LEWITIEN 22
22
Fan nyi matǝdaŋdaŋ
1Dǝɓlii faa nyi Mosus: 2Mo faa nyi Aron ne wee ah sye: We joŋ yella ne ɓǝ fan nyi matǝdaŋdaŋ ah mai za Israel moo nyira nyi me, mor ka mo ɓeɓra tǝɗii ɓe mai mo daŋdaŋ ne ka. Ame ye Dǝɓlii. 3Dǝɓ ki kǝsyil morsǝ̃ǝ ɓii mo ge pel ɓe ne fan nyi mai za Israel mo nǝǝra ɓo mor ɓe, ne cok mai ka dǝɓ ah mo ne ɓeɓ wo suu ɓe, dǝɓ ah ka fǝ̃ǝ ge pel ɓe yao. Ɓǝ lai mai a mor ɓii ga lii ga lii. Ame ye Dǝɓlii.
4Dǝɓ morsǝ̃ǝ Aron mo ne syem ma zǝǝ zan wol ahe, wala fan moo ɗuu pel ahe, mo reko fan nyi matǝdaŋdaŋ ah ra ka, ŋhaa sai ka ɓeɓ mai mo wol ah vǝr ɓe. Pa joŋzahsyiŋ makẽne daŋ mo juu fan mai mee kwan tǝgbana a ne 'nahmme, mor fan ah juu wul ɓo, wala mo juu dǝɓ mai mo lolom soɓ suu ɓo ne ko, 5wala mo juu faɓal mai mee kwan na a ne 'nahmme, wala mo juu dǝɓ mai mo ne 'nahm ɓe, ka ako laŋ a ne 'nahm o ta. 6Pa joŋzahsyiŋ mai mo ne 'nahm naiko, a ga yea ne ŋhaa a dai lilli. Fahfal ah laŋ ka gak re fan nyi matǝdaŋdaŋ ah ra ya, sai ka so er bii ɓe. 7Fahfal com mo dan ɓe, ka a daŋdaŋ o, a gak re fan nyi matǝdaŋdaŋ ah ra, mor farel ah yo. 8Mo reko nǝǝ faɓal mai mo wǝ suu ah ɓo, wala fafyãh cok ye mo gbǝ ɓo ka, a ga joŋ ko yea ne 'nahmme. Ame ye Dǝɓlii.
9Sai za joŋzahsyiŋ daŋ mo syeera mor ɓǝ lai mai me nyi ɓo. Mo ka nai ya ɓe, a ga ciŋra za ɓǝɓe', so a ga wukra, mor ɓeɓra ɓǝ lai ɓe ra mai mo daŋdaŋ ɓo. Ame ye Dǝɓlii, me ye joŋ ra ɓo daŋdaŋ.
10Dǝɓ mai mo ka kǝsyil za yaŋ za joŋzahsyiŋ ya, ka gak re fan nyi matǝdaŋdaŋ ah ya, koo gwǝǝ ye mo ge ɗǝr ɓo yaŋ ahe, mo dǝɓ ma joŋ yeɓ nyi ko yo daŋ ka re ya. 11Amma byak mai pa joŋzahsyiŋ mo lea ɓo ne lakre, wala mai mo byaŋ ɓo ɓǝr yaŋ ahe, a gak rera farel mai pa joŋzahsyiŋ mo lwaa ɓo. 12Mǝlaŋ pa joŋzahsyiŋ mai mo kan dǝɓ mai mo pa joŋzahsyiŋ ye ka ɓo, mo reko fan nyi matǝdaŋdaŋ ah ra ka. 13Amma mǝlaŋ pa joŋzahsyiŋ mo ciŋ mawin wul ɓo, wala mo syel ki ɓo ne worre, so mo ka ne wee ya, mo so pii soo ge kaa ɓo yaŋ pah ah na matãa mo yea ne woi ah ɓe, a gak re farel mai pah ah moo renne. Amma dǝɓ makol ka re ya.
14Amma dǝɓ mo ka kǝsyil za yaŋ pa joŋzahsyiŋ ya, mo zyakko re fan nyi matǝdaŋdaŋ mo tǝ ya ɓe, sai ka mo jinko farel mai mo reko ɓo, mo so ɓooko ge gŋ joŋ jemma gwa ma pǝzyil temere. 15Za joŋzahsyiŋ mo ɓeɓra fan nyi matǝdaŋdaŋ ah mai za Israel moo ginra nyi me ne ka. 16Mo soɓra dǝɓ ki re fan nyi ah ra ɓe, ka kǝǝra dǝɓ ah dan pǝ ɓǝɓe' malii ah ɓe. Ame ye Dǝɓlii, me ye joŋ fan nyi ah ra ɓo daŋdaŋ.
