LEWITIEN 18
18
Ɓǝ lai tǝ ɓǝ swan ne ŋwǝǝre
1Dǝɓlii faa nyi Mosus: 2Mo faa nyi za Israel sye: Ame ye Dǝɓlii Masǝŋ ɓiiri. 3We syee mor zah fan joŋ za sǝr Egiɓ mai we yea kaa ɓo gŋ ka, we syee mor ɓǝ zah fan joŋ za sǝr Kanaan mai me zaŋ we ge ɓo gŋ zǝzǝ̃ǝ ne ka ta. 4We syee mor ɓǝ lai ɓe, we joŋ fan mai me faa ɓǝ ah ɓo nyi we. Ame ye Dǝɓlii Masǝŋ ɓiiri. 5We syee mor ɓǝ cuu ɓe ra, tǝkine ɓǝ lai ɓe mai me nyi ɓo nyi we. We tǝ joŋ nai ɓe, we ga yea ne cee. Ame ye Dǝɓlii.#Ne 9:29; Eze 18:9; 20:11-13; Lu 10:28; Ro 10:5; Gal 3:12
6Koo zune mo swǝko ne zahzum ah mawin ka. Ame ye Dǝɓlii. 7Mo joŋ ɓǝɓe' wo pa ɓo ka swan ne ma ɓo ka, mo joŋ ɓǝ ren swãa mai wo ma ɓo ka. 8Mo joŋ ɓǝɓe' wo pa ɓo ka swan ne mawin ah maki ah ka.#Lew 20:11; CuuƁ 22:30; 27:20 9Mo swǝ ne naa ma ɓo mawin wala naa pa ɓo mawin ka, koo ma byaŋ piicel pa ɓo, wala mai mo byaŋ ɓo ka gŋ ya daŋ.#Lew 20:17; CuuƁ 27:22 10Mo swǝ ne mǝlaŋ we ɓo mawor wala mǝlaŋ mǝlaŋ ɓo ka. Mo joŋ nai ɓe, ka mo cuu swãa suu ɓo ɓo. 11Mo swǝ ne mǝlaŋ naa pa ɓo mawor ka, mor naa pa ɓo mawin o. 12Mo swǝ ne ma ɓo laŋ ma zahzum pa ɓo ka, mor naa mah pa ɓo yo.#Lew 20:19-20 13Mo swǝ ne ma ɓo laŋ mai mo ye naa mah ma ɓo ka ta, mor naa mah ma ɓo yo. 14Mo joŋ ɓǝɓe' wo naa pah pa ɓo ka swan ne mawin ah ka, mo kwo mawin ah na naa pah pa ɓo mawinni. 15Mo swǝ ne gor ɓo mawin na ɓo ka.#Lew 20:12 16Mo swǝ ne mawin naa pa ɓo ka.#Lew 20:21 17Mo swǝ ne mǝlaŋ ɓǝr mawin mai mo kan ɓo ka, koo we ɓǝr mǝlaŋ ah laŋ, mo swǝ ne ki ka. Maki zahzum ɓo yo, mor ah a pǝrenswãare.#Lew 20:14; CuuƁ 27:23 18Mo ɓaŋ naa mah wala naa pah mawin ɓo mawin kan ne cok mai mawin ɓo mo no sǝŋ ka.
19Mo swǝ ne madǝwin ne cok mai mo saŋko ɓo ka, mor a ne 'nahmme.#Lew 20:18 20Mo swǝ ne mawin dǝɓ ki ka, mor ɓǝ ah a ga joŋ mo yea ne 'nahm pel Dǝɓlii.#Lew 20:10 21Mo ɓaŋ we ɓo maki ah vaŋno ka joŋ syiŋ suŋwii ne wo masǝŋ Molok ka, mor ɓǝ ah a ga ɓeɓ tǝɗii Masǝŋ. Ame ye Dǝɓlii.#Lew 20:1-5 22Dǝwor mo swǝ ne dǝwor ki ta ka, Masǝŋ syiŋ ɓǝ ah ɓo syiŋ.#Lew 20:13 23Dǝworre, wala madǝwinni, mo swǝ ne faɓal ka, ɓǝ ah ga joŋ mo yea ne 'nahm pel Dǝɓlii, ɓǝ maɓe' ah yo.#Pǝ̃ǝ 22:18; Lew 20:15-16; CuuƁ 27:21
24We ɓeɓ suu ɓii ne joŋ yeɓ marai ka, mor za mai mo yea kaara ɓo pǝ sǝr mai kǝpelle ɓeɓra suu ɓǝǝ ne joŋ fan ma morãiko, mor ah Dǝɓlii tǝ ga nĩi ra ka we ge kaa pǝ sǝr ahe. 25Yeɓ ɓǝǝ joŋ sǝr ah ɓeɓ ɓo pel Dǝɓlii, mor ah Dǝɓlii ŋgoŋ kiita ɓo tǝ sǝr ahe, so sǝr ah zwǝǝ za ma kaara gŋ ge lalle. 26-27Joŋra faɓe' marai daŋ, ɓeɓra sǝr ah ne ɓǝɓe' ɓǝǝra. Amma awe, we syee mor ɓǝ lai Dǝɓlii ne ɓǝ cuu ah ra. Mo dǝɓ Israel o, wala mo dǝɓ gwǝǝ ye mo ge kaa ɓo kǝsyil ɓiiri, mo joŋko fan ma morãi ka. 28Nai ɓe, sǝr ah ka ga zwǝǝ we ga lal tǝgbana mai mo zwǝǝ za mai mo yea kaara ɓo gŋ kǝpel a. 29Koo zune mo joŋ fan ma morãi ɓe, pah ah ka ga yea kǝsyil za Masǝŋ yao.
30So Dǝɓlii faa: We syee mor ɓǝ cuu ɓe mai me nyi ɓo nyi we. We syee mor zah fan joŋ za mai mo yea kaara ɓo pǝ sǝr ah kǝpel ɓii ka. We ɓeɓ suu ɓii ne joŋ fan ma morãi ka. Ame ye Dǝɓlii Masǝŋ ɓiiri.
Bible Moundang © Alliance Biblique du Tchad, 1996.