon’i Davida.
ANDRIAMANITRO ô, Andriamanitro ô, nahoana no dia mahafoy ahy Hianao?
Lavitra ny famonjena ahy ny tenin’ny fitarainako.
2Andriamanitro ô, miantso aho nony andro, nefa tsy mamaly Hianao;
Ary nony alina, nefa tsy mahita fiononana aho.
3Kanefa masina Hianao,
Ry mipetraka eo ambonin’ny fideran’ny Isiraely.
4Hianao no nitokian’ny razanay;
Natoky izy, ka namonjy azy Hianao.
5Hianao no nitarainany, ka afaka izy;
Hianao no nitokiany, ka tsy menatra izy.
6Ary izaho dia olitra, fa tsy olona,
Fandàtsan’olona sy fanevatevam-bahoaka.
7Izay rehetra mahita ahy dia manaraby ahy;
Manondro molotra izy sady mihifikifi-doha ka manao hoe:
8Ankino amin’i Jehovah,#22.8 Na: Efa niankina tamin’i Jehovah izy. dia aoka Izy hamonjy azy;
Eny, aoka Izy hanafaka azy, raha mankasitraka azy Izy.
9Fa Hianao no nampivoaka ahy avy tao an-kibo;
Nampandry ahy fahizay Hianao, fony aho mbola nampinonoin’ny reniko.
10Nankinina taminao hatrany am-bohoka aho;
Hatrany an-kibon-dreniko dia Andriamanitro Hianao.
11Aza manalavitra ahy Hianao, fa akaiky ny fahoriana,
Sady tsy misy mpamonjy.
12Mitangorona amiko ireo ombilahy be,
Ny maherin’i Basana manemitra ahy.
13Misanasana vava amiko izy;
Eny, liona mamiravira sy mierona izy.
14Efa rano aidina aho, ka mivaha ny taolako rehetra;
Tahaka ny savoka ny foko:
Miempo ato anatiko izy.
15Maina tahaka ny tavim-bilany ny heriko;
Ary ny lelako miraikitra amin’ny lanilaniko;
Ao amin’ny vovoky ny fahafatesana no ametrahanao ahy.
16Fa mitangorona amiko ny amboa,
Ny fiangonan’ny rasty fanahy manemitra ahy.
Manindrona ny tongotro aman-tànako izy#22.16 Na: Manodidina ny tongotro aman-tànako hoatra ny liona izy. –
17Mahisa ny taolako rehetra aho–
Ireo dia mibanjina sady mangarika ahy.
18Mizara ny fitafiako ho azy izy,
Ary ny akanjoko ilokany.
19Fa Hianao, Jehovah ô, aza manalavitra;
Ry Heriko ô, faingàna hamonjy ahy.
20Vonjeo amin’ny sabatra ny fanahiko,
Dia ny hany malalako amin’ny herin’ny amboa.
21Vonjeo amin’ny vavan’ny liona aho;
Ary valio ho afaka amin’ny tandroky ny ombimanga.#22.21 Na: Teo amin’ny tandroky ny ombimanga dia novalianao aho.
22Hitory ny anaranao amin’ny rahalahiko aho;
Eo amin’ny fiangonana no hiderako Anao.
23Hianareo izay matahotra an’i Jehovah, miderà Azy;
Ry taranak’i Jakoba rehetra, manomeza voninahitra Azy;
Ary matahora Azy, ry Zanak’Isiraely rehetra.
24Fa tsy manao tsinontsinona na marikorikon’ny fahorian’ny ory Izy,
Ary tsy mba manafina ny tavany aminy;
Fa raha mitaraina aminy ireny, dia mihaino Izy.
25Avy aminao no ahazoako manao fiderana eo amin’ny fiangonan-dehibe;
Ny voadiko dia hefaiko eo anatrehan’izay matahotra an’i Jehovah.
26Hihinana ny mpandefitra ka ho voky;
Hidera an’i Jehovah izay mitady Azy;
Ho velona mandrakizay anie ny fonareo.
27Hahatsiaro ka hiverina ho amin’i Jehovah ny faran’ny tany rehetra;
Ary hiankohoka eo anatrehanao ny fokon’ny firenen-tsamy hafa.
28Fa an’i Jehovah ny fanjakana;
Ary manapaka amin’ny firenen-tsamy hafa Izy.
29Hihinana sy hiankohoka ny mpanefohefo#22.29 Heb. matavy. rehetra ambonin’ny tany;
Eo anatrehany no hiondrehan’izay rehetra efa hidina any amin’ny vovoka ka tsy mahavelona ny ainy.
30Hisy taranaka hanompo Azy;
Ary ny Tompo dia holazaina amin’ny taranaka ho avy.
31Hisy ho avy ka hanambara ny fahamarinany
Amin’ny olona izay mbola hateraka, fa Izy no nanao izany.
Currently Selected:
Salamo 22: MBP
Highlight
Share
Compare
Copy
Want to have your highlights saved across all your devices? Sign up or sign in
Baiboly Protestanta Malagasy © Malagasy Bible Society, 1965, 2019.
