MATEUS 18
18
Azu ye dǝɓlii ne?
(Mk 9:33-37; Lu 9:46-48)
1Ne cok ah za syee mor Yesu gera wol ah fiira ko faa: Azu ye dǝɓlii pǝ Goŋ Masǝŋ ne?#Lu 22:24 2Yesu ɗii welaŋ vaŋno ge uu kǝsyil ɓǝǝra, faa: 3Me faa nyi we goŋga, we fer ka we ciŋ tǝgbana wee nyee ya ɓe, we ka ga dan Goŋ Masǝŋ ya syaŋsyaŋ.#Mk 10:15; Lu 18:17 4Dǝɓ mo wonsuu ah mo ciŋ tǝgbana welaŋ mai ɓe, ako ye dǝɓlii pǝ Goŋ Masǝŋ. 5Dǝɓ mo nyiŋ welaŋ ma morãi pǝ tǝɗii ɓe ɓe, ka nyiŋ me ɓo ne suu ɓe.
Ɓǝ kǝǝ za joŋ faɓe'
(Mk 9:42-48; Lu 17:1-2)
6Koo zune mo zyak welaŋ vaŋno gin tǝgǝǝ wee mai mo nyiŋra me ɓo joŋ faɓe' ɓe, pǝram baŋ tǝsal nin ga sol dǝɓ ah ɓoo ga pǝ bii malii ah ne ko. 7Ɓǝ gaɓ tǝ sǝrri, mor fan ma kǝǝ za ka joŋ faɓe' gŋ, fan ah a yea gŋ sye no, amma ɓǝ pǝgaɓ tǝ dǝɓ mai ɓǝ kǝǝ za joŋ faɓe' ah moo gin ne ki.
8Jol ɓo wala ɓal ɓo mo tǝ kǝǝ mo joŋ faɓe' ɓe, mo ŋgoŋ ɓoo ge lalle, pǝram mo ge pǝ cok ma lwaa cee ma ga lii ne jol tǝ vaŋno wala ne ɓal tǝ vaŋno kal tǝ mai moo yea ne jol gwa wala ɓal gwa ka ɓoo mo ga cok wii ma ga lii ne ɓe.#Mt 5:30 9Nahnǝn ɓo ye mo tǝ kǝǝ mo joŋ faɓe' ɓe, mo nǝǝ ɓoo ge lalle, pǝram mo ge pǝ cok ma lwaa cee ma ga lii ne nahnǝn tǝ vaŋno kal tǝ mai moo yea ne nahnǝn gwa ka ɓoo mo ga cok wii Gehenna ne ɓe.#Mt 5:29
Ɓǝ kikiŋ pǝsãhm ma muŋni
(Lu 15:3-7)
10We joŋ yella ka we syẽa welaŋ vaŋno tǝgǝǝ wee nyee mai ka. Me tǝ faa nyi we, angeloi ma byak ɓǝǝ a uura pel Pa ɓe coksǝŋ cẽecẽe. [11Mor We Dǝfuu ge ka ǝ̃ǝ fan mai mo yea muŋ ɓo.]#Lu 19:10
12We lǝŋ ɗǝne? Dǝɓ ki mo no ne pǝsǝ̃ǝ temere, so mo muŋ gin gŋ vaŋno ɓe, ka soɓ matǝ jemma doraŋ tǝtǝl doraŋ myah lal ka so ga kyeɓ matǝ vaŋno mo muŋ ɓo ya ne? 13Me faa nyi we goŋga, ne cok mo ge lwaa ɓe, a laa pǝ'nyah ne ɓǝ pǝsãhm ah kal matǝ jemma doraŋ tǝtǝl doraŋ mai mo mokra ya. 14Nai ta, Pa ɓii mai mo no sǝŋ 'yah ka welaŋ vaŋno kǝsyil wee nyee marai mo muŋ ya.
Naa pa ɓo ma joŋ faɓe' wo ɓo
15Naa pa ɓo mo joŋ faɓe'#18:15 Bibel zah Grek manyeeki ah faa: Naa pa ɓo mo joŋ faɓe' ɓe. Ka cuu faɓe' ma joŋ wo ɓo to ya. wo ɓo ɓe, mo ge wol ah mo yea gwa gwa ne ki, ka mo cuu ɓǝɓe' ah nyi ko. Mo laako ɓǝ faa ɓo ɓe, ka mo ǝ̃ǝ ko ɓe.#Lu 17:3 16Amma mo zyii laa ɓǝ faa ɓo ya ɓe, ka mo ɗii dǝɓ ki vaŋno wala za gwa tai suu ɓo ne ko, ka we ge wol ahe, mor ka ɓǝ daŋ mo uu ne zah za syedowal gwa koo sai tǝgbana Ɗerewol mo faa ɓo.#CuuƁ 19:15 17Amma mo zyii laa zah ɓǝǝ ya kpǝ ɓe, mo ge faa ɓǝ ah nyi eklesia, so mo zyii laa zah eklesia ya ta ɓe, ka mo yeako wo ɓo tǝgbana dǝɓ bai tan Masǝŋ wala dǝɓ sǝǝ fanne.
