KEE ZANA 17
17
Kǝndaŋ Aron
1Dǝɓlii faa nyi Mosus: 2Mo faa nyi za Israel mo gera nyi mo ne kǝndaŋ jemma tǝtǝl gwa, kǝndaŋ ah mo yea tǝtǝl zaluu ma mor ban Israel vaŋno vaŋno daŋ. Ka mo ŋwǝǝ tǝɗii zune daŋ tǝ kǝndaŋ ahe. 3Ka mo ŋwǝǝ tǝɗii Aron tǝtǝl kǝndaŋ ma pǝ cok morsǝ̃ǝ ban Lewi. Kǝndaŋ vaŋno a zahwaa morsǝ̃ǝ za Israel daŋ. 4Ka mo woo kǝndaŋ ah ra ge rǝk pǝ tal mbǝro ma tai pel sunduku gbanzahe, pǝ cok mai mee zyaŋ ne we gŋ. 5So dǝɓ mai me nǝǝ ɓo, kǝndaŋ ah a ga fǝfãi kpuu. Ne fahlii mai me ga i zah kyãh ɓǝ nyee za Israel mo tǝ kyãhra wo ɓiiri.
6So Mosus faa ɓǝ nyi za Israel, zaluu ɓǝǝ daŋ nyira kǝndaŋ nyi ko vaŋno vaŋno, mor zahban ɓǝǝ jemma tǝtǝl gwa daŋ. Kǝndaŋ Aron laŋ a no kǝsyil ma ɓǝǝ ta. 7Mosus woo kǝndaŋ ah ra ge rǝk pel sunduku gbanzahe.
8Tǝ'nan ah ne cok Mosus mo dan ge pǝ tal mbǝro, kwo kǝndaŋ Aron mai mo zahwaa morsǝ̃ǝ ban Lewi juu goo, jiini, so fãi lee lee kpuu amand.#Yahu 9:4 9Mosus woo kǝndaŋ ah ra daŋ pǝ̃ǝ ge lal ne ko, ge cuu nyi za Israel. Kwora fan mai mo joŋ ɓo, so zaluu vaŋno vaŋno, zune daŋ jin ɓaŋ kǝndaŋ mǝ ahe. 10Dǝɓlii faa nyi Mosus: Mo jin ge kan kǝndaŋ Aron pel sunduku gbanzahe, ka mo yea gŋ na fan ma cuu lai mai Dǝɓlii mo ga lai za Israel za ma ŋwookyaŋ ne ko. A ga wukra, sai ka ira zah kyãh ɓǝ nyee ɓǝǝ ɓe. 11Mosus joŋ na mai Dǝɓlii mo faa nyi ko.
12Za Israel faara nyi Mosus: Ɓǝ mgboo sal ɓuu ge ɓe. 13Dǝɓ mo kal syee ge kah tal mbǝro gwari ɓe, a ga wuu, mo nai ɓe, aru daŋ ru ye wulli.
Bible Moundang © Alliance Biblique du Tchad, 1996.