Lǝŋni 78
78
Masǝŋ ne zan ahe
1Lǝŋ Asaf.
Za ɓe, we laa ɓǝ cuu ɓe,
We syii sok tǝ ɓǝ mai me tǝ ga faa ɓǝ nyi we.
2Me ga kee ɓǝ fan ma tǝsyeɓ mai mo joŋ daga ɓaaɓe nyi we,#Mt 13:35
3Ɓǝ fan mai na laa na tǝ ɓo,
Pa man lii keera ɓǝ ah nyi na.
4Na muŋ ɓǝ ah wo wee man ka,
Amma na faa ɓǝ swah Dǝɓlii ne yeɓ ah malii tǝkine fan matǝ gǝriŋ mai mo joŋko wo zahŋhǝǝtǝ̃ǝ ma fahfalle.
5Dǝɓlii nyi ɓǝ lai tǝkine ɓǝ faa ah ra nyi za Israel morsǝ̃ǝ Yakuɓ,
Nyi fahlii nyi pa man lii ra ka mo cuura ɓǝ lai ah ra nyi wee ɓǝǝra,
6Ka zahŋhǝǝtǝ̃ǝ ma fahfal mo feera ka mo so cuura nyi wee ɓǝr ɓǝǝra.
7Ne fahlii mai laŋ a ga soɓra suu ɓǝǝ wo Masǝŋ,
Ka ga yaŋra ɓǝ fan mai mo joŋko ya,
Cẽecẽe a ga syeera mor ɓǝ lai ahe.
8Ka mo yeara na pa ɓǝǝ lii mai mo ŋwoora kyaŋ mo ka laara zah ah ya ka.
A soɓra suu ɓǝǝ wo Masǝŋ,
So ɓǝ ɓǝǝ ka uu pǝ cok tǝ vaŋno ya,
Ara ye ka za matǝ goŋga wo Masǝŋ ya.
9Efraimien mai mo tǝ ruura sal ne saŋ ne guu, zah'nan ruu sal mo ge dai o, myahra ɗul kalle.
10Syelra ɓǝ gbanzah ɓǝǝ mo gbǝra ɓo ne Masǝŋ,
Zyii syeera mor ɓǝ lai ah ya.
11Yaŋra ɓǝ yeɓ mai Masǝŋ mo joŋni,
Ne dǝǝbǝǝri mai mo cuu nyi ra.
12Masǝŋ joŋ dǝǝbǝǝri pel pa ɓǝǝ lii ne nahnǝn ɓǝǝ pǝ cok Zoan sǝr Egiɓ.#Pǝ̃ǝ 7:8–12:32
13Ŋgǝ̃ǝ mabii pel ɓǝǝ so yee ne ra gŋ,
Yee zahbii uu ge sǝŋ na ɓaale.#Pǝ̃ǝ 14:21-22
14Ne com ɓe, a soɓ swãh bam syee ne ra,
Ne suŋ laŋ, a soɓ wii kal pel ɓǝǝ syee ne ra.#Pǝ̃ǝ 13:21-22
15Ŋgǝ̃ǝ pǝɗakka kǝsyicokki,
Soɓ bii ɓal gŋ ge lal nyi ra zwahe.#Pǝ̃ǝ 17:1-7; KeeZ 20:2-13
16Ŋgǝ̃ǝ el tǝ pǝɗakka,
Soɓ bii ɗuu gŋ ge lal tǝgbana tǝ ɗuu pǝ elle.
17Amma ne daŋ laŋ so kalra ne joŋ faɓe' wol ah ga pelle,
Ŋwoora kyaŋ ne Masǝŋ mayǝk kǝsyicokki.
18Liira Masǝŋ ne fii ko ka mo nyiko farel mai zahzyil ɓǝǝ mo 'yah nyi ra.#Pǝ̃ǝ 16:2-15; KeeZ 11:4-23,31-35
19Faara ɓǝɓe' tǝ Masǝŋ, faara:
Masǝŋ gak nyi farel nyi na kǝsyicok nyee no ne?
20Goŋga yo, kǝ̃ǝ pǝɗakka soɓ bii ɓal gŋ ge lal ɗuu tǝgbana tǝ ɗuu pǝ elle.
Amma a gak nyi tǝwaa tǝkine nǝǝ nyi zan ah no taa ne?
21So ne cok Dǝɓlii mo laa ɓǝ faa ɓǝǝ naiko,
Ɓoo wii tǝ zan ahe,
Ɓaŋ kpãh ne ra pǝ'manne.
22Mor ara ka ne iŋ ya,
Nyiŋra sõone a gak ǝ̃ǝ ra ya.
