LUKAS 23
23
Yesu pel Pilatus
(Mt 27:1-2,11-14; Mk 15:1-5; Yoh 18:28-38)
1Za tai daŋ urra kal ge pel Pilatus ne Yesu. 2Ge tǝŋ cenra ko gŋ faara: Ru lwaa dǝɓ mai tǝ zyak za ɓuuru, a faa nyi ra mo sǝǝra gǝraama nyi Kaiser ka, a ɗii suu ah ne Kristu ne goŋe. 3So Pilatus fifii zah ah faa: Amo ye goŋ Yahuduen ne? Yesu zyii faa nyi ko: Amo ye faa. 4Pilatus so faa nyi za cuu ɓǝ lai tǝkine za pãa daŋ: Me lwaa ɓǝɓe' ma nen pǝkoŋ ŋgoŋ kiita tǝ dǝɓ mai ne wol ah ya. 5Amma so urra swaa ɓǝ faa ɓǝǝ ge pel faara: Pǝ fan cuu ah a kǝǝ za ne ka mo urra ɓǝ, tǝŋ daga sǝr Galile ge sǝr Yudea ne ko ŋhaa so ge dai ɓo nyee ne gbǝm.
Yesu pel Herodes
6Ne cok Pilatus mo laa ɓǝ ah naiko, so fifii faa: Dǝɓ mai dǝɓ sǝr Galile ye ne? 7So mo laa aa ɓe Yesu ye dǝɓ pǝ sǝr Herodes, so pee ko kal ge wo Herodes, ka ne cok ah laŋ, Herodes ge ɓo yaŋ Jerusalem. 8Herodes mo kwo Yesu, laa pǝ'nyah pǝlli, mor ɓaa laŋ tǝ 'yah ka zye kwo ko, mor a laa ɓǝ ah zah zana a 'yah zyaŋ tǝtǝl ne ki ka ẽe dǝǝbǝǝri ah moo joŋko ta. 9Herodes fifii zah Yesu camcam pǝlli, amma Yesu zyii ɓǝ ki zah ah ya. 10Ka zaluu za joŋzahsyiŋ ne za cuu ɓǝ lai no cok ahe, a cenra Yesu ne ɓǝ magaɓ ah ciicii. 11Herodes ne sooje ah ra syakra Yesu tǝkine syẽa ko, so ɓoora mbǝro masãh ah nyi ko jin peera kal ge nyi Pilatus faɗa. 12Herodes ne Pilatus yea syiŋra ki ɓo, amma pǝ zah'nan moo so ciŋra bai wo ki.
Ŋgoŋra kiita wul tǝ Yesu
(Mt 27:15-26; Mk 15:6-15; Yoh 18:39-40; 19:1-16)
13Pilatus tai zaluu za joŋzahsyiŋ ne zaluu pel za tǝkine za daŋ, 14faa nyi ra: We ge pel ɓe ne dǝɓ mai we faa a zyak zana, so me fii ko pel ɓii daŋ, me lwaa ɓǝɓe' ki ne yeɓ ɓe' wol ah na makẽne we ge ce ko ne ɓǝ ah ya. 15Herodes laŋ lwaa ɓǝɓe' wol ah ya ta, so jin pee ko ge ɓo wo mana. Dǝɓ ah joŋ ɓǝɓe' ma nen pǝkoŋ wul a. 16Me 'yah ka me loɓ ko ne bǝrǝǝ, so me ga wǝǝ ko ɓoo. [17Ne cok fĩi Paska moo joŋ daŋ, Pilatus a wǝǝ daŋgai nyi ra vaŋno.] 18Ŋwaara ɓǝ zahki daŋ faara: Mo i dǝɓ mai pǝ wulli, amma mo wǝǝ Barabas nyi ru. 19(Gbǝra Barabas ge ɓo daŋgai, mor kǝǝ za ur ɓǝ tǝgǝǝ yaŋ, so i wul ɓo ta.) 20Pilatus a 'yah ka wǝǝ Yesu, mor ah so jin fii pǝki. 21Amma za ŋwaara ɓǝ faara: Ɓaa ko ge wo kpuu, ɓaa ko ge wo kpuu. 22Pilatus so faa ɓǝ nyi ra patǝ sai ahe: Dǝɓ mai joŋ faɓe' fẽe ɓo ne? Me lwaa ɓǝɓe' ma nen pǝkoŋ wul wol ah ya, me 'yah ka me loɓ ko, so me ga wǝǝ ko ɓoo. 23Amma so ŋwaara ɓǝ ge pel pǝ'man faara: Ɓaa Yesu ge wo kpuu. Ɓǝ ŋwaa ɓǝǝ kal swah Pilatus. 24Pilatus so zyii ɓǝ ah na mai mo tǝ 'yahra. 25Wǝǝ dǝɓ daŋgai mai mo kǝǝ za ur ɓǝ so i wul ɓo ta nyi ra, amma soɓ Yesu nyi gee ra jol ka mo joŋra ne ki tǝgbana mo 'yahra ɓo.
