2 WANNU 2
2
Daŋa-a ko Elii si yiwese
1Mɔ nɛ̀ hɔɔ ŋgimbi nɛ̀ GASA WAN baa nɛ̀ Elii nɛ̀ gba-búk si yiwese nɛ́ mɔ'ɔ. Elii in Elisee kura Gilgal yak. 2Elii tɔ̧ɔ̧ ha̧ Elisee: «Mi ai nú ha̧ mɛ, mɛ̀ dúk kɔ-mɛ hɛ̧ɛ̧ wen GASA WAN tom nɛ‘m si Bɛtɛl mɛ.»
Elisee kifa nú: «Kpasawen a̧‘m tɔ̧, hee mɔ'ɔ nɛ̀ GASA WAN duk kpasa in ɛnɛ mbɛt duk kpasa ga, mi beka e kɔ‘m ‘nɛ́ duk na.» Ɓɛɛ wa zir in ŋmaa si Bɛtɛl.
3O ŋma gbama *wi-tɔ̧-wen oi nú Sɔ̧ nɛ̀ ya kɔ‘i Bɛtɛl wee ti Elisee tɛnɛ ɓɛɛ tɔ̧ ha̧ a̧: «Mɛ iŋa'e ndé, GASA WAN tɛ ba wan kɔ-mɛ er-mɛ sɔsɔɔ yaknɛ nde?»
A̧ kifa nú: «Mi iŋa mbɛt; k’ɛ́nɛ́ tɔ̧ wen-aa ha̧‘m na!»
4Elii tɔ̧ɔ̧ ha̧ a̧ woyo: «Mi ai nú ha̧ mɛ Elisee; mɛ̀ dúk kɔ-mɛ hɛ̧ɛ̧ wen GASA WAN tom nɛ‘m si Jeriko mɛ.»
A̧ kifa nú: «Kpasawen a̧‘m tɔ̧, hee mɔ'ɔ nɛ̀ GASA WAN duk kpasa in ɛnɛ mbɛt duk kpasa ga, mi beka e kɔ‘m'nɛ́ duk na!» Ɓɛɛ wa yak in ŋmaa si Jeriko mɛ.
5O gbama *wi-tɔ̧-wen oi nú Sɔ̧ nɛ̀ ya sɛn Jeriko ɗɔŋa pii katɛ Elisee, ɓɛɛ tɔ̧ ha̧ a̧: «Mɛ iŋa'e GASA WAN tɛ ba wan kɔ-mɛ yaknɛ er-mɛ sɔsɔɔ nde?»
A̧ kifa nú: «Mi iŋa mbɛt; k’ɛ́nɛ́ tɔ̧ wen-aa ha̧‘m na.»
6Elii tɔ̧ɔ̧ ha̧ a̧ woyo: «Mi ai nú ha̧ mɛ, mɛ̀ dúk hɛ̧ɛ̧, wen GASA WAN tom nɛ‘m nɛnɛ si nú Jurdɛn.»
A̧ kifa nú: «Kpasawen a̧‘m tɔ̧, hee mɔ'ɔ nɛ̀ GASA WAN duk kpasa in ɛnɛ mbɛt duk kpasa ga, mi beka e kɔ‘m'nɛ́ duk na!» Ɓɛɛ wa yak in ŋmaa yiitoo lɛŋ. 7O ŋma gbama *wi-tɔ̧-wen oi nu Sɔ̧ ɓu-mɔɔrɔ tɛa pii nú Jurdɛn yor nɛ̀ nyɛi̧a-a nɛ̀ wa. Elii in Elisee yor mgbák ká̧ foka-yí Jurdɛn 8Elii kpɔ̧i̧a̧ gba-laa kɔ‘i kar gusi nɛ̀ foka-yí Jurdɛn, ɓɛɛ yì kɛ̧ si ŋgɔn, kɛ̧ si ɗɔɔ. Wa kuu yì in ŋmaa nɛ̀ naŋ-wa kútú-kútú. 9Ŋgimbi nɛ wa kuu yì kaɗi, Elii tɔ̧ɔ̧ ha̧ Elisee: «Mɛ̀ ák mɔ n'am tɛ de ha̧ mɛ sɛka wa baa'm yaknɛ er-mɛ.»
Elisee kifa nú: «Mi kɔ̧ɔ̧ mɛ kpa ŋgai #2.9b ŋgai: texte tɔ̧ɔ̧ nɛ́ ɔmi. hee k’ɛ́nɛ́ ga war yiitoo.» #Wee-ɗoŋ-he 21.17
10Ɓɛɛ Elii tɔ̧: «Mɛ́ ák nɛ́ ŋgayamɔ nyɛmna. Kà mɛ̀ zɔk am tɛ ŋgimbi yaka-a kɔ‘m, mɛ tɛ kpa; kà bó hegɔ na, mɛ beka kpa na.»
