MATEUS 15
15
Ɓǝ za matãa
(Mk 7:1-13)
1Farisien ne za cuu ɓǝ lai urra gin yaŋ Jerusalem ge wo Yesu fiira ko faa: 2Za syee mor ɓo ka syeera mor ɓǝ pa ɓuu lii ra ya mor fẽene? Mor mo tǝ ga rera fan ɓe, ka vãhra jol kǝpel tǝgbana ɓǝ ah mo faa ɓo ya. 3Yesu zyii faa nyi ra: Mor fẽe ma ɓii we soɓ ɓǝ lai Masǝŋ ɓoo we so kal tǝ syee mor ɓǝ faa ɓii ne? 4Mor Masǝŋ faa mo kee pa ɓo ne ma ɓo, dǝɓ mo tǝǝ pah ahe, wala mah ahe, kiita ah ye wulli.#Pǝ̃ǝ 20:12; 21:17; CuuƁ 5:16; Lew 20:9 5Amma awe, we faa: Dǝɓ mo faa nyi pah ah wala mah ahe: Fan makẽne mo jol ɓe ka me wol mo ne ko, me nyi Masǝŋ ɓe, we cak dǝɓ ah bai joŋ fan sãh wo pamme. 6Ne joŋ nai we ɓeɓ yǝk ɓǝ faa Masǝŋ ɓo, ka so joŋ tǝgbana ɓǝ faa ɓiiri. 7Awe za tǝ vǝrvǝrri, profeto Esaia faa goŋga ɓo tǝ ɓii tǝgbana ɓǝ ah mo ŋwǝǝ ɓo pǝ Ɗerewol:
8Masǝŋ faa: Za mai a yiira me ne tǝkpuuzahe,
Amma zahzyil ɓǝǝ pǝɗǝk ne me.#Esa 29:13
9A yiira me ne zah kolle,
Mor a cuura ɓǝ faa dǝfuu tǝgbana ɓǝ Masǝŋ yo.
Fan mai moo ɓeɓ dǝɓɓi
(Mk 7:14-23)
10So Yesu ɗii za gera wol ah faa nyi ra: We daŋ we laa, we tǝ mor ɓǝ ah ta. 11Fan mai moo dan ga pǝ zah dǝɓ ye ka ɓeɓ dǝɓ ya, amma fan mai moo pǝ̃ǝ gin pǝ zah ah yee ɓeɓ ko.
12So za syee mor Yesu gera wol ah faara nyi ko: Farisien laara ɓǝ mai mo faa pǝ'nyahr a, mo tǝ ɓe ne? 13Amma Yesu zyii faa: Fan ma pepea daŋ mai Pa ɓe mo no coksǝŋ mo ye ka pea ya a ga lwǝǝ myah ga lalle. 14We soɓ ra, ara ye rǝ̃ǝ mai mo tǝ gbahra sǝguu pel rǝ̃ǝ manyeeki ahe, rǝ̃ǝ maki ah mo tǝ zaŋ rǝ̃ǝ ki syee ne ɓe, a ga leara ga pǝ lak gwa daŋ.#Lu 6:39 15So Petar faa nyi ko: Mo cuu mor ɓǝ kikiŋ mai nyi ru ɗǝ. 16Yesu zyii faa: Awe laŋ we ka tǝ gak laa mor ɓǝ ya ŋhaa zǝzǝ̃ǝ ba ta ne? 17We tǝ sõone fan makẽne daŋ mo gee lal ge zah dǝɓɓi a pǝ̃ǝ kal ga ɓǝrri, fahfal ah ɓǝr so soɓ vǝl ga lalle, we tǝ ya ne? 18Amma fan mai moo pǝ̃ǝ gin pǝ zah dǝɓ daŋ a ur zahzyil ginni, fan ah a ɓeɓ dǝɓɓi.#Mt 12:34 19Mor ɓǝɓe' a ur gin pǝ zahzyil dǝɓ ginni, so a waa dǝɓ ah ka in wulli, joŋ ɓǝǝre, ka joŋ fan haihai, kiŋ nyinni, gwah berre, tǝkine faa ɓǝɓe' tǝ za ki. 20Fan marai ako yee ɓeɓ dǝɓɓi, amma ren farel bai vãh jol na ɓǝ ah mo faa ɓo ka ɓeɓ dǝɓ ya.
