KEE ZANA 6
6
Ɓǝ lai ma mor Nasirien
1Dǝɓlii faa nyi Mosus: 2Mo faa nyi za Israel sye: Koo mo dǝwor o, wala mo madǝwin o, mo gbǝko zah ka ciŋ Nasiriyo ɓe, mo nǝǝko suu ah mor Dǝɓlii ɓe, 3ka mo zwǝko bii lee kpuu vin ka, mo zwǝko yim ka ta, mo zwǝko fazwan mai mo joŋra ɓo ne bii lee kpuu vin ka, wala mo zwǝ fazwan ma tǝǝ dǝɓ manyeeki ah ra ka. Mo re lee kpuu vin mapǝ̃ǝ ah wala mayak ah ka.#Lu 1:15 4Ne cok mai mo soɓ suu ɓo na Nasiriyo, mo reko fan mai mo gee wo kpuu vin ge ka, koo mo nah kpuu vin o, wala mo dah lee kpuu ah yo daŋ.
5Ne cok mai mo gbǝko zah ɓo ka yea Nasiriyo, mo saŋko rĩi ah wala mo sõo ge lal ka. Ne cok daŋ ka nyi suu ah ɓo mor Dǝɓlii, mo soɓko rĩi tǝtǝl ah ne pyaŋ ah giŋ pǝwahe. 6Ne cok mai mo nyiko suu ah ɓo mor Dǝɓlii, mo geko wo wul gwari ka. 7Koo pah ah ye mo wǝ ɓo, mo mah ah yo, mo naa mah ah mawor ne mawin o daŋ, mo iiko suu ah ne ga wo wul gwari ka, mor rĩi tǝtǝl ah a no na fan ma cuu, nyi suu ah ɓo nyi Masǝŋ. 8Pǝ zah'nan mai ako ye mo Nasiriyo, a ga yea pǝsãh pel Dǝɓlii.
9Ne cok dǝɓ ki mo wǝ ne pel gwari nai sǝ kah Nasiriyo ɓe, ka rĩi ah mai Dǝɓlii moo kwan pǝsãh kŋ ii ɓe, sai ka mo so kaako byak zah'nan rǝŋ, ka mo so sõoko rĩi tǝtǝl ah ne pyaŋ ah ge lalle. Mo joŋ nai ɓe, ka so nǝǝ ɓe. 10Ne zah'nan nama ah ka mo wooko matǝvaakol gwa, wala wee matǝvaawandala gwa ge wo pa joŋzahsyiŋ ne ko zahfah tal mbǝro ma taini. 11Pa joŋzahsyiŋ mo joŋko syiŋ ma rwah faɓe' ga lal ne vaŋno, ka maki ah laŋ mo joŋko syiŋ suŋwii ne ko. Nai ɓe, a ga vãh ɓǝɓe' ah ga lalle. Mor ii suu ah ɓo ne fahlii mai mo juuko wul ɓo. Ka com ah sǝ ta, mo joŋko tǝtǝl ah daŋdaŋ. 12Ka mo so nyiko suu ah na Nasiriyo pel Dǝɓlii faɗa. Mor ne cok ah ma kǝpel mo yea joŋko suu ah ɓo daŋdaŋ ɓǝ ah ɓeɓ ɓe, rĩi tǝtǝl ah ii ɓe, sai mo so ɓaŋko we pǝsãhm mai mo joŋ syii ɓo vaŋno ge ne ko, ka mo joŋra syiŋ ne ka soo tǝ ɓǝɓe' ah ne ko.
13Ne cok zah'nan mai Nasiriyo mo gbǝ zah ɓo tǝ ɓǝ ah mo baa ɓe, ka mo geko zahfah tal mbǝro ma taini.#Yeɓ 21:23-24 14Ka mo geko pel Dǝɓlii ne faɓal ma suu sãh ah sai: we pǝsãhm mawor ma joŋ syii vaŋno, mor ka joŋ syiŋ suŋwii ne ko, ne we pǝsãhm matam mai mo joŋ syii ɓo vaŋno, ka joŋ syiŋ ma ɓaŋ faɓe' ga lal ne ko, tǝkine kǝbǝr gŋ vaŋno, ka joŋ syiŋ ma nyi jam ne ko. 15Ka mo so geko ne tǝwaa mai sum ah mo wãm ɓo ne nǝm col vaŋno ne tǝwaa mai mo sokra ɓo pǝnyiŋ pǝnyiŋ, mo rwahra nǝm ge ɓo wol ahe, fan ah ra daŋ mo suu ne fan mbǝ̃ǝ ka, ka mo so geko ne fan nyi ma farel ne ma fazwanne.
16Ka pa joŋzahsyiŋ mo wooko fan rai daŋ ge pel Dǝɓlii ne ko, fan ma nyi mor joŋ syiŋ ma ɓaŋ faɓe' ga lalle, ne ma joŋ syiŋ suŋwii daŋ. 17Ka mo so joŋko syiŋ wo Dǝɓlii ne kǝbǝr ma mor joŋ syiŋ ma nyi jam. Mo so ɓaŋko tǝwaa ma ne colle, ne fan nyi ma farel ne ma fazwan daŋ ge pel Dǝɓlii ne ko. 18Ka Nasiriyo mo sõoko tǝtǝl ge lal zahfah tal mbǝro ma taini, mo so wooko rĩi ah ge rǝk tǝ wii mai mo tǝ cwahra fan joŋ syiŋ ma nyi jam gŋ. 19Fahfal ah ka pa joŋzahsyiŋ mo ɓaŋko sãh kǝbǝr mai mo kǝǝ ɓo kǝǝre, ne tǝwaa gŋ vaŋno, tǝkine tǝwaa mai mo sokra ɓo pǝnyiŋ vaŋno mo pǝ colle, tǝwaa mai mo ka ne fan mbǝ̃ǝr a, ka mo nyiko ge nyi Nasiriyo mai mo sõo tǝtǝl ɓo jolle. 20So ka pa joŋzahsyiŋ mo woo gbah ge sǝŋ pel Dǝɓlii, fan nyi masãh ah mor za joŋzahsyiŋ yo, tǝgbana pel nǝǝ ne ɓal kǝfal kǝbǝr ma jokǝsãh ah mo ye mǝ pa joŋzahsyiŋ ta. Ka fahfal ah gur Nasiriyo no ne fahlii ka zwan bii lee kpuu vin.
21Ɓǝ lai ma mor Nasirien a koiko. So dǝɓ ki kǝsyil ɓǝǝ mo faa pel Dǝɓlii zye ga nyi fan kal tǝ mai mo cuura ɓo nyi Nasiriyo ka nyi ɓe, ka mo joŋko ɓǝ ah baa ge cok ah na mai mo faako ɓo.
Ɓǝ za joŋzahsyiŋ moo ẽera zana
22Dǝɓlii faa nyi Mosus: 23Mo faa nyi Aron ne wee ah ka mo ẽera za Israel naiko, mo faara: 24Dǝɓlii mo ẽe we, mo byak we, 25Dǝɓlii mo yea ne we, mo joŋ gboŋgboŋ wo ɓiiri, 26Dǝɓlii mo ɓaŋ nahnǝn ẽe we ne 'yahe, mo nyi jam nyi we.
27So Dǝɓlii faa: Ne cok mo tǝ juura pel ne tǝɗii ɓe mor za Israel mo tǝ faara gŋ nai ɓe, me ga ẽe ra.
Bible Moundang © Alliance Biblique du Tchad, 1996.