LEWITIEN 24
24
Ɓǝ lai tǝ ɓǝ byak pitǝrla
(Pǝ̃ǝ 27:20-21)
1Dǝɓlii faa nyi Mosus: 2Mo faa nyi za Israel sye, mo gera ne nǝm tǝbaakãm masãh ah mo ŋhǝŋhǝǝ ɓo, mor ka rǝk pǝ pitǝrla pǝ tal mbǝro ma taini, ka cokfãi mo yea gŋ cẽecẽe. 3Lil mo joŋ ɓe daŋ, ka Aron mo ge kanko wii ahe, ka wii ah mo yeako gŋ pel Dǝɓlii, fahfal godel mai mo cee ɓo, mo pel sunduku gbanzahe, mai mo pǝ cok matǝdaŋdaŋ tǝɗe', ŋhaa wii ah mo cee zah'nanne. We syee mor ɓǝ lai mai ga lii ga lii. 4Aron mo byakko pitǝrla ah ra mai mo tǝ cok kan pitǝrla mai mo zyeɓ ɓo ne vãm kaŋnyeeri masãhe, mo ẽeko ka pitǝrla ah mo sǝǝ cokfãi gŋ pel Dǝɓlii cẽecẽe.
Farel ma nyi mor Masǝŋ
5Dǝɓlii faa nyi Mosus, mo ɓaŋko sum tahsah jemma gwa tǝtǝl nai, ka mo zooko tǝwaa ne zahtǝfah jemma tǝtǝl gwa.#Pǝ̃ǝ 25:30 6Mo rǝk tǝwaa ah cok camcam gwa tǝ taabǝl mai mo zyeɓ ɓo ne vãm kaŋnyeeri masãh ah mo kan ɓo pel Dǝɓlii. Wol ah mo lǝǝ tǝki pǝ cok mai zahtǝfah yea, mo lǝǝ tǝki pǝ cok maki ah zahtǝfah yea ta. 7Ka mo syeeko ɓǝrdi ma fuŋ 'nyah ah ge tǝ tǝwaa mai mo lǝǝ ɓo tǝki cok camcam gwa ko, ka mo yea gŋ na fan ma ɓaŋ cok fan nyi ma farel moo nyira nyi Dǝɓlii. 8Ne zah'nan com 'yak daŋ, pa joŋzahsyiŋ mo ge kanko tǝwaa ah gŋ pel Dǝɓlii, mor ka baa ɓǝ gbanzah za Israel ne ga lii ga lii. 9Tǝwaa ah mǝ Aron ye ne morsǝ̃ǝ ah ra, ka mo rera farel ah pǝ cok mai Dǝɓlii mo nǝǝ ɓo, mor fan ah zah faren matǝdaŋdaŋ ah mai za Israel mo nyira ɓo nyi Dǝɓlii mor za joŋzahsyiŋ yo.#Mt 12:4; Mk 2:26; Lu 6:4
Fan ma cuu kiita matǝ goŋga
10Dǝɓ ki no mam mǝlaŋ za Israel o, amma pam dǝɓ sǝr Egiɓ yo, pah ah ge kǝsyil za Israel zahjul ɓǝǝra, so tǝŋ joŋ bal ne dǝɓ Israel maki ahe. 11Dǝɓ ah a ɗii mah ah ne Selomit, mǝlaŋ dǝɓ ma ɗii ne Dibri ma morsǝ̃ǝ Dan yo. Ne cok mo tǝ joŋ balle, dǝɓ ah tǝǝ Masǝŋ, so gbǝra ko ge wo Mosus ne ko. 12Mosus so faa, mo byakra ko, sai ka Dǝɓlii cuu fan mai moo ga joŋra ne dǝɓ ah nyi ra ɓe.
13Dǝɓlii faa nyi Mosus: 14Mo zaŋ dǝɓ ah zahjul pǝ̃ǝ ge lal ne ko. Koo zune mo laa tǝǝ ah mo tǝǝko, mo ge kanko jol ge tǝ dǝɓ ah ka cuu joŋ faɓe' ɓe, so ka za pãa daŋ mo ɓaara ko ne tǝsal pǝ wulli. 15So ka mo faa nyi za Israel, koo zune mo tǝǝ Masǝŋ ɓe, a ga lwaa kiita magaɓɓe, 16a ga ira ko pǝ wulli. Mo dǝɓ Israel o, wala mo dǝɓ gwǝǝ ye mo ge kaa ɓo kǝsyil za Israel, mo tǝǝ Masǝŋ ɓe, ka za pãa daŋ mo ɓaara ko ne tǝsal pǝ wulli.
17Dǝɓ mo i dǝɓ ki pǝ wulli, mo ira ko pǝ wul ta.#Pǝ̃ǝ 21:12 18Dǝɓ mo i faɓal dǝɓ ki pǝ wul ɓe, sai mo nyiko maki ah nyi dǝɓ ah pǝ cok ahe. Ɓǝ malii ahe, cee mo yea zahwaa cee ta.
19Dǝɓ mo kan syim wo dǝɓɓi, sai mo joŋra wol ah na mai mo joŋko ta. 20Mo haoko woiŋ dǝɓɓi, sai mo haora woiŋ ah maki ah ta, mo nǝǝ nahnǝn nyi dǝɓ ge lal vaŋno, mo nǝǝra nahnǝn ge nyi lal vaŋno ta, mo hao syel nyi dǝɓɓi, mo haora syel ge nyi lal ta. Dǝɓ mo joŋ fẽene wo dǝɓ daŋ, mo faŋra val ah wol ah noo ta.#Pǝ̃ǝ 21:23-25; CuuƁ 19:21; Mt 5:38 21Dǝɓ mo i faɓal dǝɓ pǝ wul ɓe, mo sooko ne faɓal maki ah na moo ta. Amma dǝɓ mo i dǝɓ ki pǝ wul ɓe, mo ira dǝɓ ah pǝ wul ta. 22Ɓǝ lai mai a mor ɓii za Israel, ne za gwǝǝ mai mo kaara ɓo kǝsyil ɓii daŋ, mor ame ye Dǝɓlii Masǝŋ ɓiiri.#KeeZ 15:16
23Mosus faa ɓǝ ah nyi za Israel, so zaŋra dǝɓ ah zahjul pǝ̃ǝ ge lal ne ko, ɓaara ko ne tǝsal pǝ wulli. Za Israel joŋra ɓǝ mai Dǝɓlii mo faa nyi Mosus naiko.
Bible Moundang © Alliance Biblique du Tchad, 1996.