MATTHIEU 19

Wen ndaka kóò

(Zɔk Mk 10.1-12)

1Jesu tɔ̧ɔ̧ wen'i ha̧ wa kaɗi, ɓɛɛ a̧ kur Galilee yak si nú Judee kur Jurdɛn mɛ. 2Gba giiwi nɛ̀ɛ́ ɗoŋ-aa, ɓɛɛ a̧ kpasi o wi-zɛɛ mgbara wa sɛn hi̧i̧.

3Nɛ́ mɔ'ɔ nɛ̀ o Fariziɛn nɛ̀ɛ̀ tɛ a̧ mɛ ba wen zaŋ-aa, wa tɔ̧a̧:

«Heembea ee war ha'i mɛ ndak kóò kɔ‘i zu mɔ lɛŋ nde?» 4Jesu kifa nú: «Tɛ̀ ku̧u̧naŋ fara mɛ, Sɔ̧ dee wiwii in okoo,#Ku̧u̧ 1.27; 5.2 5ɓɛɛ a̧ tɔ̧: ‹Wen hegɔ, wiwii tɛ e dáà in nàà kɔ‘i duk mɛ ndaɗi in kóò kɔ‘i ha̧ wa yiitoo mɛ duk kiitɛ kpɔk;› bó nɛ́ ɛ́nɛ́ tɔra hegɔ na nde?#Ku̧u̧ 2.24 6Hegɔ wa tɛ duk nɛ́ kiitɛ kpɔk; wa bo nɛ́ bíí yiitoo ɓɔna. Mɔ nɛ̀ Sɔ̧ ndaɗa tɛ́ ŋmaa kaɗi, ká bíí kɛ̧ mgbara-a na.» 7Ɓɛɛ wa ak Jesu: «Wen ge sa Moisɛ tɔ̧ɔ̧ kɔ‘i'e, kà‘i nɛ́ tɛ̀ɛ́ ndak kóò, ɓɛɛ wi ha̧a̧ kalata gbia-a ha̧ kóò‘i sɛka'i ndaka a̧, ge?»#Wee-ɗoŋ-he 24.1-4; Mt 5.31 8Ɓɛɛ Jesu kifi nú: «Moisɛ ha̧a̧ so war h’ɛ́nɛ́ mɛ ndak kóò k’ɛ́nɛ́ wen ŋga-see k’ɛ́nɛ́, ɓɛɛ nɛ̀ ku̧u̧naŋ-a bo so hegɔ na. 9Ɓɛɛ kɔ‘m, mi'e ndé, kà ŋma bíí nɛ́ ndaka kóò kɔ‘i nɛ̀ bó nɛ́ kóò‘i dèé nɛ̀ dala na,#19.9 o ŋma texte tɔ̧a̧: kà bó nɛ́ kpàsá báà-ŋmàá á̧ wa bàá.#Mt 5.32; 1 Kɔr 7.10-11 á̧ kà wi’ɛi bá mbe-a, wi’ɛi de nɛ́ dàlà.»

10O ŋgaiwi kɔ̧-a̧ tɔ̧ɔ̧ ha̧ a̧: «Ho, mɔ mgbara wíì in kóò a̧ bòò hegɔ laŋ, ɓɛɛ báá kóò de kɔ‘i na.» 11Jesu kifa nú ha̧ wa: «Bó nɛ́ o bíí lɛŋ a̧ tɛ nyɛm mɛ zii mgbara wen’ɛ na; kànà nɛ́ o wi nɛ̀ Sɔ̧ ha̧a̧ ŋgai ha̧ wa a̧ tɛ iŋ mgbara-a ɓɛɛ. 12Mɔ kpɔk, mɔɔ-dor-wi tɛ báá kóò ɔ dɔka; ko o ŋma, nɛ̀ kɔ̧́ zaŋ nàà kɔ-wa mɛ tɛnɛ, wa nyɛm mɛ ba kóò na; ɓɛɛ ko o ŋma, nɛ́ bíí a̧ dee wa nɛ̀ kpàná; ko o ŋma mbɛt, nɛ́ wa a̧ dora tɛ-wa tɛ báá kóò wen Wan mɛ yiwese. Wi nɛ̀ nyɛma mɛ zii mgbara wen n'am tɔ̧‘i, a̧ zii.»

Jesu toka de yoŋgo zu o geɗek bem

(Zɔk Mk 10.13-16; Lk 18.15-17)

13O ŋma bíí mgbɔɔ o geɗek bem nɛnɛ ha̧ Jesu mɛ e er zu-wa kɔfi nɛ̀ Sɔ̧ ha̧ wa, ɓɛɛ nɛ́ mɔ'ɔ nɛ̀ o ŋgaiwi ko Jesu dora wa. 14Ɓɛɛ Jesu tɔ̧ ha̧ wa: «K’ɛ́nɛ́ dor o geɗek bem na. Ɛ̀nɛ̀ é ha̧ wa mɛ tɛ tɛ‘m, wen Wan mɛ yiwese nɛ́ ko o wi nɛ̀ duk hee wa ga.» 15A̧ ee er zu-wa kaɗi, ɓɛɛ a̧ yak fara'i.

