TITUS 3
3
Syel eklesia
1Mo ur ɓǝ mai wo ɓǝǝ ka mo soɓra suu ɓǝǝ mor zaluu tǝkine za mai mo ne swah jolle, ka mo laara zah ɓǝǝra, ka mo kaara ne ɓal ma joŋ yeɓ sãh daŋ. 2Mo lai ra ka mo faara ɓǝɓe' tǝ dǝɓ ka, amma mo kaara jam ne za daŋ tǝkine ɓǝ 'nyahre, cẽecẽe mo yeara ne wonsuu wo za daŋ. 3Mor ana ne suu man laŋ pǝtãa na yea pǝ tǝgwĩi ta, na ka laa zah ya, na joŋ faɓe', ana ye yea byak fan cwaani, tǝkine 'yah suu camcam daŋ, na yea kaa ɓo pǝ faɓe' tǝkine ɓǝr ɓe', za ki mo syiŋ na ɓe, na syiŋ ra laŋ ta. 4Amma ne cok mai Masǝŋ pa ǝ̃ǝ man mo ge cuu ɓǝ sãh ah mo joŋ ɓo tǝkine 'yah ah moo 'yah dǝfuu, 5ako ye ǝ̃ǝ na, ka mor na joŋ yeɓ masãh ɓo laŋ ya, amma mor kwo syak ɓo tǝ mana. Ə̃ǝ na ne er bii ma byaŋ na pǝfuu, tǝkine fer kal man ne Tǝ'yak Matǝdaŋdaŋ. 6Mor Masǝŋ rǝk Tǝ'yak Matǝdaŋdaŋ ge tǝ man pǝlli ne Yesu Kristu pa ǝ̃ǝ mana, 7ka na yea njaŋ pel Masǝŋ mor gboŋgboŋ ah mo joŋ ɓo, ka na lwaa cee ma ga lii mai na tǝ byakke. 8Ɓǝ mai goŋga yo.
Me 'yah mo swaa ɓǝ ah pǝswahe, mor ka za mai mo nyiŋra ɓǝ Masǝŋ ɓo, mo yeara ne joŋ yeɓ sãhe, mor ɓǝ ah a pǝsãhe, a gbah jol zana. 9Amma mo ɗuu ɓǝ ma tǝgwĩi ahe, ne ɓǝ kee morsǝ̃ǝ pa ɓuu lii a naino, ne syelle, tǝkine bǝǝ bal tǝ ɓǝ lai - ɓǝ ah ka ne yeɓ ya, ɓǝ kol o. 10Mo lai dǝɓ mai moo gin ne ɓǝ woŋ ki joŋ zahlǝŋ gwa, fahfal ah ka mo soɓ ko. 11Mor mo tǝ ɓe, dǝɓ ma morãi soɓ fahlii matǝ njaŋ ɓoo ɓe, mor faɓe' mai moo joŋko, a cuu dǝɓ ah zyak ɓe.
Lai ma fahfal tǝ lii
12Ne cok me pee Artemas wala Tikikus ge wo ɓo ɓe, mo kyeɓ fahlii ka mo ge lwaa me yaŋ Nikopolis, mor me tǝ ga kaa gwahl gŋ. 13Mo kyeɓ fahlii ka mo gbah jol Zenas pa tan ɓǝ lai romanen ne Apollus tǝ fahlii gwǝǝ ɓǝǝ mo tǝ gara, mor ka fan ki mo pee ra ka. 14Sai za man mo feera fahlii ka mo joŋra yeɓ masãh ah ta, mor ka mo lwaara fan ka gbah jol mai mo nǝn pǝkoŋ gbah ahe, mo kaara tǝkol ka.
15Za mai mo ne me daŋ haora zah wo ɓo. Mo haozah wo bai man ma iŋ ah ra.
Masǝŋ mo joŋ gboŋgboŋ wo ɓii daŋ.
Bible Moundang © Alliance Biblique du Tchad, 1996.