MATEUS 4
4
Satan kǝǝ Yesu
(Mk 1:12-13; Lu 4:1-13)
1So Tǝ'yak Masǝŋ zaŋ Yesu kal ge cok ne ko ka Satan mo kǝǝ ko.#Yahu 2:18; 4:15 2Fahfal mo nǝn gŋ zah'nan jemma nai, ne suŋ jemma nai ta bai ren farelle, so koŋ i ko. 3Satan ge wol ah faa nyi ko: Amo We Masǝŋ ɓe, mo faa nyi tǝsal marai mo ciŋra farel ɗao. 4Amma Yesu zyii faa: Ɗerewol faa: Dǝfuu ka yea ne cee mor a ren farel no to ya, amma a yea ne ko mor ɓǝ mai Masǝŋ moo faa daŋ.#CuuƁ 8:3
5So Satan ɓaŋ ko kal ge yaŋ Jerusalem yaŋ matǝdaŋdaŋ ne ko ge kan ko tǝtǝl yaŋ Masǝŋ sǝŋ, faa nyi ko: 6Amo We Masǝŋ ɓe, mo zoo tǝ ge sǝŋ ɗao, mor Ɗerewol faa:
Masǝŋ ga faa ɓǝ ɓo nyi angeloi,
A ga ɓaŋra mo tǝ jolle, ka mo i ɓal tǝ tǝsal ka.#Lǝŋ 91:11-12
7Yesu zyii faa nyi ko: Ɗerewol faa ɓe ta: Mo lii Dǝɓlii Masǝŋ ɓo ka.#CuuƁ 6:16
8So Satan ɓaŋ ko yee ge tǝlǝǝ waa mawah ah ne ki, ge cuu goŋ sǝr tǝkine yǝk ɓǝǝ daŋ nyi gŋ, 9so faa nyi ko: Mo kea ge sǝŋ juupel wo ɓe ɓe, me ga nyi fan mai daŋ nyi mo.
10So Yesu zyii faa nyi ko: Satan, mo zol gin wo ɓe, mor Ɗerewol faa: Mo kea sǝŋ pel Dǝɓlii Masǝŋ ɓo, mo juupel wol ah syak ah to.#CuuƁ 6:13
11Satan zol soɓ Yesu, so angeloi gera wol ah joŋra yeɓ nyi ko.
Yesu tǝŋ yeɓ ah sǝr Galile
(Mk 1:14-15; Lu 4:14-15)
12Ne cok Yesu mo laa gbǝra Yohana ɓoo ge ɓo daŋgai, so ur kal ge sǝr Galile.#Mt 14:3; Mk 6:17; Lu 3:19-20 13Kaa yaŋ Nazaret yao, amma kal ge kaa Kapernaum yaŋ mai mo kah mabii Galile pǝ sǝr Zebulon ne Naftali.#Yoh 2:12 14Fan ah joŋ nai ka baa ɓǝ mai profeto Esaia mo faa:
15Sǝr Zebulon ne sǝr Naftali,
Mai mo kaara ɓo ka ga fah kǝ zah mabii nǝn el Yordan nǝzakǝŋhaa pǝ sǝr Galile mǝ za gwǝǝre.#Esa 8:22–9:1
16Za mai mo kaara ɓo pǝ cokfuu kwora cokfãi malii,
Pǝ cok za mai mo kaara ɓo cokfuu pǝ sǝr wulli,
Cokfãi sǝǝ ge tǝ ɓǝǝ ɓe.
17Daga cok ahe, Yesu tǝŋ ne cuu ɓǝ nyi zana, faa: We fer zahzyil ɓiiri, mor Goŋ Masǝŋ ge gwari ɓe.#Mt 3:2
Yesu ɗii za gban syiŋ nai
(Mk 1:16-20; Lu 5:1-11)
18Yesu ge kyãh zah mabii Galile kwo wee mawin tǝ vaŋno gŋ gwa: Simon ma ɗii ne Petar ne naa mah ah Andreas tǝ 'nǝǝra jin pǝ mabii, mor ara ye za gbah syiŋ. 19Yesu faa nyi ra: We syee ge mor ɓe, me ga joŋ we ciŋ za ma gbah zana. 20Soɓra jin ɓǝǝ ne pel sǝ, so kalra ne Yesu.
21So syee ge pel nje kwo wee mawin tǝ vaŋno maki ah gwa faɗa: Yakuɓ we Zebedeus ne naa mah ah Yohana, tǝ sãara jin pǝ dah ne pa ɓǝǝ Zebedeus. Yesu ɗii ra. 22Ne pel sǝ soɓra dah ne pa ɓǝǝ daŋ kalra ne Yesu.
Yesu cuu ɓǝ tǝkine laɓ zana
(Lu 6:17-19)
23Yesu kyãh sǝr Galile daŋ, a cuu fan nyi ra pǝ yaŋ kee ɓǝ Masǝŋ Yahuduen ne faa Ɓǝ'nyah Goŋ Masǝŋ, a laɓ syem camcam tǝkine gbah jol za ma ne suu tǝ jok daŋ.#Mt 9:35; Mk 1:39 24Ɓǝ ah ge myah sǝr Siria ne lii ah daŋ, woora za ma ne syem camcam ge wol ah ne ko: za mai coksyiŋ moo ɓaŋ ra, za ma ne syem faɓaŋni, tǝkine za mai zyak mo hah ra ɓo, Yesu laɓ ra daŋ. 25Za pǝlli gera daga sǝr Galile, sǝr Yaŋmaluujemma, yaŋ Jerusalem ne sǝr Yudea tǝkine sǝr ma kah el Yordan nǝzakǝŋhaa daŋ ge syeera mor ahe.
Bible Moundang © Alliance Biblique du Tchad, 1996.