DANIƐL 3
3
Wannu hee mbéá ha'i mɛ gasi mboo-mɔ
1Wannu Nabukɔdɔnɔsɔr mboo bíí nɛ lɔr, kusa-a nɛ mɛtrɛ ɓu-taar, pɛsa-a nɛ mɛtrɛ taar, ɓɛɛ a̧ ba e ŋgɔn sɛn bɔkɔ-nu Dura, tɛ nu Babilɔŋ. 2Nabukɔdɔnɔsɔr pi̧i̧ tom wen mɔi̧a o wi-duk-zu-nu, o gasawi, o wi-duk-zu zika-nù, o wi-tɔ̧-mbɔrɔ, o wi-kasi-mbɔi, o wi-ha̧-heembea, o wi-gɔn-kita in o mɔ-geŋa tɛ nu kɔ̧-a̧ lɛŋ mɛ tɛ̀ɛ́ de gbaŋa mboo-mɔ n'aa baa e ŋgɔn'i. 3O wi-duk-zu-nu, o gasawi, o wi-duk zu zika-nù, o wi-tɔ̧-mbɔrɔ, o wi-kasi-mbɔi, o wi-ha̧-heembea, o wi-gɔn-kita, o mɔ-geŋa tɛ nu'i lɛŋ mɔi̧a tɛnɛ wen dee gbaŋa mboo-mɔ nɛ wannu Nabukɔdɔnɔsɔr baa e ŋgɔn'i. 4Wi-he-mbea tɔ̧ɔ̧ nɛ hee ger: «Ɛnɛ o dukbíí lɛŋ, in o tugun bíí nɛ tɔ̧ nú nɛtɛ nɛtɛ, wa tɔ̧ɔ̧ a̧‘m tɔ̧ h’ɛ́nɛ́‘e, 5ŋgimbi n’ɛnɛ tɛ zii dɔma zak, fol, kunde, koloŋ, be koloŋ, gba-zak gu nɛ o mɔɔ-de-gima lɛŋ, ɛ̀nɛ̀ gbɛ́ zugur'nɛ́ nu mɛ gasi mboo-mɔ nɛ‘i dee nɛ lɔr nɛ wannu Nabukɔdɔnɔsɔr baa e ŋgɔn. 6Ɓɛɛ wi nɛ beka gu nu mɛ gasi mboo-mɔ‘i na, wi tɛ ba a̧ pi̧ kɔ̧ gasa wee kɔ̧ lɔk war kpɔk.» 7Ŋgimbi nɛ o bíí lɛŋ zia giti wora-zak, fol, kunde, koloŋ, be koloŋ gu nɛ o mɔɔ-de-gima lɛŋ, o dukbíí in o tugun bíí nɛ tɔ̧ nú nɛtɛ nɛtɛ guu nu gasi nɛ mboo-mɔ nɛ‘i dee nɛ lɔr nɛ wannu baa e ŋgɔn.
Wen baa o sɛm ko Daniɛl
8Ŋgimbi'i, o ŋma be Kaldee tɛa, ɓɛɛ gba ndaa o be Juif. 9Wa tɔ̧ɔ̧ ha̧ wannu Nabukɔdɔnɔsɔr'e: «Dáà, wannu nɛ́ ɛnɛ ɓɛɛ! 10Bó nɛ́ ɛ́nɛ́ baa he so mbéá ha̧ bíí lɛŋ‘e, ŋgimbi nɛ‘i tɛ zii nɛ giti o zak, fol, kunde, koloŋ, be-koloŋ, gba-zak gu nɛ o mɔɔ-de-gima lɛŋ, a'i tɛ́ɛ̀ gu nu ti mboo-mɔ nɛ‘i dee nɛ lɔr mɛ gas'aa na nde? 11Ɓɛɛ kóó o nde nɛ beka gu nu mɛ gasi mɔ‘i na, wi tɛ pi̧ a̧ sɛn kɔ̧ gasa wee kɔ̧ lɔk na nde? 12Zɔ́k, Sadrak, Mesak in Abɛd-Nɛgo, o be Juif n’ɛnɛ kaia a zu o tom sɛn nu Babilɔŋ'ɛ kɔ̧ mboo zu tɛ mɔ n’ɛnɛ tɔ̧a̧ na; wa kɔ̧ gasa o sɔ̧ k’ɛ́nɛ́ in mboo-mɔ n’ɛnɛ baa e ŋgɔn na.»
