1 JEAN 5
5
O bem ko Sɔ̧
1Kóó o ndé nɛ̀ kɔ̧ɔ̧ ɗɔaa'e Jesu nɛ́ Krist, Sɔ̧ koo wi’ɛi; ɓɛɛ kóó o ndé nɛ̀ kɔ̧́ Sɔ̧ nɛ̀ kó bíí'ɛ tɛ́ kɔ̧ kànà wi nɛ̀ Sɔ̧ kó'ɛ mbɛt.#5.1b ó ŋma wí-kpai-kalata tɔ̧a: kóó ò ndé nɛ̀ kɔ̧ɔ̧ Dáa tɛ́ kɔ̧̀ kana ó bém kɔ̧-a̧ mbɛ́t. 2K’ɛ̀ɛ̀ nɛ́ kɔ̧ɔ̧ Sɔ̧, ɓɛɛ k’ɛ̀ɛ̀ nɛ́ dee mɔ nyɛm nɛ̀ ɗoŋ heembea kɔ̧-a̧, ɛ́ɛ́ tɛ́ iŋ‘e, ɛ́ɛ́ kɔ̧ɔ̧ o bem ko Sɔ̧, 3wen kɔ̧́ɔ̧́ Sɔ̧, nɛ́ kasa o heembea kɔ̧-a̧. Ɓɛɛ o heembea ko Sɔ̧ bó nɛ́ zɔm tui na,#Jn 14.15 4wen o bíí nɛ̀ Sɔ̧ koo lɛŋ gana mɔɔ-zaŋnu, ɓɛɛ mɔ nɛ̀ gana mɔɔ-zaŋnu nɛ́ kɔ̧ɔ̧ɗɔɔwen k’ɛ́ɛ́. 5Wi nɛ̀ gana mɔɔ-zaŋnu nɛ́ o? Kànà nɛ́ wi nɛ̀ kɔ̧ ɗɔaa'e Jesu nɛ́ Bem ko Sɔ̧. 6Jesu Krist nɛ́ wi nɛ̀ tɛ̀ɛ́ nɛ̀ yì in tɔk; bó nɛ́ yì ɓɛɛ na, ɓɛɛ nɛ́ yì in tɔk mbɛt. Nɛ́ Sa̧a̧ Ɔmi a̧ de sedaako mɔ‘i wen Sa̧a̧ Ɔmi nɛ́ kpasawen. 7O wi-de-sedaako a̧a̧ sɛnɛ taar: 8Sa̧a̧ Ɔmi, yì, in tɔk; ɓɛɛ wa taar lɛŋ de nɛ kpɔk sedaako. 9K’ɛ̀ɛ̀ nɛ́ kpɛka sedaako ko bíí, ɓɛɛ bó nɛ́ sedaako ko Sɔ̧ gana ko bíí na nde? Wen sedaako nɛ̀ Sɔ̧ dee nɛ́ mɔ'ɔ: a̧ dee sedaako wen zu Bem kɔ̧-a̧. 10Wi nɛ̀ kɔ̧ ɗɔaa ha̧ Bem ko Sɔ̧ a̧a̧ nɛ̀ mɔɔ-sedaako'i sɛn tɛ̀. Wi nɛ̀ kpɛk wen ko Sɔ̧ na e nɛ́ Sɔ̧ nɛ̀ wi-ndela, wen n'aa kɔ̧ ɗɔɔ sedaako nɛ̀ Sɔ̧ dee wen Bem kɔ‘i na. 11Ɓɛɛ sedaako'i nɛ́ mɔ'ɔ: Sɔ̧ ha̧a̧ duka-kpasa kpoo nɛ kpoo h’ɛ́ɛ́, ɓɛɛ duka-kpasa'i dúk tɛ̀ Bem kɔ̧-a̧.#Jn 3.36 12Wi nɛ̀ a̧a̧ nɛ̀ Bem kpaa duka-kpasa kaɗi; ɓɛɛ wi nɛ̀ Bem ko Sɔ̧ dúk tɛ́ a̧ na kpa duka-kpasa na.
Sɔŋkur wen
13Ɛ́nɛ́ n’ɛ̀nɛ̀ kɔ̧ɔ̧ ɗɔaa nɛ̀ nin Bem ko Sɔ̧, mi yɔr mɔ'ɔ lɛŋ h’ɛ́nɛ́, wen h’ɛ́nɛ́ mɛ́ iŋ‘e ɛ́nɛ́ kpaa duka-kpasa kpoo nɛ kpoo kaɗi! 14Mɔ n’ɛ̀ɛ̀ kpa nɔɔ-ŋgiɗi sɛnɛ ti a̧ nɛ́ mɔ'ɔ: k’ɛ̀ɛ̀ ák mɔ er-a nyɛm nɛ̀ ɗoŋ mɔ n'aa kɔ̧a̧, a̧ tɛ zii; 15ɓɛɛ k’ɛ̀ɛ̀ nɛ́ iŋa'e a̧ zii akamɔ k’ɛ́ɛ́ zii, ɛ́ɛ́ iŋa'e ɛ́ɛ́ kpaa mɔ n’ɛ̀ɛ́ aka'i kaɗi.
16Kà ŋma bíí nɛ́ zɔka nya-wi tɛ̀ dee ɗaŋmɔ nɛ̀ bó nɛ́ ɗaŋmɔ-dak-wi pi̧ tɛ́ fio na, wi’ɛi a̧ kɔfi Sɔ̧, ɓɛɛ Sɔ̧ tɛ́ kpasi nya-a̧‘i. Bó nɛ́ mi tɔ̧ nɛ́ o wi nɛ̀ de ɗaŋmɔ wan nɛ̀ tɛ́ dak fio pi̧ zu wa na, wen pɛrti ɗaŋmɔ hegɔ a̧a̧ sɛnɛ, ɓɛɛ bó nɛ́ i̧i̧ a̧‘m tɔ̧‘e, ɛ̀nɛ̀ kɔ́fí Sɔ̧ zu-a na. 17Gbina heembea lɛŋ nɛ́ ɗaŋmɔ, ɓɛɛ bó nɛ́ ɗaŋmɔ lɛŋ a̧ dak wi pi̧ tɛ́ fio na.
18Ɛ́ɛ́ iŋa'e kóó o ndé nɛ̀ Sɔ̧ koa de ɗaŋmɔ ɓɔna, wen nɛ́ Bem ko Sɔ̧ a̧ zɔk wa, ɓɛɛ Wan-ɗaŋ kpa ŋgai zu wa na.
19Ɛ́ɛ́ iŋa'e ɛ́ɛ́ nɛ́ ko Sɔ̧, ɓɛɛ o mɔɔ-zaŋnu lɛŋ dúk ɗɔɔ ŋgai ko Wan-ɗaŋ.
20Ɛ́ɛ́ iŋa'e Bem ko Sɔ̧ tɛa, ɓɛɛ ha̧ iŋamɔ h’ɛ́ɛ́, wen h’ɛ́ɛ́ mɛ́ iŋ Kpasa Wi. Ɛ́ɛ́ dúk tɛ́ Kpasa Wi sɛn tɛ̀ Bem kɔ̧-a̧ Jesu Krist. Jesu nɛ́ Kpasa Wi, a̧ nɛ́ Sɔ̧, a̧ nɛ́ duka-kpasa kpoo nɛ kpoo.
21O bem kɔ‘m, ɛ̀nɛ̀ zɔ́k tɛ‘nɛ́ wen o géé-sɔ̧.
Currently Selected:
1 JEAN 5: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.