KEE ZANA 34
34
Zahsyee sǝr Kanaan
1Dǝɓlii faa nyi Mosus: 2Mo faa nyi za Israel sye: Ne cok we ge dan sǝr Kanaan ɓe, zahsyee sǝr ɓii a ga yea naiko. 3Zahsyee ah ma nefah morkǝsǝŋ a ga tǝŋ daga kǝsyicok Zin, a zoo ga fah zahsyee sǝr Edom a so zoo ga zah mabii Wul nǝfah morkǝsǝŋ ah ka soo ga nǝfah kǝmorcomzah'nanne. 4A so rãa zoo ga nǝfah morkǝsǝŋ pǝ cok ma ga Akrabim, a so syee zoo ga Zin nǝfah morkǝsǝŋ, ŋhaa a ga dai Kades-Barnea. A so rãa gŋ zoo ga fahsǝŋ nǝfah kǝmorcomlil ka ga Hasar-Addar, ŋhaa a ga dai Asmon. 5A so ga rãa gŋ zoo ga kah el malaŋ ma zahsyee sǝr Egiɓ, a ga i zah ne mabii Mediterrania.
6Zahsyee ma fah morcomlil a ga yea ne mabii Mediterrania.
7Zahsyee ma fahsǝŋ a ga tǝŋ ne mabii Mediterrania, ka we ɗee zoo ge kah waa Hor. 8A ur gin gŋ zoo ga pǝ cok ma ga Hamat, a so syee pǝ̃ǝ ga Zedad, 9ne Zifron. A ga i zah Hasar-Enan.
10Zahsyee ma fah kǝmorcomzah'nan mo ɗee daga Hasar-Enan ŋhaa mo ge Sefam. 11Ka mo so ur gin Sefam mo zoo ge Ribla nǝfah morkǝsǝŋ nǝfah kǝmorcomzah'nan Ayin, ŋhaa mo ge dai pǝ cok ma tǝgee ah ra zah mabii Galile nǝfah kǝmorcomzah'nanne. 12So ka mo zoo ge kah el Yordan nǝfah morkǝsǝŋ, ka mo ge i zah ne mabii Wulli.
Zahsyee sǝr ɓii ne laa ah nai daŋ a ga yea naiko.
13So Mosus faa nyi za Israel: Sǝr mai Dǝɓlii mo nyi ɓo nyi zahban doraŋ ne raita a koiko.#Jos 14:1-5 14Ban Ruben ne Gad, ne raita morsǝ̃ǝ Manasse ma morcomzah'nanne, lwaara sǝr ma ɓǝǝ 15kah el Yordan nǝfah morcomzah'nanne, womra nyi za ɓǝǝ ɓe.
Zaluu ma womra sǝr nyi za Israel
16Dǝɓlii faa nyi Mosus: 17Pa joŋzahsyiŋ Eleasar ne Joswa we Nun ye ga gbahra jol ɓo ne wom sǝr nyi za Israel. 18So kǝsyil zahban daŋ, mo nǝǝ dǝɓlii gŋ vaŋno vaŋno, ka mo gbahra jol ɓii ne wom ahe. 19Zan ah ra naiko: Kaleɓ we Jefunne ma mor ban Yuda, 20Samuel we Ammihud ma mor ban Simon, 21Elidat we Kislon ma mor ban Benyaamin, 22Bukki we Jogli ma mor ban Dan, 23Hanniel we Efod ma mor ban Manasse, 24Kemuel we Siftan ma mor ban Efraim, 25Elisafan we Parnak ma mor ban Zebulon. 26Paltiel we Azan ma mor ban Isakar, 27Akihud we Selomi ma mor ban Asǝr, 28ne Pedahel we Ammihud ma mor ban Naftali. 29Za marai Dǝɓlii syen ra, ka mo womra sǝr nyi za Israel pǝ sǝr Kanaan.
Bible Moundang © Alliance Biblique du Tchad, 1996.