13See wannu Nabukɔdɔnɔsɔr ɗaŋa nyɛmna ɓɛɛ tu̧ mbɛt; hegɔ a̧ ha̧a̧ nú ha̧ o bíí mɛ nɛ̀ɛ́ mgbɔ Sadrak, Mesak in Abɛd-Nɛgo tɛnɛ ha̧ a̧. 14A̧ aka wa: «Sadrak, Mesak, Abɛd-Nɛgo, nɛ́ kpasawen a̧‘m zia'e, ɛ́nɛ́ de tom ha̧ o sɔ̧ kɔ‘m in ɛ́nɛ́ gasi mboo-mɔ nɛ‘i dee nɛ lɔr n'am baa e ŋgɔn na nde? 15Kinii, ɛ́nɛ́ dúk zu naŋ‘nɛ́ wen nɛa-a mɛ gu nu ti mboo-mɔ kɔ‘m nɛ‘i dee nɛ lɔr mɛ gas'aa ŋgimbi n’ɛnɛ be tɛɛ zii giti o zak, fol, kunde, koloŋ, be-koloŋ, gba-zak gu nɛ o mɔɔ-de-gima lɛŋ nde? K’ɛ̀nɛ̀ de mɔ‘i na, wi tɛ pi̧‘nɛ sɛn kɔ̧ gasa wee kɔ̧ lɔk war kpɔk, ɓɛɛ mi tɛ zɔk sɔ̧ nɛ tɛ gbo'nɛ́ er-am yinɛ‘i.»
16Sadrak, Mesak in Abɛd-Nɛgo kifa nú ha̧ wannu Nabukɔdɔnɔsɔr: «Ɛɛ kpa kifa nú mɛ ha̧‘nɛ́ tɛ wen'i na. 17Kà Sɔ̧ k’ɛɛ n’ɛɛ de tom ha̧ a̧‘i á̧ kɔ̧a̧ mɛ gbo yɛ yinɛ, a̧ tɛ gbo yɛ yinɛ sɛn kɔ̧ gasa wee kɔ̧ lɔk in er'nɛ́ mbɛt.
18«Kóó kà a̧ nɛ dee hegɔ na mbɛt, ɛ̀nɛ̀ íŋ kana nɛ mbetɛ‘e, ɛ́ɛ́ beka de tom ha̧ o sɔ̧ k’ɛ́nɛ́ in gasa mboo-mɔ nɛ‘i dee nɛ lɔr n’ɛnɛ baa e ŋgɔn'i na mbɛt.»
Wa gɔna kita-fio zu o sɛm ko Daniɛl taar
19Tɛ kifa-nú‘i, see wannu Nabukɔdɔnɔsɔr ɗaŋa batɛ, nyimsea kɔ̧-a̧ kura zu Sadrak, Mesak ba nɛ Abɛd-Nɛgo. A̧ ha̧a̧ nú ha̧ wa mɛ ye wee mɛ yoŋgi nɛ ŋgaya-a war mɔɔrɔ-ɗoŋ-yiitoo gan kuti-a sɛn kɔ̧ lɔk, 20ɓɛɛ a̧ ha̧ nú ha̧ o ŋga wi-biro kɔ̧-a̧ mɛ hɛr Sadrak, Mesak in Abɛd-Nɛgo, wen kaia wa a kɔ̧ gasa wee kɔ̧ lɔk'i. 21Wa hɛra wa nɛ oi laa tɛ-wa lɛŋ: gba-laa, sir-laa, laa-gaɓi-tɛ in mɔɔ-gu-zu mbɛt, ɓɛɛ wa kai wa a sɛn kɔ̧ gasa wee kɔ̧ lɔk. 22Hee mɔ'ɔ nɛ heembea ko wannu ŋgaia so nyɛmna ga, wee kɔ̧ lɔk'i kpɔra so batɛ, ɓɛɛ leɓe-wee dɔ o wi nɛ kaia so Sadrak, Mesak in Abɛd-Nɛgo a tɛ wee'i, gbɛ wa a nu. 23Ɓɛɛ war ko Sadrak, Mesak in Abɛd-Nɛgo, wa tika yi wee nɛ̀ oi hɛra-a.