Mawin Kanaaneyo nyiŋ Yesu
(Mk 7:24-30)
21Yesu ur gin cok ah kal ge sǝr Tirus ne Sidon. 22Mawin Kanaaneyo mo kaa ɓo sǝr ah ge wol ah ɓyaŋ ɓǝ faa: Dǝɓlii We David, mo kwo syak tǝ ɓe, mor coksyiŋ kaa ɓo tǝ mǝlaŋ ɓe, a cuu syak nyi no cam.
23Amma Yesu zyii ɓǝ ki zah mawin ah koo vaŋno ya. So za syee mor ah gera wol ah pǝǝra ko faa: Mo soɓ fahlii nyi gyo, mor tǝ yeyee gaɓ dǝɓ ne ko. 24Yesu zyii faa: Pee me ge ɓo mor pǝsǝ̃ǝ Israel mai mo mok ɓo. 25Amma mawin so ge kea ge sǝŋ pel Yesu faa: Dǝɓlii, mo gbah jol ɓe ɗao. 26Yesu zyii faa: Ka pǝsãh ka ɓaŋ farel wee so ɓoo nyi goo ya. 27Mawin zyii faa: Goŋga yo Dǝɓlii, amma koo goo laŋ a fyakra fan mai mo 'mǝr ge ɓo jol pa ɓǝǝ mor ɓal taabǝl sǝŋ renne. 28So Yesu zyii faa nyi ko: Mawinni, iŋ ɓo pǝ'manne, ɓǝ ah a ga joŋ wo ɓo tǝgbana mai mo tǝ 'yahe. So mǝlaŋ ah laɓ ne cok ah sǝ ta.
Yesu laɓ za ma ne syem pǝlli
29Yesu ur gin cok ah kal ge zah mabii Galile, yee kal ge tǝwaa ge kaa gŋ. 30Za tai ge wol ah pǝlli, gera ne lemme, rǝ̃ǝ, lǝrri, za mai zyak mo hah ra ɓo tǝkine za ma ne syem manyeeki ah pǝlli, ge rǝkra ra mor ɓal Yesu, so laɓra daŋ. 31Ne cok za moo kwanra lǝr faara ɓǝ, za mai zyak mo hah ra ɓo laɓra, lem laŋ tǝ syeera watwat, rǝ̃ǝ kwanra cokki, kaara tǝ ɓǝ ah gǝriŋ, so kal ne yiira Masǝŋ za Israel.
Yesu kǝ̃ǝ za ujenere nai ne farelle
(Mk 8:1-10)
32Yesu ɗii za syee mor ah faa nyi ra: Me kwo syak ɓo tǝ za maino, mor nǝnra ɓo ne me zah'nan sai ɓe ara ka ne farel a. Me ka soɓ ra kal ne koŋ nai ya, mor a ga gamra fahlii. 33Za syee mor ah faara nyi ko: Na ga lwaa farel kẽe ka nyi za mapãa mai lal nyee ren kǝ̃ǝ ne? 34So Yesu fii ra: We ne zahtǝfah wol kǝɗǝne? Zyiira faa: A rǝŋ, ne syiŋ manyee ah gŋ nje. 35So faa nyi za mo haira ge sǝŋ. 36Fahfal ah so woo zahtǝfah matǝ rǝŋ ne syiŋ ah daŋ joŋ osoko nyi Masǝŋ tǝl ahe, so ɓǝl wom ge nyi za syee mor ah jolle, so za syee mor ah womra nyi zana. 37Rera kǝ̃ǝ daŋ. So za syee mor ah woora tǝcoŋ ah col rǝŋ. 38Za mai mo rera farel ah tǝgbana ujenere nai, keera ŋwǝǝ ne wee nyee gŋ ya. 39So Yesu nyi fahlii nyi zana. Suu syak ah ur yee dah kal ge sǝr Magadan.
Bible Moundang © Alliance Biblique du Tchad, 1996.