JOSWA 6
6
Yaŋ Jeriko leere
1Za yaŋ Jeriko coora zahfah yaŋ ɓǝǝra, so cwãhra ge gŋ mor a ɗuura gal za Israel, dǝɓ ma pǝ̃ǝ gin lal kǝka, dǝɓ ma dan ga yaŋ laŋ kǝka ta. 2Dǝɓlii faa nyi Joswa: Me nyi yaŋ Jeriko ne goŋ ah tǝkine za maswah ah mo gŋ gee mo jol ɓe. 3Amo ne za sal daŋ zah'nan Masǝŋ daŋ we kiŋ yaŋ ah ɓal vaŋno, we joŋ nai zah'nan yea. 4Amma za joŋzahsyiŋ rǝŋ mo woora kokõorĩi rǝŋ mo kalra pel sunduku gbanzah ne ko. Ne zah'nan rǝŋ ah ka we kiŋ yaŋ ah ɓal rǝŋ ka za joŋzahsyiŋ mo ulra kokõorĩi. 5Ne cok mo ulra kokõorĩi we laa cii ah ɓe, ka za daŋ mo ŋwaara gor pǝ'manne, ɓaale yaŋ ah mo vuu ɓo a ga lee ga sǝŋ, ka zune daŋ mo syeeko ge pel ah jaŋjaŋ.
6Joswa we Nun ɗii za joŋzahsyiŋ faa nyi ra: We ɓaŋ sunduku gbanzahe, ka za rǝŋ kǝsyil ɓii mo woora kokõorĩi ciŋ kǝbǝr mo kalra pel sunduku Dǝɓlii ne ko. 7So Joswa faa nyi zana: We syee o, we ge kiŋ yaŋ ahe, ka kul za sal vaŋno mo kal pel sunduku Dǝɓlii.
8Ne cok Joswa mo faa ɓǝ nyi za vǝrri, za joŋzahsyiŋ matǝ rǝŋ kŋ woora kokõorĩi ciŋ kǝbǝr rǝŋ pel Dǝɓlii kalra pel ne ul kokõorĩi. Sunduku gbanzah Dǝɓlii syee fahfal ɓǝǝra. 9Za ma zyeɓra suu sal kalra pel za joŋzahsyiŋ mai moo ulra kokõorĩi. Kul za sal ma fahfal syeera mor sunduku ka byakke. Ne cok za joŋzahsyiŋ mo tǝ syeera ɓe, a yah ulra kokõorĩi ga ne tǝ syel kpǝkpǝ. 10Joswa faa nyi zana: We ŋwaa ɓǝ ka, we gbǝr ɓǝ ge zah mgbǝɓ ka, ŋhaa sai ka me faa nyi we we dahgor o, ka fahfal ah ɓe, we dah gur o. 11So faa nyi za ka mo ɓaŋra sunduku Dǝɓlii kiŋ yaŋ ah ne ɓal vaŋno. Joŋra naiko, so fahfal ah pii soora ge pǝ cok ɗǝrri, ge swahra gŋ.
12-13Joswa jur tǝ'nan ah ne zah'nan pim so za joŋzahsyiŋ ne sooje syeera kiŋ yaŋ ah na ma kǝpel kŋ, kul sooje vaŋno kal pelle, za joŋzahsyiŋ matǝ rǝŋ mai moo ulra kokõorĩi gera mor ɓǝǝra, so za joŋzahsyiŋ ma ɓaŋ sunduku Dǝɓlii kalra ge fahfal ɓǝǝra, so kul sooje ma byak ah ge gŋ. Ne cok mo tǝ syeera a ɗah ulra kokõorĩi. 14Ne zah'nan gwa ah kiŋra yaŋ ah ɓal vaŋno kpǝ, so pii soora ge pǝ cok ɗǝrri. Ŋhaa joŋra nai zah'nan yea.