Jesu in wanmbɔi

(Zɔk Mk 10.17-31; Lk 18.18-30)

16Ŋma bíí nɛ̀ɛ́ tɛ Jesu ɓɛɛ ak a̧: «Wan-usi-mɔ, nɛ́ ge demɔ ge a̧‘m tɛ de sɛka'm duka kpasa kpoo nɛ kpoo ge?» 17Jesu kifa nú ha̧ a̧: «Mɛ́ ak am zu demɔ wen ge? Ɓaa de-wi nɛ́ Sɔ̧ kpɔk ɓɛɛ. Kà mɛ nɛ́ kɔ̧ɔ̧ mɛ duk kpasa kpoo nɛ kpoo ɓɛɛ nɛ̀ mɛ̀ kásí nɛ́ o heembea.» 18Ɓɛɛ wanmbɔi ak mɔ: «Heembea wan mɛ́ ge-aa ge?» Jesu kifa nú: «Ká mɛ gbɛ zu na, ká mɛ de dàlà na, ká mɛ zu mɔ na, ká mɛ ɓir wen e nú ŋmà-mɛ na.#Gboa-a 20.13-16; Wee-ɗoŋ-he 5.17-20 19Mɛ̀ tú̧ tɛ dáà in nàà kɔ-mɛ, ɓɛɛ mɛ́ kɔ̧́ ŋmà-mɛ hee kiitɛ-mɛ ga.»#Gboa-a 20.12; Wee-ɗoŋ-he 5.16; Lev 19.18 20Ŋgaiwi'i tɔ̧ɔ̧ ha̧ a̧: «Mi kasa o heembea nɔ‘i lɛŋ, ɓɛɛ oi mɔ nɛ̀ ɓɔna ha̧‘m mɛ de woyo nɛ́ ge?» 21Jesu tɔ̧ɔ̧ ha̧ a̧: «Kà mɛ̀ nɛ́ kɔ̧ɔ̧ ha̧ mɔ kɔ-mɛ mɛ nyɛm sɛnɛ, mɛ̀ nɛ́ɛ̀ ɗɔr mɔ kɔ-mɛ lɛŋ, mɛ̀ kɛ̧́ sede-a ha̧ o wisan, ɓɛɛ mɛ tɛ kpa mbɔi sɛn yiwese. Ɗoŋ mɔ‘i, mɛ̀ tɛ́ ɗoŋ am.» 22Tɛ zia wen'i, a̧ yaka nɛ̀ ɗaŋsee wen a̧ nɛ́ gasa wanmbɔi.

23Ɓɛɛ Jesu tɔ̧ ha̧ o ŋgaiwi kɔ‘i: «Mɛ̀ nɛ́ kpasawen a̧‘m tɔ̧ h’ɛ́nɛ́: ɔ ŋgaya ha̧ wanmbɔi mɛ ye tɛ Wan mɛ yiwese. 24Mi'e ndé, gboa-a ko ŋgeloba nɛ̀ kɔ̧́ woi-si̧ɔ̧ ɔ yɛ́kɛ́ɗɛ́ gan yea-a ko wanmbɔi tɛ Wan ko Sɔ̧.» 25Ŋgimbi nɛ o ŋgaiwi ko Jesu zia hegɔ, ɗɛɗɛ-wa gɔna nyɛmna, ɓɛɛ wa tɔ̧: «Kà nɛ́ bòò hegɔ, ɓɛɛ nɛ́ o'o tɛ kpasi o?» 26Jesu zɔka mɔ sitɛ wa, ɓɛɛ tɔ̧ ha̧ wa: «Mɔ‘i gana bíí, ɓɛɛ ŋma mɔɔ-gan Sɔ̧ bo na.»

27Ɓɛɛ nɛ́ mɔ'ɔ nɛ̀ Pierre tɔ̧ɔ̧ ha̧ Jesu: «K’ɛɛ, n’ɛɛ ee mɔ lɛŋ duk h’ɛ́ɛ́ mɛ nɛ ɗoŋ‘nɛ'ɛ, nɛ́ ge mɔ ge ɛ̀ɛ̀ tɛ kpa oi-aa ge?» 28Ɓɛɛ Jesu tɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́; ɛ́nɛ́ o wi-tɛ-ɗoŋ-am, ŋgimbi nɛ̀ mɔ lɛŋ tɛ ɗafi nɛ̀ mbe-a, nɛ̀ Bem ko bíí tɛ duk nù zu damti zaŋ gasamɔ kɔ‘i, ɛ́nɛ́ tɛ duk nù zu damti ɓu-zua-yiitoo mbɛt, h’ɛ́nɛ́ mɛ gɔn kita zu o zuduk be Israɛl ɓu-zua-yiitoo.#Mt 25.31; Lk 22.30 29Kóó o ndé nɛ̀ tɛ e kira kɔ‘i, in o nya-wi, o boko-nya-wi, dáà in nàà kɔ‘i, ká bá nɛ̀ o bem kɔ‘i, gú nɛ̀ o fɔ kɔ‘i lɛŋ duk wen zu'm, wi’ɛi tɛ kpa mɔɔ-oi-aa nɛ̀ dɔka-a gan, ɓɛɛ a̧ tɛ kpa duka-kpasa kpoo nɛ kpoo nɛ̀ mɔɔ-oi mbɛt. 30O dɔka bíí mɛ ti tɛ ya nɛ̀ ɗoŋ; ɓɛɛ o dɔka bíí mɛ ɗoŋ yàá nɛ̀ ti.»#Mt 20.16; Lk 13.30

Currently Selected:

MATTHIEU 19: GB11DC

Highlight

Copy

Compare