2 KALATA NYƐRƐ 5
5
1Ɗoŋ nɛ̀ tom nɛ̀ Salomɔŋ dee wen Tua ko GASA WAN kaɗa nɛ̀ de-a kaɗi, a̧ dee ha̧ wa mɛ kai o mɔ nɛ̀ dáà kɔ̧-a̧ David ee ha̧ Sɔ̧ tɛnɛ a fara-a-mɔ kɔ̧ Tua ko Sɔ̧: mɛ̀ nɛ́ bu-mbɔi, lɔr in o nyɛk nɛtɛ nɛtɛ.#2 Sam 8.11; 1 Kal Ny 18.11
Baa Kuɓa nɔɔ-tɔk e kɔ̧ Tua ko Sɔ̧
(Zɔk 1 Wan 8.1-13)
2Salomɔŋ mɔi̧a o gasawi Israɛl in o gasawi zu o zuduk be Israɛl, o be-wan nutua ko o be Israɛl pii Jerusalɛm wen gɔɔ Kuɓa nɔɔ-tɔk ko GASA WAN daŋnɛ nɛ̀ ye ko David nɛ̀‘i sa'e Siɔŋ.#2 Sam 6.12-15; 1 Kal Ny 15.25-28 3O be Israɛl lɛŋ mɔi̧a tɛnɛ katɛ wannu Salomɔŋ wese gbaŋa mɔɔrɔ-ɗoŋ-yiitoo fio-zɛ. 4Ŋgimbi nɛ̀ o gasawi Israɛl lɛŋ hɔɔ kaɗi, o be Levii gɔɔ kuɓa daŋnɛ. 5Wa gɔɔ kuɓa in Tua-kpa-ŋmaa, ɓɛɛ wa kai o sa̧a̧ nyɛk nɛ̀ ya kɔ̧ tua-laa'i daŋnɛ mbɛt. Mɛ̀ nɛ́ o wi-ɗafi-sɔ̧ in o be Levii a̧ tuia o mɔɔ nɔ‘i daŋnɛ. 6Wannu Salomɔŋ in o be Israɛl lɛŋ nɛ̀ mɔi̧a tɛnɛ katɛ kuɓa gɔna o sami in o ndai nɛ̀‘i nyɛm mɛ tɔr na ɗafi nɛ̀ sɔ̧. 7O wi-ɗafi-sɔ̧ gɔɔ Kuɓa nɔɔ-tɔk ko GASA WAN si fara-a kɔ̧ Tua ko Sɔ̧ sɛn fara nɛ̀ ɔ sa̧a̧ nyɛmna e ɗɔɔ wɔr-ɓaa o keribim. 8Wɔr-ɓaa o keribim nyara zu fara-e-kuɓa, ɓɛɛ kpe zu kuɓa in o te-gɔa-a. 9O te-gɔ kuɓa'i dura nyɛmna; nɛ́ tɛ yora-a mgbara kuɓa in nú tua sɛka'i zɔka ndɔŋ nú-wa, nɛ bó nɛ́ nɛ̀ zan na. O te nɔ‘i a̧ ya kànà hi̧i̧ hɔ sɔsɔɔ‘i. 10Ŋma mɔ bo so kɔ̧ kuɓa'i na, kànà nɛ́ ta yiitoo nɛ̀ Moisɛ aa so kɔ̧ a̧ sɛn Hɔrɛb, ŋgimbi nɛ̀ GASA WAN nɔɔ nɛ̀ tɔk in o be Israɛl, tɛ gboa-a kɔ-wa nɛ̀ nú Egiptɛ.#Wee-ɗoŋ-he 10.5
11O wi-ɗafi-sɔ̧ lɛŋ gboo nɛ̀ kɔ̧ sa̧a̧-fara, wen o wi-ɗafi-sɔ̧ nɛ̀ ya hi̧i̧ lɛŋ ɗafa so war-tɛ, kɛ̧ɛ̧ mgbara wa bo na. 12O be Levii lɛŋ nɛ̀ yaa so nɛ́ o wi-bii-gima, Asaf, Heman, Yedutun, o bem kɔ-wa in o nya-wa nɛ̀ pi̧i̧ o yɛ́m-yɛ́m laa kaia kɔ-wa nɛ́ o kuŋge, o kunde in o koloŋ ya ti fara-ɗafi-sɔ̧, nɛ̀ war daŋa-wese. O wi-ɗafi-sɔ̧ gɔmŋmaa-nɛ-ɓu-yiitoo yaa katɛ wa dɔm nɛ̀ mbia. 13O tiger o wi-bii-gima in o wi-dɔm-mbia lɛŋ yee ŋmaa gasi nɛ̀ GASA WAN, zɔn nɛ̀ a̧. Ŋgimbi nɛ̀ giti mbia kur, kà giti ger o kuŋge in o mɔɔ-de-saa nɔ̧́í̧, ɓɛɛ wa zɔna GASA WAN hee mɔ'ɔ ga:
«A̧ ɔ dee, kɔ̧ɔ̧mɔ kɔ̧-a̧ duk ɓɔnsɛnɛ!»
Tura-zan duna Tua ko GASA WAN,#1 Kal Ny 16.34; 2 Kal Ny 7.3; Ɛsd 3.11; Gima 100.5; 106.1; 107.1; 116.1; 136.1; Jer 33.11#Gboa-a 40.34-35 14ɓɛɛ o wi-ɗafi-sɔ̧ nyɛm so mɛ ya hi̧i̧ wen tom kɔ-wa na, wen zu tura-zan'i, wen nɛ̀ gasamɔ ko GASA WAN duna kɔ̧ Tua ko Sɔ̧.
Currently Selected:
2 KALATA NYƐRƐ 5: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.