MALACHII 3
3
1Kifa-nú ko GASA WAN nɛ a̧a̧ nɛ ŋgayamɔ lɛŋ nɛ mɔ'ɔ: «Mi tom nɛ betom mɛ ɗafi yuwar ha̧‘m. Gasa Wan n’ɛnɛ kii'i tɛ ye kɔ̧ Tua kɔ‘i kinii; betom n’ɛnɛ pɛm, nɛ tɛ we ɗoŋ nɔɔ-tɔk kɔ‘m in'nɛ̀ɛ́‘i nɛ mɔ'ɔ nɛ tɛ'ɛ.»#Mt 11.10; Mk 1.2; Lk 1.76; 7.27
2Nɛ o'o tɛ yor ti a wese n'aa tɛ tɛ nɛnɛ‘i o? Nɛ o'o tɛ duk ti a̧ wese nɛ‘i tɛ zɔk nɛ a̧ o? Wen a̧ tɛ duk hee wee-dɔra ko wi-dui-mɔ in sa̧-ndiŋ ko wi-fɔr-mɔ ga.#Jɔɛl 2.11; Tɔ̧ɔ̧ Hu̧ 6.17 3A̧ tɛ duk hee wi-nɔi̧-boi in wi-dui-mɔ ga. A̧ tɛ de ha̧ war-tɛ o bezaŋ Levii mɛ sa̧; wa tɛ ya hee lɔr in bu-mbɔi nɛ‘i nɔi̧a ga, ɓɛɛ wa tɛ ha̧ ha̧a̧mɔ ha̧ GASA WAN nɛ yuwar-a. 4Hegɔ, ha̧a̧mɔ ko Juda in Jerusalɛm tɛ de tɛ GASA WAN hee mɔ'ɔ nɛ dee so nɛti tɛ o kuti ŋgimbi ga.
5«Mi tɛ ɗɔŋ pii katɛ‘nɛ́ wen gɔna kita; hɔa-a kɔ‘m hegɔ, mi tɛ tɔ̧ wen zu o wi-de-mɔɔ-kifi, o wi-de-dàlà in o wi-kan-mɔ nɛ ndela, ɓɛɛ mi tɔ̧ɔ̧ wen a zu o wi-nyɔŋ-sede-tom ko o wi-de-tom, zu o wi-ɓar-mɔ er o ko-gera in o be-oi, ká bá nɛ̀ o wi-de-ŋgamɔ in o gɛnɛ mbɛt. O wi nɔ‘i lɛŋ yu'm na. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.
Ha̧a̧mɔ ha̧ Sɔ̧
6«Kɔ‘m, mi GASA WAN, mi kpai na, ɓɛɛ k’ɛ́nɛ́, ɛ́nɛ́ kana nɛ mgbák bezaŋ Jakob hɔ kinii. 7Tɛ ŋgimbi ko o zɔmdáa k’ɛ́nɛ́, ɛ́nɛ́ a̧ra̧ nɛnɛ e nɛ o geŋa kɔ‘m duk, ɛ́nɛ́ kasi o geŋa nɔ‘i na. Ɛ̀nɛ̀ píí ɗoŋ pii tɛ‘m, ɓɛɛ mi tɛ si ɗoŋ tɛ‘nɛ́. GASA WAN nɛ a̧a̧ nɛ ŋgayamɔ lɛŋ a̧ tɔ̧ hegɔ. Ɓɛɛ ɛ́nɛ́ tɛ̀ɛ̀ kifi k’ɛ́nɛ́‘e nde: ‹Ɛɛ tɛ pii bɔɔ pia ɗoŋ‘i hee ge nde?› 8Mi'e nde, bíí tɛ ɔr Sɔ̧ nde? Ɛ̧ɛ̧ n’ɛnɛ zu̧u̧ bɔɔ mi’ɛ, ɓɛɛ ɛ́nɛ́ tɛ̀ɛ̀ kifi tɔ̧‘e: ‹Ɛɛ ɔra'nɛ́ tɛ ge?› Ɛnɛ zu̧‘m tɛ ha̧a̧-zu-mɔ in ndɛma mɔ ha̧‘m. 9Fom a̧a̧ zu'nɛ́ wen ɛnɛ ɔr nɛ‘m, ɛnɛ dukbíí'ɛ nɛ oi-aa lɛŋ. 10Ɛ̀nɛ̀ kai o zu-mɔ nɛ dama-a nɛnɛ a kɔ̧ Tua kɔ‘m, wen ha̧ nyɔŋmɔ mɛ dɔk kɔ̧ Tua'i ɓɔnsɛnɛ. Ɛ̀nɛ̀ we'm tɛ mɔ‘i ɛnɛ zɔk; mi tɛ hú̧í̧ yiwese ha̧ nɛ de sɔnti h’ɛ́nɛ́. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.#Lev 27.30; Tɔra-bíí 18.21-24; Wee-ɗoŋ-he 12.6; 14.22-29; Neh 13.12 11Mi tɛ dor o kokoɗo-mɔ ká wa tɛɛ ɗaŋ o nyɔnɔ in o fɔ-nyak-dɔ̧ɔ̧ k’ɛ́nɛ́. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ. 12O tugun bíí lɛŋ tɛ zɔn'nɛ́, wen nù k’ɛ́nɛ́ tɛ dun nɛ̀ demɔ. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.»