23Amma Masǝŋ faa ɓǝ nyi coksǝŋ ka mo soɓ zahfah ah ra gbǝrri,
24Nyi sor ma coksǝŋ nyi ra,
Pee manna ge nyi ra ka mo ryakra.
25So rera farel angeloi,
Masǝŋ nyi fan mai moo gak rera daŋ nyi ra.
26So faa nyi zyak morcomzah'nan mo kuuko,
So soɓ zyak fah morkǝsǝŋ laŋ kuu pǝ'manne,
27Pee juu ge nyi ra tǝgbana ɓǝmmi,
Tǝgbana tǝkuu zahbii.
28Leara ge pǝ cok ɗǝr ɓǝǝ kah jul ɓǝǝ mo peara ɓo.
29Masǝŋ nyi fan mai daŋ zahzyil ɓǝǝ mo ne 'yah ah nyi ra, rera kǝ̃ǝre.
30Amma ka tǝ renra ren ba,
Fan mai zahzyil ɓǝǝ mo ne 'yah ah kii ra ya ba,
31So Masǝŋ ɓaŋ kpãh tǝ ɓǝǝra,
Ik za maswah ah tǝkine wee tǝbanna Israel masãh ah daŋ pǝ wulli.
32Amma koo mo joŋ dǝǝbǝǝri pel ɓǝǝ pǝlli laŋ,
Za so joŋra faɓe' ge pelle, zyii nyiŋra ya.
33So ŋgom zah'nan cee ɓǝǝ wo sǝr pǝcõo.
Ne cok vǝr zah'nan ɓǝǝra, gaɓ malii ah ge tǝ ɓǝǝra.
34Amma ne cok mo ik za ki kǝsyil ɓǝǝ pǝ wulli,
Tǝcoŋ za ki so jinra ge wol ah ka toobii ne juupel wol ahe.
35Foora: Masǝŋ mayǝk ako ye pa byak ɓǝǝ ne pa ǝ̃ǝ ɓǝǝra.
36Amma ne daŋ laŋ, ɓǝ faa zah ɓǝǝ daŋ ber o,
Ɓǝ mai moo faara daŋ zah kol o.
37Ka joŋra fan matǝ goŋga wol ah ya,
Syelra ɓǝ gbanzah ɓǝǝ mo gbǝra ɓo ne ki.
38Amma Masǝŋ kwo syak tǝ zan ahe,
Rwah faɓe' ɓǝǝ ge lalle, vǝr ra ya.
Comki ka ɓaŋ kpãh pǝlli ya, a rõmme.
39Mor foo ara ye dǝfuu,
Ara tǝgbana zyak mai moo kuuni a kalle.
40Ne cok ara mo kǝsyicokki, comki a ŋwoora kyaŋ ne ki,
Comki a ɓeɓra zahzyil nyi ko.
41Cẽecẽe a liira Masǝŋ a kǝǝra Dǝɓ matǝdaŋdaŋ Israel ɓaŋ kpãhe.
42A yaŋra ɓǝ swah ahe,
A yaŋra ɓǝ zah'nan mai mo ǝ̃ǝ ra gin mor jol za syiŋ ɓǝǝ ne ko,
43Ne mai mo joŋ yeɓ malii ah tǝkine dǝǝbǝǝri pǝ cok Zoan sǝr Egiɓ.
44Fer bii pǝ el ɓǝǝ ciŋ syimmi,
Za sǝr Egiɓ gak zwahra bii pǝ el ɓǝǝr a.#Pǝ̃ǝ 7:17-21
45Pee kŋ lwǝǝ suu ge kǝsyil ɓǝǝ lwǝǝ ra,
Pee manjaktǝril ge gaɓ ra,#Pǝ̃ǝ 7:26–8:2,16-20
46Pee tǝcwãa ka mo re fan 'wah ɓǝǝra,
Tǝkine tǝzyee ka mo ɓeɓ 'wah ɓǝǝra.#Pǝ̃ǝ 10:12-15
47Tǝ syaŋ ge sǝŋ ɓeɓ kpuu vin ɓǝǝ ne ko,
Soɓ syaŋ maluu ah tǝ ge ɓeɓ kpuu wuu ɓǝǝra.#Pǝ̃ǝ 9:22-25
48Pee syem ge ik dǝǝ ɓǝǝ ta,
So ɓyaŋ bam ge ik ŋgaɓ fan ɓǝǝra.
49Ɓaŋ kpãh tǝ ɓǝǝ pǝ'manne,
Soɓ bone ge tǝ ɓǝǝ pǝlli,
Pee angeloi ge ik ra.