Ɓaara Yesu ge wo kpuu
(Mt 27:32-44; Mk 15:21-32; Yoh 19:17-27)
26Ne cok mo tǝ gara ne Yesu, ge zyaŋra fahlii ne dǝɓ yaŋ Kirene no a ɗii ne Simon, yea 'wahe tǝ gin yaŋ, so gbǝra ko ɓaŋra kpuu ɓaa Yesu kan ge nyi tǝtǝl ka mo syeeko fahfal Yesu ne ko.
27Za pãa daŋ syeera ga mor ah daŋ, ŋwǝǝ manyeeki ah mai mo no gŋ mo tǝ yera yee, so dahra gor tǝ ɓǝ ahe. 28Yesu cii fahfal faa nyi ra: Ŋwǝǝ Jerusalem, we yeyee tǝ ɓǝ ɓe ka, amma we yeyee tǝ suu ɓii tǝkine wee ɓiiri. 29Mor zah'nan ah ra no ginni, za ga faa: Ŋwǝǝ mai mo gak bem wee ya a pǝ'nyah wo ɓǝǝ ne mai mo byaŋ ɗǝ ya tǝkine mai we mo zwǝ won bii ah ge zah ya. 30Za ga faara nyi waare: Mo lee ge tǝ ɓuu ik ru. A ga faara nyi geere: Mo muŋ ru. 31Mo tǝ joŋra nanaa wo kpuu mapǝ̃ǝ ah nai ɗao, a ga joŋra wo kpuu mayak ah ɗǝne?
32Woora za faɓe' gwa ge ne ka ik ra ga lal ne Yesu. 33Ne cok mo daira pǝ cok ma ɗii ne Gbel Tǝtǝlli, ɓaara Yesu ge wo kpuu gŋ tǝkine za matǝ gwa kŋ, maki ah jokǝsãh ahe, maki ah jokǝlǝɓai ahe. 34Yesu faa: Daddǝ, mo rõm ra, mor tǝra fan mai mo tǝ joŋra ya. Woŋra mbǝro ah ra tǝgǝǝ ɓǝǝ ne in cahcah tǝl ahe. 35Za gin uura pǝ cok ah a ẽera ko. Zaluu a syakra ko a faara: A ǝ̃ǝ za ki, ako ye mo Kristu mai Masǝŋ mo nǝǝ ɓo ɓe, mo ǝ̃ǝko suu ah o. 36Sooje laŋ syakra ko ta, gera wol ah gwari, nyira bii mbǝ̃ǝ nyi ko. 37So faara: Amo ye goŋ Yahuduen ko ɓe, mo ǝ̃ǝ suu ɓo ɗao. 38Ŋwǝǝra ɓǝ rao tǝtǝl ah sǝŋ: Dǝɓ mai goŋ Yahuduen yo.