11Hee mɔ'ɔ nɛ̀ wa nɛ́ in ŋmaa tɔ̧ nɛ̀ nyɛrɛ nɛnɛ ga, ŋma keekee-wee in o nyaŋa-wee tɛɛ kɛ̧ mgbara wa yiitoo, ɓɛɛ gasa gba-búk ɓaɓari Elii yaknɛ si yiwese mɛ. 12Elisee zɔka mɔ‘i, ɓɛɛ hiɗi mɔ: «Naa-oo, dáà kɔ‘m!#2.12 na-oo, dáa kɔ‘m: aia-nú ko Elisee usa'e ŋgai ko wi-tɔ̧-wen oi nú Sɔ̧ kpɔk gana ko o wi-biro in o mɔɔ-de-biro kɔ-wa lɛŋ. Dáà kɔ‘m! Naa-oo, keekee-nyaŋa ko *Israɛl in o wi-daŋ-aa!» Ɗoŋ mɔ‘i, Elisee zɔk a̧ ɓɔna, ɓɛɛ a̧ a̧k laa tɛ-a tan see-a yiitoo. 13A̧ baa gba-laa ko Elii nɛ̀ kpɔ̧i̧a̧ tik nù, a̧ pia ɗoŋ pii nú Jurdɛn, ɓɛɛ a̧ yor ká̧ ŋgere. 14A̧ baa gba-laa'i gusi nɛ̀ yì tɔ̧ nɛnɛ: «GASA WAN Sɔ̧ ko Elii a̧a̧ déè nde?» A̧ gusa yì hee ko Elii ga; yì kɛ̧ɛ̧ si ŋgɔn si dɔɔ, ɓɛɛ a̧ ku yak. 15O gbama *wi-tɔ̧-wen oi nú Sɔ̧ mɛ Jeriko nɛ̀ zɔka saŋa-yí-a tɔ̧a̧: «Ŋgai ko Elii yee tɛ Elisee.» Wa wee ti a̧, ɓɛɛ wa gbɛ zugur-wa nù ti a̧, 16tɔ̧ nɛnɛ ha̧ a̧: «O ŋma ŋga bíí ɓu-mɔɔrɔ a̧a̧ mgbara o wi-de-tom kɔ-mɛ hɛ̧ɛ̧, mɛ̀ nɛ́ o wi-biro; mɛ̀ é ha̧ wa mɛ kii wan kɔ-mɛ. Ŋma-fara *ɔmi ko GASA WAN baa a̧, ɓɛɛ siŋ a̧ pi̧ zu ŋma kaya, kóó kɔ̧ ŋma ɗɔŋgɔ.»
Ɓɛɛ a̧ kifi nú: «K’ɛ́nɛ́ tom ŋma bíí kpɔk na.»
17Hee mɔ'ɔ nɛ̀ wa ir nɛ a̧ ga, a̧ tɔ̧ ha̧ wa: «Ɛnɛ nyɛma toma wa.» Wa toma bíí ɓu-mɔɔrɔ, ɓɛɛ o wi nɔ‘i kii Elii hegɔɔ zɛ taar takaɗi, wa kpa a̧ na. 18Elisee ɓɔna so kɔ‘i Jeriko. Wa pia ɗoŋ tɛ a̧, ɓɛɛ a̧ tɔ̧ ha̧ wa: «Bo nɛ mi tɔ̧ɔ̧ so h’ɛ́nɛ́, k’ɛ́nɛ́ kii a̧ na, na nde?»
Mɔɔ-kifi ko Elisee
19O wi saaye Jeriko tɔ̧ɔ̧ ha̧ Elisee: «Hee mɔ'ɔ nɛ̀ nyaa zɔk ga, duka-a saaye-ɛ ɔ dee, ɓɛɛ yí-nɔɔ de na; nù dɛm nyɔnɔ nɛ de-a na mbɛt.»
20A̧ tɔ̧a̧: «Ɛ̀nɛ̀ bá mbe yèè tɛnɛ ha̧‘m, ɓɛɛ ɛ̀nɛ̀ á tɔŋ kɔ̧ a̧.» Wa baa tɛnɛ ha̧ a̧, 21ɓɛɛ a̧ yak si zu-zer-yì, nɛ́ɛ̀ á tɔŋ ɗɔɔ a̧ tɔ̧ nɛnɛ: «Tɔ̧ɔ̧-wen ko GASA WAN nɛ́ mɔ'ɔ: ‹Mi dee ha̧ yì'ɛ mɛ duk nɛ̀ sa̧a̧-a̧, a̧ beka gbɛ bíí bɔna, a̧ beka ɗaŋ nù ɓɔna.› » 22Yì duka nɛ̀ sa̧a̧-a̧ hɔ sɔsɔɔ nyɛm nɛ̀ ɗoŋ wen nɛ̀ Elisee tɔ̧ɔ̧ so.
23A̧ kura hi̧i̧ daŋ si Bɛtɛl, ɓɛɛ o ŋma be-ŋgaiwi tɛ nɛ̀ saaye mam nɛ̀ a̧ tɔ̧ nɛnɛ: «Mɛ̀ yák siɓi, ɗaŋ zuɗa zu-mɛ, mɛ̀ yák.»
24A̧ zika tɛ-a sitɛ wa, ɓɛɛ a̧ fom wa nɛ̀ nin GASA WAN. Ŋma ŋga saɗi yiitoo nɛ̀ hɔɔ ŋmaa in baŋgiiɗoŋ#2.24 baŋgiiɗoŋ: texte tɔ̧ɔ̧ nɛ́ ours. gboo nɛ̀ zaŋbɛɛ, ɓɛɛ nyɔŋ o bem ɓu-naar-zua-yiitoo mgbara wa.
25Nɛ́ mɔ'ɔ nɛ̀ Elisee daŋa si zu kaya Karmɛl, ɓɛɛ a̧ duk hi̧i̧ si nɛ̀ ɗoŋ si Samarii.
Currently Selected:
2 WANNU 2: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.