Fan mai we cak fahlii ah ne mai we nyi fahlii ahe
18Me faa nyi we goŋga, fan mai we cak fahlii ah wo sǝr nyee daŋ a ga cak coksǝŋ ta, fan mai we nyi fahlii ah wo sǝr nyee daŋ a ga nyi coksǝŋ ta.#Mt 16:19; Yoh 20:23
19So me faa nyi we, koo za gwa kǝsyil ɓii wo sǝr nyee mo gbǝra zah wo ki ka fii fan ne juupelle, Pa ɓe mai mo no sǝŋ a ga nyi nyi ra. 20Mor koo kẽne daŋ za gwa wala sai mo taira ɓo pǝ tǝɗii ɓe, me no kǝsyil ɓǝǝra.
Ɓǝ kikiŋ dǝɓ yeɓ ma bai kwan syakke
21So Petar ge wo Yesu fii ko: Dǝɓlii, naa pa ɓe mo tǝ joŋ ɓǝɓe' wo ɓe ɓe, me rõm ko ɓal kǝɗǝne? Wala ɓal rǝŋ ne?#Lu 17:3-4 22Yesu zyii faa nyi ko: Me faa nyi mo, mo rõm ɓal rǝŋ ka, amma jemma rǝŋ zahlǝŋ rǝŋ ahe. 23Mor Goŋ Masǝŋ a tǝgbana goŋ mai mo tǝ 'yah ka kee fan ah ra mo jol za yeɓ ahe. 24Ge ka tǝŋ kee ahe, ɗiira dǝɓ ma ne val ah solai million pǝpãa ge pel ah ne ko. 25Amma dǝɓ ah ka ne fan ki ka soo val ah ne ya, dǝɓlii ah faa mo ɓaŋko suu ah lee fan ne ko, ne mawin ahe, wee ahe, tǝkine fan mai mo jol ah daŋ, ka mo sooko val ah ne ko. 26Dǝɓ yeɓ kea ge sǝŋ pel dǝɓlii ahe, pǝǝ ko faa: Oseni mo rõm kyaŋ me ɗao, me ga soo fan ɓo tǝɗe' daŋ. 27So dǝɓlii ah kwo syak tǝl ahe, soɓ ko, rwah ɓǝ val mai mo tǝl ah daŋ ge lalle.
28Ne cok dǝɓ yeɓ mo pǝ̃ǝ gin cok ahe, ge zyaŋ ne dǝɓ yeɓ mai moo joŋra yeɓ dǝɓ tǝ vaŋno, dǝɓ ah ɓaŋ val ɓo jol ah solai temere, so gbǝ workyaŋ nyi ko kal ne kõo ko faa: Sai mo soo lak ɓe. 29So patǝ gwa ah kea ge sǝŋ pel ah pǝǝ ko faa: Oseni mo rõm kyaŋ me ɗao, me ga soo mo. 30Amma dǝɓ ah zyii ya, kal ge ɓoo ko ge daŋgai ŋhaa ka mo sooko val ah gŋ vǝr ɗǝ. 31Ne cok za yeɓ manyeeki ah mo kwora ɓǝ mai mo joŋ naiko, foora ɓǝ pǝlli, zolra kal ge wo dǝɓlii ɓǝǝ ge keera ɓǝ ah daŋ nyi ko. 32So dǝɓlii ah ɗii dǝɓ yeɓ nyẽe ge pel ah faa nyi ko: Amo dǝɓ yeɓ maɓe'. Ame rwah ɓǝ val mai mo tǝtǝl ɓo daŋ ge lalle, mor mo pǝǝ me ne ɓǝ ahe. 33Ka pǝsãh wah ka mo kwo syak tǝ patǝ gwa ɓo mai tǝgbana me kwo tǝ ɓo ta ya ne? 34Dǝɓlii ah ɓaŋ kpãh pǝlli, so gbǝ dǝɓ yeɓ ah pee kal ge daŋgai ka gaa ko gŋ ŋhaa ka mo sooko val ah daŋ vǝr gŋ ɗǝ. 35So Yesu faa: Dǝɓ mo rwah ɓǝɓe' naa pam ne zahzyil daŋ ya ɓe, Pa ɓe mo no sǝŋ ga joŋ ne dǝɓ ah nai ta.
Bible Moundang © Alliance Biblique du Tchad, 1996.