15Ne zah'nan rǝŋ ah urra ka zah'nan cee ɓe, ge kiŋra yaŋ ah na mai moo joŋra ɓaa, amma kiŋra zahlǝŋ rǝŋ, sai kiŋra yaŋ ah zahlǝŋ rǝŋ com moo to. 16Zahlǝŋ rǝŋ ah mo kiŋra zyaŋ o, za joŋzahsyiŋ tǝ yah ul kokõorĩi o, Joswa faa nyi zana: We dahgor o, mor Dǝɓlii soɓ yaŋ ah jol ɓii ɓe. 17We ɓeɓ yaŋ ah tǝkine fan mai mo no gŋ daŋ, mor Dǝɓlii nǝǝ ɓo ka ɓeɓɓe. Sai we soɓ Rahaɓ mawin tǝkoi ne cee tǝkine za mai mo ne ki yaŋ ahe, mor woo za mai na pee ra ka foo sǝr mokki. 18Amma we byak suu ɓii wo fan mai mo nǝǝ kan ne tǝkẽawãk ka vǝrri#6:18 Mo ẽe Lew 27:28,29 tǝkine ɓǝ mai mo ŋwǝǝ ɓo mor ahe., cwaa fan zahzyil mo kǝǝ we ge ɓaŋ fan mai mo soɓ ɓo ne tǝkẽawãk ka, mor we joŋ nai ɓe, we ga kǝǝ tǝkẽawãk ah ge tǝ cok ɗǝr Israel, a ga rǝk bone tǝ ɓiiri. 19Amma vãm solai ah ne vãm kaŋnyeeri ne vãm fuu ah tǝkine masyẽ ah daŋ nǝǝ ɓo mor Dǝɓlii, a ga rǝk pǝ yaŋ rǝk fan Dǝɓlii.
20Ne cok za mo laara cii kokõorĩi, so dahra gor pǝ'manne, ɓaale yaŋ ah lee ge sǝŋ, za yeera tǝl ah dan ge tǝgǝǝ yaŋ, zune daŋ a syee ga pel ah jaŋjaŋ. Rera yaŋ ahe.#Yahu 11:30 21Ikra fan mai mo yaŋ ah daŋ ne kafahe, za wǝǝre, ŋwǝǝre, wee nyeere, ne za tamme, dǝǝ ne gwii tǝkine korro daŋ.
22Joswa faa nyi za matǝ gwa mo ge foora sǝr ah kŋ: We dan ge yaŋ mawin tǝkoi we pǝ̃ǝ ge lal ne ki tǝkine zan ah ra daŋ tǝgbana mai we haa zah nyi ko. 23Tǝbanna matǝ gwa ma foo sǝr danra ge ɓǝr yaŋ pǝ̃ǝra ge lal ne Rahaɓ ne pah ah ne mam ne wee pam tǝkine za mai mo ne ki daŋ. Pǝ̃ǝra ge lal ne ki ne zahzum ah ra daŋ, ge rǝkra ra fahfal cok ɗǝr za Israel lalle. 24Ɓaara wii nyi yaŋ ah tǝkine fan mai mo gŋ daŋ, sai soɓra vãm solai ne vãm kaŋnyeeri ne vãm syẽ tǝkine ma vãm fuu, ge rǝkra pǝ yaŋ rǝk fan Dǝɓlii. 25Joswa soɓ Rahaɓ mawin tǝkoi ne cee ne za yaŋ pah ah tǝkine zahzum ah daŋ, mor mok za mai Joswa mo pee ka foo yaŋ Jeriko. (Morsǝ̃ǝ Rahaɓ no kǝsyil za Israel ŋhaa tǝ'nahko.)#Yahu 11:31
26Ne cok ah Joswa faa ɓǝ ne haazah faa: Dǝɓ mai moo ga ur ka vuu yaŋ Jeriko mai zahyee ga yea tǝl ah pel Dǝɓlii. A ga kpii mor yaŋ ah tǝ welii ahe, a ga cea zahfah ah ra tǝ kahkǝr ahe.#1 ZaG 16:34
27Dǝɓlii no ne Joswa, tǝɗii ah myah wo sǝr daŋ.
Bible Moundang © Alliance Biblique du Tchad, 1996.