FILIPIEN 2
2
Wonsuu tǝkine yǝk Kristu
1Iŋ ɓii we nyiŋ Kristu ɓo joŋ we pǝswah ɓe ne? 'Yah ah swaa zahzyil nyi we ɓe ne? We tai ki ɓo ne Tǝ'yak Matǝdaŋdaŋ no ne? We yee syak tǝkine kwan syak tǝki no ne? 2So me fii we ka we joŋ me laa pǝ'nyah pǝlli ne ɓǝ 'nyah ɓii wo ki, we yea ne 'yah tǝ vaŋno, we tai ki ne zahzyil tǝ vaŋno, ne ɓǝ foo tǝ vaŋno. 3We joŋ fan ne tǝ'yak bal wala ne yii suu makol ka. Amma we wonsuu ɓii wo ki, zune daŋ mo kwoko tǝgbana za ki kal zye ɓe. 4Dǝɓ mo kyeɓko fan sãh mor suu ah to ka, amma mo fooko ɓǝ ah mǝ za ki ta. 5We yea wo ki ne ɓǝ foo mai mo gee wo Kristu ge. 6Mor cẽecẽe Kristu ne kpak Masǝŋ, amma kyeɓ fahlii ka yea zahki ne Masǝŋ ɓo ka ne swah ya. 7Amma ako ye soɓ ne suu ahe, so ɓaŋ kpak suu dǝɓ yeɓɓe, ge tǝgbana dǝfuu, so jur dǝfuu. 8Ako ye 'yah wonsuu ahe, laa zah ŋhaa ge pǝ wulli, wul ah mo wǝ tǝ kpuuceere. 9Mor ah Masǝŋ yii ko ge sǝŋ pǝyǝkki, nyi tǝɗii mai mo kal tǝɗii daŋ nyi ko, 10mor ka fan ma ne cee mai mo no coksǝŋ, ne ma tǝ sǝrri, tǝkine ma mor sǝr daŋ#2:10 Ma mor sǝr daŋ: Cok mai za wul mo gŋ yo. mo keara ge sǝŋ ne zahciŋɓal ka yii tǝɗii Yesu.#Esa 45:23 11A ga faara ne zah ɓǝǝ daŋ Yesu Kristu ye Dǝɓlii mor yǝk Masǝŋ Pamme.
We sǝǝ wo sǝr tǝgbana cokfãi
12Mor ahe, za 'yah ɓe, tǝgbana cẽecẽe we yea tǝ laa zah ɓe ne cok me yea wo ɓiiri, koo zǝzǝ̃ǝ me ka wo ɓii ya laŋ, a pǝsãh ka we so laa zah ɓe pǝlli faɗa, we joŋ yeɓ tǝ fahlii ǝ̃ǝ ɓii ne ɗuu gal ŋhaa mo vǝr ne sõo. 13Mor Masǝŋ ye pa joŋ ah pǝzyil ɓii ga pelle, mor ka mo joŋ we yea ne 'yah ka we gak joŋ yeɓ ah tǝkine laa zah ahe.
14We joŋ fan daŋ bai mgbǝr ɓǝ, bai syesyelle, 15mor ka we yea bai ɓǝɓe', bai 'nahmme, tǝgbana wee Masǝŋ mo bai ɓǝ ki tǝtǝl ɓǝǝ kǝsyil za ma bai goŋga ne za maɓe' wo sǝr maino. We sǝǝ kǝsyil ɓǝǝ tǝgbana ŋwǝǝmǝŋgai sǝŋ,#CuuƁ 32:5 16we cuu ɓǝ ma ne cee nyi ra. We tǝ joŋ nai ɓe, me ga lwaa fahlii ka yii suu ɓe ne ɓǝ ɓii ne zah'nan gin Kristu, mor ɓǝ ah a na fan ma ga cuu yeɓ ɓe tǝkine gaɓ ɓe daŋ ka tǝkol a.
17Koo syim suu ɓe moo ɗuu na mǝ fan ma nyi mor joŋ syiŋ pǝ cok joŋ syiŋ mor iŋ ɓii wo Masǝŋ ɓe laŋ, me laa pǝ'nyahre, awe daŋ, we ga laa pǝ'nyah ne me. 18Nai ta, awe laŋ we laa pǝ'nyah ne me cok vaŋno.
Timoteus ne Epafroditus
19Dǝɓlii Yesu mo 'yah ɓe, me tǝ foo ka me pee Timoteus ge wo ɓii gwari, mor ka me swaa zahzyil ɓe ne ɓǝ mai me ga laa tǝ ɓiiri. 20Me ka ne dǝɓ maki ah nyee mai mo ɓyaŋ ki ɓo ne me, moo foo ɓǝ ɓii ne goŋga na ko ya. 21Kǝlii za ki daŋ tǝ foora ɓǝ yeɓ suu ɓǝǝra, ka tǝ foora ɓǝ ah mǝ Yesu Kristu ya. 22Awe ne suu ɓii we tǝ ɓǝ Timoteus mo cuu dǝɓ tǝ goŋga suu ah ge lal ɓe, tǝkine mai mo joŋ yeɓ mor Ɓǝ'nyah ne me, a ne me tǝgbana wel moo joŋ fan ne pamme. 23Me laa mor ɓǝ mai mo tǝ ga joŋra wo ɓe njaŋ ɓe, me ga pee ko ga wo ɓii gwari. 24Dǝɓlii mo zyii ɓe, me tǝ foo ka ga ẽe we gwari.
25Ame foo a pǝsãh ka me pee naa pa man Epafroditus mai mo tǝ joŋ yeɓ tǝkine ruu sal ne me, mai awe ne suu ɓii we pee ko ge ne fan gbah jol mai me ne 'yah ahe. 26A ne koŋ ka so ga kwan we daŋ, tǝ foo ɓǝ pǝlli, mor we laa yea ne syemme. 27Oho, yea ne syemme, coŋ kǝnah biŋ ka wunni, amma Masǝŋ so kwo syak tǝl ahe, kwo ɓo ka tǝl ah to ya, amma kwo ɓo tǝ ɓe ta, mor ka ɓǝ foo malii mo so ɓoo ge pel tǝtǝl ɓe ka. 28Me ne 'yah ka pee ko ga wo ɓii gwari, mor ka ne cok we ge kwo ko ɓe, we so laa pǝ'nyahre, ɓǝ foo ma ɓe laŋ ga myah ta. 29We nyiŋ ko ne laa pǝ'nyah tǝgbana we pam matǝ goŋga tǝ fahlii Dǝɓlii. We yii za ma morãiko. 30Mor coŋ kǝnah biŋ ka wun mor yeɓ Kristu, nyi cee suu ah mor ka gbah jol ɓe pǝ cok ɓiiri.
Bible Moundang © Alliance Biblique du Tchad, 1996.