CAŊRYAŊ 2
2
Ɓǝ mai mo pee ge wo eklesia Efesus
1Mo ŋwǝǝ ɗerewol wo angelos mǝ eklesia Efesus: Dǝɓ mai mo ɓaŋ ŋwǝǝmǝŋgai rǝŋ ɓo ne jokǝsãh ahe, mai mo tǝ syee kǝsyil pitǝrla ma vãm kaŋnyeeri rǝŋ faa: 2Me tǝ fan joŋ ɓo daŋ ɓe, me tǝ bone ɓo mo laa ɓe, me tǝ rõm mai mo ne ɓe. Me tǝ ɓe, mo ka gak kaa ne za faɓe' ya, so mo lii za mai moo faara ara ye zapee, amma ara ye ka, mo lwaa ara pǝberre. 3Amo ne rõmme, mo laa bone mor ɓe, ne daŋ laŋ mo ɗuu gal ah ya. 4Amma me no ne ɓǝ tǝ ɓo, mo ka tǝ 'yah me zǝzǝ̃ǝ tǝgbana ma kǝpel a. 5Mo foo ɓǝ zyak fahlii ɓo mo zyak ɓo, mo soɓ faɓe' ɓo ra, mo joŋ yeɓ tǝgbana mai mo yea tǝ joŋ kǝpelle. Mo zyii soɓ faɓe' ɓo ra ya ɓe, me ga ge tǝ ɓo, me ga ɓaŋ pitǝrla ɓo gin pǝ cok ahe, sai ka mo soɓ faɓe' ɓo ra ɓe. 6Amma ɓǝ mai mo no wo ɓo: amo syiŋ yeɓ Nikolaitien#2:6 Yeɓ Nikolatien: Na tǝ ɓǝ yeɓ Nikolatien pǝsãh ya, za ki foora 2:2,14,20,24 faa ɓǝ ɓo tǝ yeɓ ɓǝǝra. moo joŋra ɓo, tǝgbana me syiŋ ɓo pǝlli ta.
7Dǝɓ mo ne sok ka laa ɓǝ ɓe, mo laako ɓǝ mai Tǝ'yak mo faa ɓo nyi eklesia pǝsãhe!
Za mai mo kaa kacella ɓe daŋ me ga nyi fahlii ka ren lee kpuu ma ne cee mai mo no pǝ 'wah Masǝŋ nyi ra.#Tǝŋ 2:9; Caŋ 22:2; Eze 28:13; 31:8
Ɓǝ mai mo pee ge wo eklesia Sǝmirna
8Mo ŋwǝǝ wo angelos mǝ eklesia Sǝmirna:
Dǝɓ ma kǝpelle, ma fahfalle, Dǝɓ mai mo yea wǝ ɓo, mai mo so ne cee faa:#Esa 44:6; 48:12; Caŋ 1:17; 22:13 9Me tǝ bone ɓo ɓe, me tǝ ɓǝ syak ɓo mo tǝ cuu ɓe, amma goŋga ah amo pǝkǝ̃ǝre! Me tǝ ɓǝɓe' mai za mai moo faara ara ye Yahuduen moo faara tǝ ɓo ɓe, amma so ara ye ka Yahuduen a, ara ye za mǝ Satan! 10Mo ɗuu gal bone mai mo tǝ ga laa ka. Mo laa njaŋ, Satan ga lii we, a ga rǝk za ki kǝsyil ɓii ga daŋgai, we ga laa bone gŋ zah'nan jemma. Mo uu pǝ goŋga ŋhaa zah'nan wul ɓo, me ga nyi njok ma ne cee nyi mo.
11Dǝɓ mo ne sok ka laa ɓǝ ɓe, mo laako ɓǝ mai Tǝ'yak mo faa ɓo nyi eklesia pǝsãhe!
Za mai mo kaara kacella ɓe daŋ, wul patǝ gwa ah ka ga lwaa ra ya.#Caŋ 20:14; 21:8
Ɓǝ mai mo pee ge wo eklesia Pergamum
12Mo ŋwǝǝ wo angelos mǝ eklesia Pergamum:
Dǝɓ ma ne kafahe ma ne syel tǝ ŋhǝrẽm faa: 13Me tǝ cok kal ɓo ɓe, cok ah Satan kaa ɓo gŋ ne fakal ahe, amma amo gbǝ tǝɗii ɓe ɓo mbaŋ. Koo ne cok mai mo ira Antipas pa syedowal ɓe matǝ goŋga pǝ wul kǝsyil ɓii pǝ cok mai Satan mo kaa ɓo gŋ ne fakal ah ko laŋ, mo soɓ iŋ ɓo mo nyiŋ me ɓo ɓoo ya. 14Amma fan mai me ne ɓǝ tǝ ɓo ne ɓǝ ahe: amo no ne za ki mai moo syeera mor ɓǝ cuu Bileam mai mo cuu nyi Balak ka mo kǝǝko za Israel leera pǝ faɓe' ne ren nǝǝ ma ŋgoŋ joŋ syiŋ wo masǝŋ ki ra, tǝkine joŋ ɓǝǝre.#KeeZ 22:5,7; 31:16; CuuƁ 23:4; KeeZ 25:1-3 15So mo no ne za ki kǝsyil ɓii kpǝ, zan ah a syeera mor ɓǝ cuu Nikolaitien. 16Mo soɓ faɓe' ɓo ra. Mo ka nai ya ɓe, me ga ge tǝ ɓo gwari sǝ, me ga ɗah tǝnyee ne zan ah ne kafahe ma pǝ̃ǝ pǝ zah ɓe.