24Wannu Nabukɔdɔnɔsɔr kura nɛ gɔna-ɗɛɗɛ, ɓɛɛ ak o wi-ba-keta kɔ‘i hee mɔ'ɔ ga: «Bó nɛ́ ɛɛ hɛra nɛ́ o bíí taar a yí-wee na?»
Wa kifa nú ha̧ a̧: «Ii, nɛ mɔ‘i wannu.»
25Wannu tɔ̧a̧: «Nɛ́ bíí naar a̧‘m zɔk fara yara-a nɛ yi wee gee, ɓɛɛ ŋma kpɔk mgbara wa duk hee ŋma bem ko sɔ̧ ga.»
Wa gboo o wi nɔ‘i taar'i
26Nabukɔdɔnɔsɔr ɗɔla pii ká̧ nu gasa lɔk-wee'i, ɓɛɛ sa mɔ: «Sadrak, Mesak, Abɛd-Nɛgo! O wi-de-tom ko Sɔ̧ si ŋgɔn mɛ! Ɛ̀nɛ̀ gbó, ɛ̀nɛ̀ tɛ́!» Ɓɛɛ Sadrak, Mesak in Abɛd-Nɛgo gbo nɛ yí-wee mɛ tɛnɛ. 27O wi-duk-zu-nu, o gasawi, o wi-duk zu zika-nù in o wi-tɔ̧-mbɔrɔ ko wannu mɔi̧a ŋmaa mɛ zɔk o wi nɔ‘i taar nɛ gboo nɛ kɔ̧ wee'i. Wee dɔ ŋma mɔɔ-tɛ-wa na, mui̧-zu-wa bíí wee na, laa kɔ-wa ba so wee na, ŋma be pɛr zi-wee nun tɛ-wa na mbɛt.
28Nabukɔdɔnɔsɔr tɔ̧a̧: «Zɔnamɔ a̧ duk nɛ ko Sɔ̧ ko Sadrak, Mesak in Abɛd-Nɛgo nɛ toma betom kɔ‘i tɛnɛ mɛ gbo o wi-de-tom kɔ‘i nɛ e ta nɛ a̧, ɓɛɛ wa ta mɔ wen fea-a na, gbin nɛ heembea ko wannu wen wa kpɛk mɛ de tom ha̧ ŋma sɔ̧ nɛtɛ in mɛ gas'aa na, wen bo nɛ Sɔ̧ kɔ-wa na.
29«Hegɔ mi ha̧a̧ nú sɔsɔɔ ha̧ dukbíí in o tugun bíí nɛ tɔ̧ nú nɛtɛ nɛtɛ, ŋma bíí kpɔk mgbara'nɛ́ nɛ tɛ tɔ̧ ŋma ɗaŋ wen sa nɛ nin Sɔ̧ ko Sadrak, Mesak in Abɛd-Nɛgo, wi tɛ gɔm a̧ ɓir sɛ́kɛ́ɗɛ́-sɛ́kɛ́ɗɛ́ a nu, ɓɛɛ wi tɛ gbin tua kɔ̧-a̧ a nu lɛŋ, wen ŋma Sɔ̧ nɛ nyɛma mɛ gbo bíí tɛ bɔnɛ hegɔ bo na.»
30Ɓɛɛ wannu de ha̧ Sadrak, Mesak in Abɛd-Nɛgo mɛ ya nɛ o gasawi tɛ zika-nù Babilɔŋ.
Yiitoo zu ko Nabukɔdɔnɔsɔr
31Wannu Nabukɔdɔnɔsɔr toma tɔ̧ ha̧ o dukbíí in o tugun bíí nɛ tɔ̧ nú nɛtɛ nɛtɛ zaŋnu lɛŋ hee mɔ'ɔ ga:
«Gasa ga̧a̧mɔ a̧ duk in'nɛ̀ɛ́!
32«Mi tɛ we ɗoŋ o mɔɔ-usi-mɔ in o mɔɔ-kifi nɛ Sɔ̧ mɛ si ŋgɔn dee so ha̧‘m:
33Oee zɔm o mɔɔ-usi-mɔ,
in o ŋga mɔɔ-kifi kɔ̧-a̧ wa!
Wan kɔ̧-a̧ duk kpoo nɛ kpoo,
ɓɛɛ nɛ a̧ a̧ ɔ wan zu o bezaŋ yaknɛ sɔ̧i̧i̧!
Currently Selected:
DANIƐL 3: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.