ƁƏ TƏƁOROO 21
21
1Dǝɓlii a byak ɓǝ foo goŋ tǝgbana moo byak bii syee pǝ el ta. A soɓ syee ga kẽne daŋ tǝgbana mo 'yahko. 2Mo gak foo, fan mai mo tǝ joŋ daŋ a njaŋ, amma mo tǝ, Dǝɓlii ye pa ma lii ɓǝ ɓo. 3Joŋ fan masãh ah ne matǝ njaŋ ahe, a 'nyah suu Dǝɓlii kal ŋgoŋ fan mai moo joŋ syiŋ wol ah ne ɓe.#1 Sa 15:22; Lǝŋ 51:18; Esa 1:11; Hos 6:6 4Fan cwaa suu za faɓe' tǝkine ɓǝɓe' ɓǝǝ kaa swah ɓo tǝ ɓǝǝra.
5Mo foo ɓǝ ne yella ɓe, mo ga lwaa fan pǝlli. Amma mo joŋ yeɓ ne hǝǝ gbǝrgbǝr ɓe, mo ka ga lwaa fan pǝlli ya. 6Joŋ mai mo lwaa ne fahlii tǝ vǝrvǝr a ga vǝr gwari, a ga ciŋ wul ɓo ta. 7Ɓǝɓe' za faɓe' a jin ŋgoŋ kiita tǝ ɓǝǝra, mor ka zyiira joŋ fan matǝ njaŋ ah ya. 8Za ma joŋra faɓe' a syeera fahlii ma rǝrãa ahe, amma za ma bai ɓǝɓe' a joŋra fan matǝ njaŋ ahe. 9Pǝram ga kaa pǝ sululu, kal ma kaa ɓǝr yaŋ tǝ vaŋno ne mawin ma 'yah bal lii ɓe.
10Za faɓe' a yeara ma ne koŋ ka joŋ ɓǝɓe' cẽecẽe, ka kwanra syak tǝ zan a. 11Ne cok mo ŋgoŋra kiita tǝ yii suu ɓe, dǝɓ ma bai tǝtǝl a fee fan gŋ. Dǝɓ ma tǝtǝl laŋ a ga nyiŋ ɓǝ fan mai mo cuura ɓo nyi ko. 12Dǝɓ matǝ njaŋ mo kwo gaɓ mo ge tǝ za faɓe' ɓe, ɓǝ ah a cuu fan nyi ko.
13Mo ka tǝ zyii laa yee pa syak mo tǝ fii mo ne ya ɓe, Dǝɓlii ka ga laa yee ɓo ya ta. 14Dǝɓ ki mo tǝ joŋ kpãh ne mo ɓe, mo ɓaŋ fan nyi pǝ muŋ 'yaŋ ɓe, fan nyi ah ga wuu kpãh ahe. 15Ne cok kiita mo tǝ ŋgoŋ pǝsãh ɓe, za matǝ njaŋ ah a ga laara pǝ'nyahre, amma za faɓe' a ɗuura ma ɓǝǝ gal ɓǝ ahe.
16Dǝɓ mai mo soɓ fahlii fatan ɓoo ɓe, in zah ah a ga wuu. 17Dǝɓ mai moo kyeɓ fan ma 'nyah suu ah to to, moo 'yah yim tǝkine nãa 'nyahre, a ga ciŋ pa syakke. 18Za faɓe' a ɓaŋra gaɓ mai moo kyeɓra ka mo ge tǝ za matǝ njaŋ pii soo gin tǝ suu ɓǝǝ ne ko. 19Pǝram ga kaa kǝsyicok lal kal ma kaa ne mawin ma 'yah bal lii tǝkine kyãh ɓǝ nyee ɓe. 20Za matǝ njaŋ a kaara ne fan ɓǝǝ jam, amma za faɓe' mo lwaara fan ɓe, a ɓeɓra vǝr belbel sǝ.
21Mo kwo syak tǝkine joŋ ɓǝ sãh wo zana, mo ga nǝn wo sǝrri, za ki ga yiira mo, a ga joŋra mo pǝsãhe. 22Dǝɓ ma ne tǝtǝl a gak re yaŋ mai sooje maswah ah mo gŋ, a ga dah ɓaale mai zan ah mo lǝŋra a ga ǝ̃ǝ ra ga sǝŋ tǝɗe'. 23Mo 'yah ka gaɓ mo lwaa mo ya ɓe, mo byak ɓǝ faa zah ɓo moo faani.
24Dǝɓ ma syẽa suu ako ye dǝɓ ma yii suu ahe, mor a 'yah suu ah pǝlli. 25Dǝɓ ma vǝǝkoi mai mo ka zyii joŋ yeɓ ya, ka tǝ in suu ah pǝ wulli. 26Mo tǝ joŋ fan ɓe daŋ, a foo ɓǝ fan mai zyee lwaa to. Amma dǝɓ matǝ njaŋ mo tǝ ga nyi fan ɓe, a syel jol ne nyi ah wat. 27Dǝɓlii a syiŋ joŋ syiŋ mai za faɓe' moo joŋra wol ah syiŋ. Kal daŋ ah za mai moo joŋra ne ɓǝ foo maɓe' ahe.
28Dǝɓ mai moo joŋ syedowal berre za ka ga nyiŋ ɓǝ faa ah ya, amma dǝɓ ma faa goŋga za ga nyiŋ ɓǝ faa ahe. 29Dǝɓ matǝ njaŋ a gban suu ahe, amma dǝɓ faɓe' a joŋ fan tǝgbana mai mo 'yahko. 30Koo dǝɓ vaŋno mai moo gak kwo suu ah zye tǝ fan ɓo, zye tǝ ɓǝ ɓo pǝlli ka mo gak syesyel ne Dǝɓlii kǝka. 31Mo gak baŋ pǝr mor ka ga ruu sal ne ko, amma Dǝɓlii ye pa ma nyi swah nyi mo ka mo nĩi sal ahe.
Bible Moundang © Alliance Biblique du Tchad, 1996.