MALAKIAS 3
3
1Mor ahe, Dǝɓlii ma ne swah daŋ zyii faa: Me ga pee pa pee ɓe ka zyeɓ fahlii pel ɓe. So Dǝɓlii mai we tǝ kyeɓ ko, a ga ge pǝ yaŋ ah gwari, pa pee mai we ne 'yah ka kwan ko, a ga ge, a ga cuu mor ɓǝ gbanzah ɓe.
2Amma azu ye gak ka uu ne zah'nan gin ah ne? Ne cok moo gin dai, azu ye gak yea ne cee ne? Mor a ga yea tǝgbana wii mai moo hǝǝ vãmme, a ga yea tǝgbana tǝmlwakǝdǝǝ. 3A ga ge ka ŋgoŋ kiita tǝgbana pa ma hǝǝ vãm moo hǝǝ vãm solai ka yea pǝsãhe, a ga zyeɓ za joŋzahsyiŋ tǝgbana dǝɓ moo zyeɓ vãm solai ne vãm kaŋnyeeri. So a ga joŋra syiŋ pel Dǝɓlii ne fan nyi masãh ah ra ne fahlii ahe. 4Fan nyi mai za sǝr Yuda ne za yaŋ Jerusalem moo ga gera nyi Dǝɓlii ne ko, a ga 'nyah suu ahe, tǝgbana mai mo yea tǝ joŋra ɓaaɓe.
5Dǝɓlii ma ne swah daŋ faa: Me ga ge wo ɓii ka ŋgoŋ kiita, ka me joŋ syedowal tǝ za ma joŋ kǝndaŋne, ne tǝ za ma joŋra ɓǝǝre, ne tǝ za mai moo joŋra syedowal berre, ne za mai moo joŋra za yeɓ ɓǝǝ ne vǝrvǝr mo ka soora ra pǝsãh ya, ne tǝ za mai moo cuura syak nyi ŋwǝǝ wul ne wee syelle, ne tǝ za ma joŋ ɓe' wo za gwǝǝre, tǝkine tǝ za mai mo ka ɗuura me ya.
Nyi patǝ jemma fanne
6Ame Dǝɓlii me ka fer a. Amma awe laŋ we ye morsǝ̃ǝ Yakuɓ ŋhaa tǝ'nahko. 7Awe tǝgbana pa ɓii lii ra ma kǝpel ta, we soɓ ɓǝ lai ɓe ra ɓoo, we ka syee mor ah ya. Amma we pii soo ge wo ɓe, ame laŋ me ga ge wo ɓii ta. Ame Dǝɓlii ma ne swah daŋ me faa naiko. So awe fifii faa: Ru ga joŋ ɗii ka ru pii soo ge wo ɓo ne? 8Ame tǝ ga fifii: A pǝsãh no ka dǝfuu mo kiŋ nyin wo Masǝŋ ne? Amma awe kiŋ nyin wo ɓe. So awe faa: Ru kiŋ nyin fẽe wo ɓo ne? Awe kiŋ nyin wo ɓe ne fahlii nyi patǝ jemma fanne, tǝkine fan nyi manyeeki ah ra. 9Tǝkẽawãk tǝtǝl ɓii za pãa daŋ, mor awe daŋ we kiŋ nyin wo ɓe. 10We ge ne patǝ jemma fan ɓii ra daŋ yaŋ ɓe mor ka farel mo yea gŋ. We lii me ne joŋ ah nai ɗao, ka we ẽe o, me ka ga gbǝr zahtǝwoo coksǝŋ ka me pee fan sãh camcam ge nyi we pǝlli ya ɓe ko. 11Me ga cak fan maɓea ah ma ɓeɓ fakpãhpǝǝ, ka mo ɓeɓra fakpãhpǝǝ ɓii ka, kpuu vin ɓii ra ga lee pǝlli. 12So za sǝr daŋ a ga ɗiira we ne za ma laa pǝ'nyahre, mor sǝr ɓii ga yea pǝsãhe.
Masǝŋ faa zye ga kwo syak tǝ za Israel
13Dǝɓlii faa: Awe faa ɓǝ maɓe' ah tǝtǝl ɓe. Amma so we faa: Aru faa ɓǝ fẽe tǝtǝl ɓo ne? 14Awe faa: Joŋ mor Masǝŋ ka ne yeɓ ya, na tǝ syee mor ɓǝ faa ah ɓe, na ga lwaa reba fẽe gŋ ne? So na ɗii marvǝǝ tǝ ɓǝ fan mai na joŋ pel Masǝŋ ma ne swah daŋ ɓe, reba mai na ga lwaa tǝ ɓǝ ah ako fẽene? 15Zǝzǝ̃ǝko, na tǝ kwan za ma joŋ faɓe' kŋ na za ma laa pǝ'nyahre. Za ma joŋ faɓe' rai kaara ɓo ka jam to ya, amma a liira Masǝŋ ne fan joŋ ɓe' ɓǝǝra, ka rǝ lwaa ɗuu gin wol ah kal ne ko.
16So za mai moo ɗuura Dǝɓlii, a faara ɓǝ tǝgǝǝ ki, Dǝɓlii a syii sok laa ɓǝ faa ɓǝǝra. Ɗerewol ma foo ɓǝ ah no ŋwǝǝ ɓo pel ah tǝtǝl za mai moo ɗuura Dǝɓlii tǝkine gban yǝk ɓǝ ahe. 17Dǝɓlii ma ne swah daŋ faa: A ga yeara za ɓe, ne zah'nan mai me tǝ ga joŋ yeɓ ne ko, a ga yeara za ma syak ɓe. Me ga joŋ ɓǝ 'nyah wo ɓǝǝ tǝgbana pah wel moo joŋ ɓǝ 'nyah wo wel ah mai moo laa zah ahe. 18So we ga woŋ tǝgǝǝ dǝɓ matǝ goŋga, ne dǝɓ maɓe' ahe, we ga woŋ tǝgǝǝ dǝɓ mai mo tǝ syee mor ɓe, ne dǝɓ mai mo ka tǝ syee mor ɓe ya.
Currently Selected:
MALAKIAS 3: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.