HABAKUK 3
3
Kɔfa-sɔ̧ ko Habakuk
1Kɔfa-sɔ̧ ko Habakuk wi-tɔ̧-wen oi nú Sɔ̧
tɛ aia-nú nɛ mɔ'ɔ.
2Mi zia nyɛrɛ hu̧ra-nin'nɛ́ nɛ hu̧r'i,
GASA WAN,
hegɔ kíì de'm dee
tɛ zɔka o tom k’ɛ́nɛ́ n’ɛnɛ dea.
Ɛ̀nɛ̀ úsí mɔɔ nɔ‘i h’ɛ́ɛ́ woyo
tɛ ŋgimbi k’ɛɛ kinii;
ɛ̀nɛ̀ dé h’ɛ́ɛ́ mɛ iŋ wa!
Kóó see'nɛ́ nyima,
ɓɛɛ n’ɛ̀nɛ̀ dé ko h’ɛ́ɛ́.
3Sɔ̧ tɛ nɛ war Teman;
Sa̧a̧-wi tɛ nɛ Kaya Paraŋ.
Gasamɔ kɔ̧-a̧ duna yiwese;
zaŋnu lɛŋ duna nɛ zɔnamɔ kɔ̧-a̧.
4Sa̧a̧mɔ tɛ-a tok hee wese ga;
naŋ-wese gɔm nɛ kɔ̧ er-a,
fara nɛ ŋgai kɔ̧-a̧ duk sɛnɛ.
5Fara n'aa nɛ,
zɛɛ-geŋa yaka ti ha̧ a̧,
ɓɛɛ ŋga-zɛɛ ndaka pata a̧.
6A̧ yora ɓɛɛ nù nak ti a̧,
a̧ zɔka mɔ ɓɛɛ tɛ o tugun bíí nak.
O gasa kaya nɛ ya ɓɔnsɛnɛ mbaŋa,
o zu-tɔ̧́ nɛ yaa so ɓeemɛ hira,
o fara nɔ‘i so nɛ yuwar kɔ̧-a̧.
7Mi zɔka bɔnɛ nɛ tika zu o bíí Kusaŋ,
gasa kíì ba nɛ o be Madiaŋ mbɛt.
8GASA WAN, nyimsea k’ɛ́nɛ́ kur zu o nana-yì nde?
Ŋga nyimsea k’ɛ́nɛ́ zɔk nɛ o gba-tɔp
s’ɛnɛ daŋ nɛ o nyaŋa
in o keekee-gbin-biro’ɛ nde?
9Ɛnɛ ŋgaŋa kusaa k’ɛ́nɛ́ kaɗi;
ɛnɛ daka goo a ɗoŋ kusaa.
Ɛnɛ dee ha̧ gasa yì-kórò mɛ aŋ nù ɗuk.
10O kaya zɔka'nɛ́,
ɓɛɛ tɛ-wa nak;
dir-yì mɛ ɗɔɔ nù dika,
ŋga kin-yì sula,
ɓɛɛ yi ŋmai̧ si yiwese.
11Tɛ toka-a nɛ yí-góò k’ɛ́nɛ́ tok,
tɛ zara-a nɛ yi-sɛɛ k’ɛ́nɛ́ zar'i,
wese in nyaŋa-zɛ yora ɓɔn kpɔk oi.
12Ɛnɛ nɛ nɔ zu nù tɛ kura-see,
tɛ ŋga nyimsea k’ɛ́nɛ́,
ɛnɛ i̧sa̧ o tugun bíí mbɔli.
13Ɛnɛ gboo yor wen kpásá dukbíí k’ɛ́nɛ́,
wen h’ɛ́nɛ́ mɛ kpasi wan n’ɛnɛ tɛna nɔ-wan a zu-a.
Ɛnɛ gbɛɛ gasawi ko o wi-de-ɗaŋmɔ,
ɛnɛ kuma o bíí kɔ̧-a̧ yinɛ lɛŋ.
14Wa ya fara-hu̧si kɔ-wa mɛ
hee bíí tika so er-wa
ha̧ wa mɛ nyɔŋ kaɗi ga;
wa píí so hee gba búk-kórò ga,
gai nɛ mɔ nɛ desee wen ndaka yɛ a taŋ,
ɓɛɛ ɛnɛ pi̧ o wan kɔ-wa tɛ zu sar
nɛ goo mɛ er-wa woyo.#3.13,14 texte nú hébreu sa̧ na.
15Ɛnɛ pi̧i̧ war ɗɔɔ gba-tɔp,
tɛ ŋga pɛŋa-yì,
ha̧ o nyaŋa k’ɛ́nɛ́.
16Ɓɛɛ tɛ zia mɔ‘i n'am zia,
nyak zaŋ-am daŋa dun kɔ̧ war ger-am;
tɛ giti mɔ‘i,
mi zaŋa nú‘m,
gba̧a̧-tɛ‘m ɓuka gbin nduku-nduku,
mi i̧si̧ nù ŋgai ɓɔna.
Mi tɛ yor ɓɔn kpɔk fara
zɛm nɛ wese ŋga bɔnɛ
nɛ tɛ tik zu o wi-nasi-ɛɛ.
17O te-mbɔra do ɓɔna,
o nyak-dɔ̧ɔ̧ wai ɓɔna,
o te-nɔ̧́ wai na mbɛt,
nyɔnɔ dɛm kpɛɛfɔ ɓɔna,
o sami in o ndai
bo kɔ̧ ɓoramɔ ɓɔna mbɛt.
18Ɓɛɛ kɔ‘m, desee kɔ‘m duk tɛ GASA WAN;
mi duk nɛ tortɛ wen zu Sɔ̧, Wan-kpas'am.
19GASA WAN nɛ́ wan kɔ‘m,
a̧ nɛ́ ŋgai kɔ‘m;
nɛ́ a̧ a̧ de ha̧‘m mɛ duk nɛ haya-a hee o kalamba ga,#3.19. o kalamba: texte tɔ̧ɔ̧ nɛ́ biches.
nɛ́ a̧ a̧ ba'm ndɛn nɛ zu ó kaya nɛnɛ.#2 Sam 22.34; Gima 18.34
Gima ko wan-duk-zu-gima; gima nɛ̀ mɔɔ-mbɛr nɛ̀ nyak-aa a̧a̧ sɛnɛ.
Currently Selected:
HABAKUK 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.