2 TESALONIK 2
2
O mɔ nɛ̀ tɛ́ hɔ nɛti ha̧ Gasa Wan mɛ́ pii ɗoŋ
1O nya'm, zu mɔ ko pia-ɗoŋ ko Gasa Wan k’ɛ́ɛ́ Jesu Krist, in mɔi̧a-ŋmaa n’ɛ̀ɛ̀ tɛ́ mɔi̧ katɛ a̧, ɛ́ɛ́ ak nɛ́ ɛ́nɛ́:#1 Tes 4.15-17 2k’ɛ́nɛ́ sakali zu'nɛ́ in k’ɛ́nɛ́ de kíì, wen zu ŋma tɔ̧ɔ̧-wen oi nú Sɔ̧, kóó ŋma tɔ̧ɔ̧-wen nɛtɛ, koo wa a̧ tɔ̧‘e nɛ́ ŋma kalata a̧ tɛ̀ɛ́ nɛ̀ tɛ́ yɛ mɛ́ de h’ɛ́nɛ́ mɛ́ kɔ̧ ɗɔaa'e, wese ko Gasa Wan hɔɔ kaɗi wó, na. 3Kóó tɛ́ ge yuwar ge, ká ŋma bíí ɔr'nɛ́ sɛnɛ na. Nɛti ha̧ wese'i mɛ́ hɔ, o bíí nɛ̀ dɔka-a tɛ́ e yuwar kɔ̧ɔ̧ɗɔɔwen duk, ɓɛɛ Wan-ɗaŋ nɛ̀ tɛ́ yɔ‘i, tɛ́ usi tɛ̀ sɛ. 4Wi’ɛi tɛ́ ba zu dúk nɛ̀ mɔ lɛŋ nɛ̀‘i sa'e sɔ̧, in nɛ̀‘i gasi; a̧ tɛ́ nɛ̀ɛ́ duk kɔ̧ tua ko Sɔ̧, ɓɛɛ tɔ̧a̧‘e wi nɛ́ Sɔ̧.#Dan 11.36; Ez 28.2
5Tɛ‘nɛ́ mbaŋ ɗoŋ wen n'am tɔ̧ɔ̧ so h’ɛ́nɛ́ ŋgimbi n'am duka nɛnɛ in'nɛ̀ɛ́ na nde? 6Ɓɛɛ ɛ́nɛ́ iŋa mɔ nɛ̀ dor wi’ɛi tɛ tɛa-a kinii; mɛ̀ nɛ́ wen ha̧ a̧ mɛ́ hɔ tɛ́ ŋgimbi kɔ̧-a̧. 7Kinii ŋgayamɔ ko mɔɔ-ɗaŋ a̧a̧ tɛ́ tom, ɓɛɛ mɛ̀ nɛ́ wen ha̧ wi’ɛi nɛ̀ dor a̧‘i mɛ́ yu, 8sɛka Wan-ɗaŋ usa tɛ. Búk mɛ́ kɔ̧ nú Gasa Wan Jesu tɛ́ ɗaŋ a̧, ɓɛɛ sa̧a̧mɔ pia-ɗoŋ kɔ̧-a̧ dee ha̧ a̧ mɛ́ kifi geemɔ.#Es 11.4 9Nɛ́ ŋgayamɔ ko Satan a̧ Wan-ɗaŋ tɛ́ tɛ̀ nɛnɛ, de nɛ̀ o ŋgayamɔ nɛtɛ nɛtɛ lɛŋ, o mɔɔ-kifi, o mɔɔ-gɔn-ɗɛɗɛ-ɔr-bíí,#Mt 24.24 10ká bá nɛ̀ o ɗaŋ yuwar ɔramɔ lɛŋ wen o wi nɛ̀ tɛ́ yɔ, wen wa kɔ̧ so kpɛka kpasawen nɛ̀ tɛ̀ɛ́ kpasi so wa na. 11Mɛ̀ nɛ́ hegɔ sa Sɔ̧ tóm ŋma ŋgayamɔ-yɔ-wi nɛ̀ de ha̧ wa mɛ́ a̧r in ha̧ wa mɛ́ kɔ̧ ɗɔɔ ndela, 12wen ha̧ a̧ mɛ́ gɔn kita zu o bíí nɛ̀ kɔ̧ ɗɔɔ kpasawen na, ɓɛɛ nɛ̀ ya nɛ̀ desee wen deemɔ nɛ̀ yuwar-a na.
Sɔ̧ hoka'nɛ́ h’ɛ́nɛ́ mɛ́ kpasi
13War k’ɛ́ɛ́, ɛ́ɛ́ tɛ́ duk tɛ̀ dee osoko ha̧ Sɔ̧ ɓɔnsɛnɛ wen'nɛ́, o nya-ɛɛ nɛ̀ Gasa Wan kɔ̧ɔ̧ nyɛmna, wen Sɔ̧ hoka so'nɛ́ nɛ̀ ku̧u̧naŋ-a mɛ h’ɛ́nɛ́ mɛ́ kpasi nɛ̀ ɗoŋ Sa̧a̧ Ɔmi nɛ̀ de ha̧ war-tɛ-wi mɛ́ sa̧, in nɛ̀ ɗoŋ kɔ̧ɔ̧ɗɔɔwen tɛ́ kpasawen. 14Nɛ́ mɔ‘i á̧ à̧ saa nɛ̀ ɛ́nɛ́ tɛ́ De Mbe Wen n’ɛ̀ɛ̀ usa, h’ɛ́nɛ́ mɛ́ kpa gasamɔ ko Gasa Wan k’ɛ́ɛ́ Jesu Krist. 15Hegɔ, o nya-ɛɛ, ɛ̀nɛ̀ yór nɛ̀ nɔa-a, ɛ̀nɛ̀ kásí o mɔ n’ɛ̀ɛ̀ usa h’ɛ́nɛ́ tɛ tɔ̧a̧-a̧ nɛ̀ nú, kóó tɛ yɔra-a zaŋ kalata mbɛt, nɛ̀ de-a.
16Gasa Wan k’ɛ́ɛ́ Jesu Krist nɛ̀ tɛ-wi in Sɔ̧ Dáà k’ɛ́ɛ́ nɛ̀ kɔ̧ɔ̧ yɛ, ɓɛɛ ha̧ nɔɔ-ŋgiɗi kpoo nɛ kpoo in de mɔɔ-e-nɛ̀-ta h’ɛ́ɛ́ nɛ̀ ɗoŋ deemɔ nɛ̀ ta-tɛ kɔ̧-a̧, 17a̧ gá̧ see'nɛ́ de nɛnɛ h’ɛ́nɛ́ mɛ́ yor nɛ̀ nɔa-a tɛ́ mɔ lɛŋ nɛ̀ ɔ dee, kóó nɛ́ deemɔ, kóó tɔ̧ɔ̧-wen.
Currently Selected:
2 TESALONIK 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.