50Ɓaŋ kpãh tǝ ɓǝǝ pǝ'manne,
Gak rõm ka soɓ ra ne cee yao,
Amma ik ra ge lal ne bone.
51Ik welii ma ɓǝr yaŋ za sǝr Egiɓ daŋ ge lal pǝ wulli.#Pǝ̃ǝ 12:29
52So zaŋ zan ah pǝ̃ǝ ne ra tǝgbana pakǝpii fanne,
Byak ra kǝsyicokki.#Pǝ̃ǝ 13:17-22
53Byak ra jam, ɗuura gal a.
Amma mabii jǝŋ ge tǝ za syiŋ ɓǝǝra.#Pǝ̃ǝ 14:26-28
54Woo ra kal ge pǝ sǝr ah matǝdaŋdaŋ ne ko ge rǝk ra tǝwaa mai ako ne suu ah mo nyiŋ ne swah ahe.#Pǝ̃ǝ 15:17; Jos 3:14-17
55Nĩi za sǝr ah pel zan ah ge lalle,
So wom sǝr ah nyi ban Israel ra, haira gŋ.#Jos 11:16-23
56Amma so ŋwoora kyaŋ ne Masǝŋ mayǝkki,
Liira ko, zyii syeera mor ɓǝ lai ah ya.#ZaL 2:11-15
57Ŋwoora kyaŋ ne ki,
Joŋra fan ma bai goŋga ah wol ah tǝgbana pa ɓǝǝ lii ra ta,
Ara tǝgbana saŋ mai mo rãa ɓo dǝɓ mo ka gak 'nǝǝ pǝsãh ya.
58A joŋra ko ɓaŋ kpãh ne cok joŋ syiŋ wo masǝŋ ki ɓǝǝra.
A urra zahzyil ah joŋ tǝwon tǝ ɓǝ masǝŋ ki ɓǝǝra.
59Ne cok Masǝŋ mo kwo nai ɓe, a ɓaŋ kpãhe,
So a soɓ zan ah myahe.
60Soɓ cok kal ah mai mo kaa ɓo gŋ kǝsyil dǝfuu yaŋ Silo#78:60 Silo: ye cok mai za Israel mo yea tǝ juura pel wo Masǝŋ gŋ kǝpel ka David ɓah kaa goŋ ya ba. ɓoo.#Jos 18:1; Jer 7:12-14; 26:6
61Soɓ za syiŋ ah nyiŋra sunduku gbanzah mai dǝɓ moo kwan swah ah ne yǝk ah gŋ.#1 Sa 4:4-22
62So ɓaŋ kpãh tǝ zan ahe,
Soɓ za syiŋ ɓǝǝ ik ra pǝ wulli.
63Ikra wee tǝbanna pǝ wul zah salle,
Wee maŋwǝǝ lwaara wǝǝ ka kan a.
64Ikra za joŋzahsyiŋ ge lal ne kafahe,
So ŋwǝǝ ɓǝǝ lwaara cok ka yeyee wul ɓǝǝr a.
65So fahfal ah Dǝɓlii kpiŋ tǝgbana dǝɓ mai mo yea nǝnǝm ɓo,
Tǝgbana dǝɓ mai yim mo tǝ tǝǝ ko ɓe moo joŋ fan ne ne swahe.
66Yee zah za syiŋ ah jin nǝfalle,
Swãa ga re ra ga lii ga lii.
67Dǝɓlii ɓoo morsǝ̃ǝ Yuseɓ#78:67 Morsǝ̃ǝ Yuseɓ: a cuu zahban Efraim tǝkine zahban Manasse. ge lalle,
Zyii nǝǝ ban Efraim ya,
68Amma neǝ ban Yuda ne waa Sion mai moo 'yah pǝlli.
69So vuu yaŋ ah gŋ tǝgbana yaŋ ah mai mo coksǝŋ,
Joŋ uu ɓo pǝswah tǝgbana sǝr mo uu ɓo, a ga yea jam ga lii.
70Dǝɓlii nǝǝ dǝɓ yeɓ ah David,
Ɗii ko gin cok pii pǝsǝ̃ǝ tǝkine wee pǝsǝ̃ǝre,#1 Sa 16:11-12; 2 Sa 7:8; 1 KeeƁ 17:7
71Ɓaŋ ko kan goŋ ne tǝ za Israel ka mo piiko za Masǝŋ.
72So David pii ra ne zahzyil vaŋno, gbǝ ra pǝsãhe.
Bible Moundang © Alliance Biblique du Tchad, 1996.