ZAKARIAS 2
2
Ɓǝ suu lii fanne
1Pǝ fakwan maki ahe, me kwo dǝɓ ki ne suu lii fan jol ahe. 2Me fii ko faa: Mo ga joŋ fẽe ne ne? Zyii zah ɓe faa: Me ga lii yaŋ Jerusalem ne ko, ka me ẽe wah ah ne 'ah ahe.
3So me kwo angelos mai mo faa ɓǝ nyi me syee kal ge lalle, angelos maki ah ge ka zyaŋ ne ki. 4Ma kǝpel kŋ faa nyi maki ahe: Mo ɗuu mo ge faa nyi we tǝbanna ŋhaa sye: Yaŋ Jerusalem ka ga yea ne ɓaale yao, mor dǝfuu ne faɓal daŋ a ga yea gŋ pǝlli. 5Mor Dǝɓlii ne suu ah faa, zye ga yea tǝgbana ɓaale wii, zye ga ryaŋ yaŋ ah ka byakke, zye ga kaa gŋ ne yǝk 'min daŋ.
Ɗiira za ma pǝ byak ka mo soora ge yaŋ
6-7Dǝɓlii faa nyi zan ahe: Ame myah we ge ɓo pǝ laa sǝr nai daŋ, amma awe za mai we pǝ sǝr Babilon, we ɗuu gin gŋ pii soo ge yaŋ Jerusalem.
8Koo zune mo juu we ɓe, ka dǝɓ ah juu pãa nahnǝn ɓe ɓo. Fahfal fakwan ah ra, Dǝɓlii ma ne swah daŋ pee me ne ɓǝ ka faa nyi za mai moo ɗaŋra zan ahe: 9Dǝɓlii ne suu ah a ga ruu sal ne we, za mai we yea tǝ ɗaŋ ra, wee gbah ra ciŋ byak ɓiiri, a ga ɗaŋra we. Ne cok fan ah ra mo joŋ ɓe, zune daŋ a ga tǝ, Dǝɓlii ma ne swah daŋ ye pee me ɓo.
10Dǝɓlii faa: Awe za yaŋ Jerusalem we ɗǝǝ lǝŋ ne laa pǝ'nyahre, mor ame tǝ gin ka kaa kǝsyil ɓiiri.
11Ne cok ah za camcam a ga gera wo Dǝɓlii, a ga ciŋra zan ahe, Dǝɓlii ga kaa kǝsyil ɓiiri, so we ga tǝ, ako ye pee me ge ɓo wo ɓiiri. 12So Dǝɓlii ga kaa ne Yuda faɗa, tǝgbana faren ah pǝ sǝr matǝdaŋdaŋ ahe, Jerusalem ga yea yaŋ mai Dǝɓlii mo tǝ 'yah pǝlli.
13Awe za daŋ, we yea zah pel Dǝɓlii, mor Dǝɓlii tǝ pǝ̃ǝ gin pǝ cok kal ah matǝdaŋdaŋ gin wo mana.
Bible Moundang © Alliance Biblique du Tchad, 1996.