17Dǝɓ mo ne sok ka laa ɓǝ ɓe, mo laako ɓǝ mai Tǝ'yak mo faa ɓo nyi eklesia pǝsãhe!
Za mai mo kaara kacella ɓe daŋ, me ga nyi manna ma muŋ ah nyi ra, me ga nyi tǝsal mafãi mai tǝɗii mafuu ah mo ŋwǝǝ ɓo tǝl ah nyi ra vaŋno vaŋno daŋ ta. Dǝɓ ma gak tan tǝɗii ah kǝka, sai dǝɓ mai mo ɗǝǝ tǝsal ah to.#Pǝ̃ǝ 16:14-15; 16:33-34; Yoh 6:48-50; Esa 62:2; 65:15
Ɓǝ mai mo pee ge wo eklesia Tiatira
18Mo ŋwǝǝ wo angelos mǝ eklesia Tiatira:
We Masǝŋ mai nahnǝn ah moo sǝǝ na mabǝlaowii, Dǝɓ mai ɓal ah mo tǝgbana vãm syẽ mai moo sǝsãh faa: 19Me tǝ fan joŋ ɓo ɓe, me tǝ 'yah ɓo, goŋga ɓo, yeɓ ɓo moo joŋni, tǝkine rõm ɓo mo ne daŋ, me tǝ yeɓ ɓo mai moo joŋ zǝzǝ̃ǝ kal ma kǝpel ɓe ta. 20Amma fan mai me ne ɓǝ tǝ ɓo ne ɓǝ ahe, ako ye mai mo soɓ mawin ma ɗii ne Jesabel moo ɗii suu ah ne profeto Masǝŋ, a cuu fan zyak za yeɓ ɓe ne ka mo joŋra ɓǝǝre, tǝkine ren nǝǝ mai moo ŋgoŋra joŋ syiŋ ne wo masǝŋ ki ra.#1 ZaG 16:31; 2 ZaG 9:22,30 21Me soɓ cok nyi ko ka mo tooko bii, amma ka tǝ zyii soɓ joŋ ɓǝǝr a. 22Mor ahe, me ga ɓoo ko tǝ ɗee bone, so me ga cuu bone nyi za mai moo joŋra ɓǝǝ ne ki pǝlli ta, sai ka soɓra yeɓ ɓe' mai moo joŋra ne ki ɓe. 23So faɗa, me ga ik wee ah pǝ wulli, ka eklesia daŋ mo tǝra ame ye pa ma tan ɓǝ foo zahzyil dǝfuu tǝkine fan 'yah ɓǝǝ daŋ. Me ga soo dǝɓ vaŋno vaŋno daŋ tǝgbana yeɓ ah mo joŋko.#Lǝŋ 7:10; 62:13; Jer 17:10
24Amma awe za eklesia yaŋ Tiatira manyeeki ah mai we ka tǝ syee mor ɓǝ cuu maɓe' mai ya, awe fee ɓǝ mai za rai moo ɗiira ne ɓǝ tǝsyeɓ Satan maɗǝk ah ya. Me faa nyi we, me ka ga kan faswaa maki ah gai we tǝtǝl a. 25Amma sai we gbǝ fan mai we no ne ko pǝswah ŋhaa me ge dai ne sõo. 26-28Za mai mo kaara kacella ɓe, so moo syeera ne joŋ fan mai mee 'yah ŋhaa vǝr ah ɓe, me ga nyi swah mai Pa ɓe mo nyi me nyi ra, me ga nyi swah nyi ra tǝ za sǝrri, a ga piira ra ne kǝndaŋ vãmme, a ga dah ra tǝgbana dǝɓ moo dah cii vuuri. Me ga nyi ŋwǝǝmǝŋgai zahmor'nan nyi ra ta.#Lǝŋ 2:8-9
29Dǝɓ mo ne sok ka laa ɓǝ ɓe, mo laako ɓǝ mai Tǝ'yak mo faa ɓo nyi eklesia pǝsãhe!
Bible Moundang © Alliance Biblique du Tchad, 1996.