17Dǝɓlii faa nyi Mosus: 18Mo faa nyi Aron ne wee ah ne za Israel daŋ sye: Ne cok dǝɓ Israel wala mo dǝɓ gwǝǝ mai mo ge kaa ɓo kǝsyil za Israel o, mo 'yah ka joŋ syiŋ suŋwii wo ɓe, mor ka baa ɓǝ faa ah mo faa ɓo ne ko, wala mo 'yah ka nyi fan joŋ syiŋ ah mor zahzyil ah ye 'yahe, ka suu faɓal ah mo yea pǝɓe' ka. 19Faɓal ah mo yea pǝworre, suu ah mo yea pǝɓe' ka, mor ka me nyiŋ fan ahe. 20We nyi faɓal mai suu ah mo pǝɓe' mor ka joŋ syiŋ ne ɓe, Dǝɓlii ka ga nyiŋ fan ah ya.#CuuƁ 17:1 21Ne cok dǝɓ mo 'yah joŋ syiŋ ma nyi jam wo Dǝɓlii mor ka baa ɓǝ faa ah mo faa ɓo ne ko, wala mo 'yah ka nyi fan joŋ syiŋ ah mor zahzyil ah ye foo ɓo, sai faɓal ah suu ah mo yea pǝɓe' ka, ka me nyiŋ fan ahe. 22We joŋ syiŋ wo Dǝɓlii ne faɓal mai mo rǝ̃ǝ ɓo rǝ̃ǝ ne mai mo lem ɓo, ne mai ɓal mo hao ɓo, ne mai sãhm moo ɗuu wo suu ah tǝkine mai suu mo rwaa ɓo ka. We joŋ syiŋ ma farel tǝ cok joŋ syiŋ ne faɓal ma morãi ka. 23We gak joŋ syiŋ mai zahzyil ɓii mo 'yah joŋ ah ɓo ne faɓal mai suu ah mo ka pǝsãh ya, me ga nyiŋ. Amma matǝ ɓǝ baa ɓǝ gbanzah ye ɓe, me ka nyiŋ ya. 24We joŋ syiŋ wo Dǝɓlii ne faɓal mai tǝgel ah mo baa ɓo baa, wala mo cẽe ɓo, wala mo ŋgǝ̃ǝ ɓo ŋgǝ̃ǝre, ne mai mo ŋgoŋ ge ɓo lal ka. Me nyi fahlii nyi we ka we joŋ syiŋ ne faɓal ma morãi pǝ sǝr ɓii ya.
25We joŋ syiŋ wo ɓe ne faɓal mai we lwaa gin ɓo jol dǝɓ gwǝǝ ka. Me kwan faɓal ma morãi tǝgbana a ne 'nahmme, me ka nyiŋ fan ah ya.
26Dǝɓlii so faa nyi Mosus: 27Ne cok we ga joŋ syiŋ ne we faɓal ɓe, mo dǝǝ yo, wala mo pǝsãhm yo, wala mo sǝgwii yo, mo byaŋ ɓo pǝlaŋne, mo yeako mor mah ah joŋ zah'nan rǝŋ ɗǝ, fahfal ah me ga nyiŋ na fan joŋ syiŋ ma farel ba. 28We ŋgoŋ ma dǝǝ ne wel ah wala ma pǝsãhm ne wel ah gwa daŋ com vaŋno ka. 29Ne cok we tǝ 'yah joŋ syiŋ ma joŋ osoko nyi Dǝɓlii ɓe, we syee mor ɓǝ lai ah me cuu ɓo, ka me nyiŋ we. 30We re nǝǝ fan ah com ah sǝ, we soɓ koo fẽene ah mo dan com ka.
31Dǝɓlii faa: We syee mor ɓǝ lai ɓe ra, ame ye Dǝɓlii. 32We ɓeɓ tǝɗii ɓe matǝdaŋdaŋ ka, za Israel daŋ mo gbǝra yǝk ɓǝ daŋdaŋ ɓe me ne ko. Ame ye Dǝɓlii, me ye joŋ we ɓo daŋdaŋ. 33Ame zaŋ we gin sǝr Egiɓ pǝ̃ǝ ne ko, mor ka me yea Masǝŋ ɓiiri. Ame ye Dǝɓlii.
Bible Moundang © Alliance Biblique du Tchad, 1996.