ZAKARIAS 4
4
Ɓǝ pitǝrla
1Angelos mai mo faa ɓǝ ne me kŋ ge wo ɓe faɗa, kpiŋ me tǝgbana dǝɓ moo kpiŋ dǝɓ gin tǝ nǝmmi. 2So fii me faa: Mo kwo fẽene? Me zyii faa: Me kwo pitǝrla ma zyeɓ ne vãm kaŋnyeeri, tǝtǝl ah sǝŋ cok rǝk nǝm no gŋ, pitǝrla gŋ camcam rǝŋ, pitǝrla ah daŋ a ne cok kan wii rǝŋ rǝŋ. 3Kpuu tǝbaakãm gwa no kah pitǝrla ahe, a nǝjokǝsãh ah vaŋno, maki ah laŋ nǝjokǝlǝɓai ahe.#Caŋ 11:4 4So me fii angelos me faa: Dǝɓlii, kpuu tǝbaakãm marai uu ɓo ka joŋ fẽene? 5Zyii zah ɓe faa: Mo tǝ ya ne? Me zyii faa: Me tǝ ya dǝɓlii.
Masǝŋ faa ɓǝ nyi Serubabel
6Angelos faa nyi me: Mo faa ɓǝ mai Dǝɓlii mo faa ɓo nyi Serubabel. Dǝɓlii faa: Ɓǝ ah ka ne swah ruu sal a, ka ne swah suu ɓo ya ta. Amma sai ne swah mai moo ga gee wo ɓe ge to.#Ezr 5:2 7Fan ma cak fahlii, a ga fiŋ pel ɓo ga lalle. Mo ga vuu yaŋ ɓe, mo ga kan tǝsal malii ah ma fahfal tǝ lii ah gŋ, za ga ɓyaŋra ɓǝ faa: Kai, a pǝsãh ɗii ne!
8Dǝɓlii so faa ɓǝ maki ah nyi me faɗa, 9faa: Serubabel kpii mor yaŋ ɓe, ako ye ga vuu yaŋ ah rwǝ̃ǝ ta. Ne cok fan ah mo joŋ ɓe, za ɓe ga tǝra, ame ye pee mo ɓo wo ɓǝǝra. 10Syẽara tǝtǝŋ mor fan malaŋ tǝ biŋ ah mo tǝŋ ɓo. Amma ne cok mo kwora Serubabel kal ɓo pel ɓǝ vuu yaŋ ɓe ɓe, a ga laara pǝ'nyahre.#Caŋ 5:6
Cuura mor ɓǝ fakwan pitǝrla
Angelos faa nyi me: Pitǝrla matǝ rǝŋ ara ye nahnǝn Masǝŋ matǝ rǝŋ mai moo kwan cok tǝ sǝr ne lii ah daŋ. 11So me fii ko: Kpuu tǝbaakãm matǝ gwa ma kah pitǝrla mǝ ah ɓǝ ah a cuu fẽene?#Caŋ 11:4 12Me so fii kpǝ: Jol kpuu tǝbaakãm matǝ gwa mo kah kyaŋ fan ma ne vãm kaŋnyeeri, mai nǝm tǝbaakãm moo ɗuu gŋ a 'yah cuu ɓǝ fẽene? 13So fii me faa: Mo tǝ mor ɓǝ ah ya ne? Me zyii faa: Me tǝ ya dǝɓlii. 14So faa nyi me: Mai a cuu za matǝ gwa mai Masǝŋ mo syen ra ɓo mo syee nǝm tǝ ɓǝǝ mor ka joŋ yeɓ nyi ko, Dǝɓlii sǝr daŋ yo.
Bible Moundang © Alliance Biblique du Tchad, 1996.