ROMANEN 13

We laa zah zaluu sǝrri

1Koo zune daŋ mo laa zah zaluu mai mo lwaara sǝr ɓo, mor swah mai mo gee wo Masǝŋ ge ya kǝka, zaluu mai mo lwaara sǝr ɓo Masǝŋ ye rǝk ra ɓo gŋ. 2Dǝɓ mo tǝ syẽa swah zaluu ɓe, ka tǝ syẽa swah mai Masǝŋ mo kan ɓo, amma za ma joŋra naiko ka tǝ kyeɓra kiita gin tǝ ɓǝǝ ne ko. 3Mor za ma joŋra yeɓ sãhe, gal zaluu ka ren ra ya, amma sai za ma joŋra ɓǝɓe' mgbaŋ. Mo 'yah ka ɗuu gal zaluu ya ɓe, mo joŋ yeɓ masãhe, mo ga lwaa sãa mor ahe. 4Mor ako laŋ a joŋ yeɓ Masǝŋ ta, mor a woo mor ɓo ka joŋ fan masãhe. Amma mo tǝ joŋ faɓe' ɓe, mo ɗuu gal ahe, mor ka ŋgoŋ kiita tǝ dǝɓ tǝkol 'wel a, mor tǝ joŋ yeɓ Masǝŋ, ka ɓaŋ kpãh tǝkine ŋgoŋ kiita tǝ dǝɓ ma joŋ faɓe'. 5Mor maiko, a pǝsãh ka dǝɓ mo laa zah zaluuri, ka mor ka ɗuu gal kpãh Masǝŋ to ya, amma mor fatan zahzyil man ta.

6Mor ahe, we sǝǝ gǝraama. Mor zaluu mai mo tǝ joŋra yeɓɓe, a joŋra yeɓ Masǝŋ ta, mor a joŋra ka yeɓ mo syee pǝsãhe.#Mt 22:21; Mk 12:17; Lu 20:25 7We soo fan mai za ma ne fahlii fii ah moo fiira jol ɓii daŋ. We sǝǝ gǝraama nyi za mai moo fiira gǝraama jol ɓiiri, we soo duwan tǝ fan mai mo cuura ɓo we ka sooni. We kee za mai mo nǝn keeni, we yii dǝɓ mai mo nǝn yiini.

We 'yah jǝk ɓiiri

8We kaa ne val dǝɓ vaŋno tǝ ɓii ka, sai we 'yah ki. Dǝɓ mo tǝ 'yah za ki ɓe, ka baa ɓǝ mai ɓǝ lai mo faa ɓo tǝɗe'. 9Ɓǝ lai faa: Mo joŋ ɓǝǝ ka, mo i wul ka, mo kiŋ nyin ka, mo cwaa fan ka. So ɓǝ lai manyeeki ah tai ɓo pǝ ɓǝ lai mai mo faa: Mo 'yah jǝk ɓo tǝgbana moo 'yah suu ɓo ta.#Pǝ̃ǝ 20:13-15,17; CuuƁ 5:17-19,21; Lew 19:18 10Dǝɓ mo ne 'yah ɓe, ka joŋ ɓǝɓe' wo jǝk ah ya. Dǝɓ mo tǝ 'yah za ɓe, ka tǝ syee mor ɓǝ lai tǝɗe'.

We zyeɓ suu ɓii mor gin Kristu

11We joŋ naiko, mor we tǝ zah'nan mai na pǝzyil ah ɓe. Mor cok mai ka we kpiŋ gin tǝ nǝm ɓii ge ɓe, mor ǝ̃ǝ ge ɓo gwari ne na zǝzǝ̃ǝ kal ma ne cok mai na nyiŋ ɓǝ cuu Kristu kǝpel ɓe. 12Suŋ tǝ kalle, zah'nan tǝ cee o, na soɓ yeɓ mai moo joŋra pǝ cokfuu, na woo fan sal mǝ cokfãi. 13Na syee pǝsãh tǝgbana za moo syee ne comme, na byak suu man wo kyẽm maɓeare, tǝǝ ne yimmi, joŋ ɓǝǝre, 'nahmme, bǝǝ balle, tǝkine tǝwonni. 14Amma we yea ne kpak mafuu mai mo tai ɓo ne Dǝɓlii Yesu Kristu, we woo fan sal mǝ ahe, we soɓ suu ɓii mai mo kǝǝ we ka dan pǝ fan cwaa ah ka joŋ 'yah ah ka.

Currently Selected:

ROMANEN 13: MUAR

Highlight

Copy

Compare