ƁƏ TƏƁOROO 24
24
-19-
1Mo cwaa fan joŋ za faɓe' ka, mo kyeɓ ka joŋ bai ne ra ka ta. 2Mor zahzyil ɓǝǝ a foo ɓǝ ma ɓeɓ cokki, a yeara ma ne faa ɓǝ ma ɓeɓ zahzyil dǝɓ ciicii.
-20-
3Dǝɓ zyeɓ kal yaŋ ne fatanne, yella yee joŋ ka mor ah mo kpii pǝsãhe. 4Ɓǝ foo yee joŋ ka fan masãh ah mo baa ɓǝr yaŋ kǝrkǝr.
-21-
5Dǝɓ ma ne fatan kal dǝɓ mai mo pǝswah ɓe, oho, fatan kal swah ne yǝk ɓe. 6Kǝpel ga ruu salle, sai mo zyeɓ ɓǝ kan ɗǝ, yella masãh ah mai mo lwaa ɓo, a ga joŋ ka mo kaa kacella.
-22-
7Fatan sye, ɓǝ ah a yea ma wo tǝgwĩi pǝɗǝk no cam, ka gak laa mor ah ya. Za mo tǝ faa ɓǝ tǝ fan masãh ah ɓe, ka yea ne ɓǝ faa ma syak ah gŋ ya.
-23-
8Dǝɓ mai moo yea ma ne foo ɓǝɓe', ako ye pa kǝǝ ɓǝ ur kǝsyil zana. 9Ɓǝ foo mai tǝgwĩi moo fooni, faɓe' yo. Dǝɓ mai moo yea ma ne tǝǝ zana, za syiŋ ko.
-24-
10Ne cok zah'nan gaɓ mo lwaa mo, ɓǝ ah mo jok mo ɓe, ka tǝ ga i mo ga lal pǝ wulli.
-25-
11Ne cok mo kwo za mo gbahra za ki ka ga ik ga lal pǝ wul ɓe, mo ǝ̃ǝ ra. 12Mo faa, ɓǝ ah saaŋ mo ya ɓe, Masǝŋ tǝ ɓǝ ah ɓe, a ga ŋgoŋ kiita tǝ ɓo, mor ako tǝ ẽe mo no, tǝ ɓǝ ah ɓe, a ga soo za daŋ tǝgbana fan joŋ ɓǝǝra.
-26-
13We ɓe, mo re tǝnjwǝǝre, mor a pǝ'nyahre. Manǝm tǝnjwǝǝ mai moo ɗuu reɗɗeɗee, a ga yea pǝ zah ɓo pǝ'nyahre. 14Fatan tǝkine yella a pǝsãh mor mazwãhsuu nai ta. Mo kyeɓ ka mo yea ne ko, mo ga tǝ ɓǝ kal ɓo ma pel pǝsãhe.
-27-
15Mo lal ka kiŋ fan dǝɓ matǝ njaŋ ah wala ka ɓeɓ yaŋ ah ka, mo joŋ nai ɓe, faɓe' yo. 16Mor ne cok dǝɓ matǝ njaŋ mo lee ɓo laŋ, a so ur sǝŋ kpǝ. Amma mǝ za faɓe' ɓeɓ ga ge tǝ ɓǝǝ a vǝr ra.
-28-
17Ne cok gaɓ mo ge tǝ pa syiŋ ɓo ɓe, mo 'nyah suu ne ɓǝ ah ka. 18Mor mo joŋ nai ɓe, Dǝɓlii ga tǝ ɓǝ ahe, ka ga laa pǝ'nyah ne mo ya, maki ka ga ŋgoŋ kiita tǝl ah ya.
-29-
19Mo soɓ za faɓe' mo joŋra mo swaa ɓǝ ka, mo cwaa fan joŋ ɓǝǝ ka ta.#Lǝŋ 31:1; 73:3; ƁǝT 3:31; 23:17 20Dǝɓ faɓe' tǝ zah'nan tǝ'nan a, ka ne fan byak pel a.
-30-
21We ɓe, mo ɗuu Masǝŋ, mo so ɗuu goŋe, mo tai ki ne za mai moo ŋwoora kyaŋ ne ra ka. 22Mor ɓeɓ ga ge tǝ ɓǝǝ gwari, azu ye tǝ ɓǝ gaɓ mai Masǝŋ wala goŋ moo ga ge tǝ ɓǝǝ ne ne?
Ɓǝ fatan manyeeki ahe
23Ɓǝ mai za fatan mo faara faɗa a naiko: Joŋ za pǝ kiita camcam ka pǝsãh ya. 24Lakaali mo faa, dǝɓ ma bai faɓe' ako ye pa ɓǝɓe' ɓe, za daŋ ga tǝǝra lakaali ahe, a ga syiŋra ko ta. 25Lakaali mo ŋgoŋ kiita tǝ pa ma joŋ ɓǝɓe' ɓe, za ga laa pǝ'nyah ne ki, a ga sãara ko.
26Ɓǝ ma zyii zah dǝɓ ne fahlii goŋga, ɓǝ ah a cuu ara ye bai wo ki.
27Mo zyeɓ 'wah ɓo vǝr kǝpel ɗǝ, ka mo tǝ mo no ne fan ka kaa ne ko, ka fahfal ah mo vuu yaŋ ba.
28Mo joŋ syedowal ber tǝ jǝk ɓo ka faa ɓǝɓe' tǝl ah bai mor ka. 29Mo faa sõone zye ga joŋ ɓǝ wol ah tǝgbana mai mo joŋko wo 'min ta ka.
30Comki me ge kyãh pǝ 'wah vǝǝkoi ma bai tǝtǝlli. 31Me kwo waa tǝkine fãa maɓea ah luu ɓo gŋ pǝlli, tǝsal mai mo lǝǝ ryaŋ zah lao ah ɓo ne ko, hal ge ɓo sǝŋ. 32Ame ẽere, me foo ɓǝ ahe, me so fee fan gŋ. 33Mo kaa lao jol ge tǝ ki kaa ne ko, mo waa nǝmmi, mo nǝnǝm o.#ƁǝT 6:10-11 34Amma syak gin cak zah ɓo tǝgbana za kaafuu moo cak zah dǝɓ ne fan salle.
Bible Moundang © Alliance Biblique du Tchad, 1996.