Gɔna-kita ko Sɔ̧
13GASA WAN tɔ̧a̧: «Tɔ̧ɔ̧-wen k’ɛ́nɛ́ pii tɛ‘m ɔ ŋgaya nyɛmna. Ɓɛɛ ɛ́nɛ́ tɛ̀ɛ̀ tɔ̧‘e: ‹Nɛ ge ŋga wen ge ɛ́ɛ́ tɔ̧ɔ̧ zu'nɛ́ ge?› 14Ɛnɛ tɔ̧‘e, tom ha̧ Sɔ̧ nɛ tom takaɗi; nɛ ge a'i tɛ kpa oi kasa geŋa in zima-mɔ ti GASA WAN nɛ a̧a̧ nɛ ŋgayamɔ lɛŋ ge? 15Ɛnɛ tɔ̧ mbɛt'e, o wi-ŋmaŋ-tɛ ya kɔ‘i nɛ desee, mɔ ko o wi-ɗaŋ, dɔk dɔk siti; wa we Sɔ̧, ɓɛɛ ŋma mɔ de wa na.»
16Nɛ hegɔ a̧ o wi-yu-sɔ̧ tɔ̧ɔ̧ in o ŋmaa. GASA WAN yeŋa zer, ɓɛɛ zii mɔ lɛŋ nɛ wa tɔ̧a̧; nɛ mɔ'ɔ nɛ wa yɔra kalata nin o bíí lɛŋ nɛ yuu GASA WAN in nɛ zɔna nin-a ɓɔn ti a̧. 17Ɓɛɛ GASA WAN nɛ a̧a̧ nɛ ŋgayamɔ lɛŋ tɔ̧: «Wese kɔ‘m n'am ɗafi'i be tɛ̀ɛ́ hɔ, o wi nɔ'ɔ tɛ ya nɛ o mgbák bíí kɔ‘m. Mi tɛ ba ŋgamɔ zu wa yinɛ hee mɔ'ɔ nɛ dáa-wan-bem ba nɛ ŋgamɔ yinɛ zu bem kɔ‘i, wan nɛ mbo zu ha̧ a̧'ɛ ga. 18Ɓɛɛ tɛ mɔ‘i woyo, ɛnɛ tɛ zɔk war mɔ nɛ tɛ kpa wi-ɗaŋ in wi-de-mɔ nɛ yuwar-a, mɔ nɛ tɛ kpa wi-de-tom ha̧ Sɔ̧ in wi nɛ de tom ha̧ Sɔ̧ na.
19«Wese'i nɛ tɛ‘i tɛ duk hee wee-dɔra ga; o wi-ŋmaŋ-tɛ in wi-ɗaŋ lɛŋ tɛ ya hee kora zɔ̧ ga. Wese'i nɛ tɛ‘i tɛ dɔ wa a nù kór-kór, nɛ‘i beka zɔk gee zɔka kunin-wa na. Nɛ́ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ. 20Ɓɛɛ k’ɛ́nɛ́, o wi-yu'm, ɛnɛ tɛ zɔk deemɔ nɛ yuwar-a kɔ‘m nɛ tɛ tok zu'nɛ́ hee daŋa-wese-tuyɛ nɛ a tɛ-wi hai nɛ tɛ-wi’ɛ ga, ɓɛɛ ɛnɛ tɛ hɔ zaŋgule hee be ndai nɛ gbo zan mɛ nyɔŋ mɔ'ɛ ga. 21Wese n'am ɗafi tɛnɛ‘i be tɛ̀ɛ́ hɔ, ɛnɛ tɛ i̧si̧ o wi-ɗaŋ hee bùk ga nɛ naŋ‘nɛ́. GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.
Pia-ɗoŋ ko Elii
22«Tɛ‘nɛ́ a̧ mbaŋ ɗoŋ heembea ko Moisɛ, wi-de-tom kɔ‘m; mi ha̧a̧ so o heembea in o geŋa ha̧ a̧ zu kaya Hɔrɛb wen dukbíí Israɛl lɛŋ.
23«Ɓɛɛ kinii, mi tɛ tom wi-tɔ̧-wen oi nú‘m Elii h’ɛ́nɛ́ nɛti sɛka wese kɔ‘m hɔa. Wese'i tɛ duk nɛ gasa wese-kundi-ari.#Mt 11.14; 17.10-13; Mk 9.11-13; Lk 1.17; Jn 1.21 24A̧ tɛ ɗafi mgbara o bem in o dáà, wen ká‘m tɛ̀ɛ́ ɗaŋ nù'ɛ.»
Currently Selected:
MALACHII 3: GB11
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.