39Dǝɓ vaŋno kǝsyil za faɓe' matǝ gwa mo ɓaara ɓo ne Yesu tǝǝ ko faa: Amo ye ka Kristu ya ne? Mo ǝ̃ǝ suu ɓo ne ru daŋ o. 40Patǝ gwa ah lai ko faa: Mo ka ɗuu Masǝŋ ya ne? Amo laŋ mo pǝ kiita ne suu ɓo ta. 41Ma man kiita man a ne cok ahe, mor na lwaa reba yeɓ man ɓo, amma dǝɓ mai joŋ ɓǝɓe' koo biŋ laŋ ya. 42So faa nyi Yesu: Ne cok mo ge kaa goŋ ɓo ɓe, mo foo ɓǝ ɓe Yesu. 43Yesu zyii faa nyi ko: Me tǝ faa nyi mo goŋga, tǝ'nahko mo ga Paradis ne me.
Wul Yesu
(Mt 27:45-56; Mk 15:33-41; Yoh 19:28-30)
44Ka cok com joŋ ɓo tǝgbana jemma tǝtǝl gwa, com so coo yao, cok foo tǝ sǝr ah ne lii ah daŋ ŋhaa dai cok com sai ne lilli. 45Godel ma cee ɓǝr yaŋ Masǝŋ ŋgǝ̃ǝ kǝsyil gwa. 46Yesu ɓyaŋ ɓǝ ne kyaŋ lii faa: Daddǝ, me soɓ tǝ'yak ɓe jol ɓo. Mo faa ɓǝ maiko, so lee wul sǝ. 47Swah sooje Romanen mo kwo ɓǝ ah joŋ naiko, so yii Masǝŋ faa: 'Manna dǝɓ mai dǝɓ sãh yo. 48Ne cok za mai mo taira ɓo gŋ mor ka ẽe ɓǝ ah mo kwora ɓǝ ah mo joŋ naiko, pii soora ne kǝ̃ǝ jol tǝ ɓǝ ahe. 49Bai Yesu tǝkine ŋwǝǝ mai moo syeera mor ah daga sǝr Galile ɓaa daŋ uura lal pǝɗǝk nje mor ka ẽe fan mai mo tǝ joŋni.
Kanra Yesu ge pǝ palle
(Mt 27:57-61; Mk 15:42-47; Yoh 19:38-42)
50Dǝɓ ki no a ɗii ne Yuseɓ, dǝɓ sãh yo, a njaŋ, yaŋ ah Arimatea, yaŋ Yahuduen malii ah ye ta. Dǝɓ ah tǝ byak gin Goŋ Masǝŋ. 51A kǝsyil za faadal maluu ta, amma zyii gban zah ne ra tǝ ɓǝ yeɓ mai mo foora ɓo ka joŋ ya. 52Kal ge wo Pilatus fii wul Yesu jol ahe. 53So ge ɗǝr wul ah tǝ kpuu ge sǝŋ, koo ne zyim marwãh ah ɓaŋ kan ge pǝ yii mai mo ciira ɓo tǝ pǝɗakka na palle, pal ah ɓah ciira wul gŋ taa ya ba. 54Fan ah joŋ com zyeɓ suu, ka tǝ'nan ah com 'yak Yahuduen yo.
55Ŋwǝǝ mai moo syeera mor Yesu daga sǝr Galile ɓaa kalra ge ne Yuseɓ ge ẽera pal ah tǝkine wul ah mo kan ge gŋ. 56So pii soora kal fah yaŋ ɓǝǝra, ge zyeɓra nǝm ma fuŋ 'nyah tǝkine ɓǝrdi ka ga tah wo wul Yesu.
Ge 'yakra ne com 'yak tǝgbana ɓǝ lai mo cuu ɓo.
Currently Selected:
LUKAS 23: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.