JOSWA 4
4
Woora tǝsal jemma tǝ gwa pǝ el Yordan
1Ne cok za mo yeera el Yordan vǝrri, Dǝɓlii faa nyi Joswa: 2We syen za jemma tǝ gwa, we nǝǝ dǝɓ kǝsyil zahban daŋ vaŋno vaŋno. 3Mo faa nyi ra sye: We woo tǝsal jemma tǝ gwa daga pǝ cok mai ɓal za joŋzahsyiŋ mo uu ɓo gŋ pǝ el Yordan ka we yee ne ko, ka we ge rǝk pǝ cok swul mai we ga swah gŋ ne suŋni.
4Joswa ɗii za jemma tǝ gwa mai mo syen ra kǝsyil za Israel, 5faa nyi ra: We yee pel sunduku Dǝɓlii Masǝŋ ɓii pǝ el Yordan, koo zune kǝsyil ɓii mo ɓaŋko tǝsal kan tǝbǝǝsah ah vaŋno tǝgbana pãa ban za Israel. 6Mor ka mo yea kǝsyil ɓii tǝgbana fan ma cuu fanne, mor ka wee ɓii mo ge fiira tǝ'nan ne faa tǝsal mai 'yah cuu fẽe wo ɓii ne ɓe, 7ka we zyii faa nyi ra: Ne cok sunduku gbanzah Dǝɓlii mo tǝ yee el Yordan, bii ah woŋ kǝsyil gwa. Tǝsal rai ga yea wo za Israel na fan ma foo ɓǝ ah ga lii.
8Za Israel joŋra tǝgbana mai Joswa mo faa nyi ra, woora tǝsal pǝ el Yordan jemma tǝ gwa na mai Dǝɓlii mo faa nyi Joswa, tǝgbana pãa ban za Israel, yeera kal ge pǝ cok swul ɓǝǝ ne ko rǝk ra gŋ. 9So Joswa pea tǝsal jemma tǝ gwa pǝ el Yordan pǝ cok mai ɓal za joŋzahsyiŋ ma ɓaŋ sunduku gbanzah mo uu gŋ. Tǝsal ah no gŋ ŋhaa tǝ'nahko. 10Za joŋzahsyiŋ ma ɓaŋra sunduku gbanzah uura pǝ el Yordan ŋhaa fan mai Dǝɓlii mo ree nyi Joswa ka faa nyi za Israel daŋ joŋ vǝrri, tǝgbana mai Mosus mo faa nyi Joswa daŋ.
So za hǝǝra yee elle. 11Ne cok za mo yeera vǝrri, za joŋzahsyiŋ ma ɓaŋra sunduku gbanzah Dǝɓlii yeera ne nahnǝn za daŋ. 12Ban Ruben ne Gad tǝkine raita ban Manasse mai mo zyeɓra suu sal ɓo yeera kǝpel nyi za daŋ tǝgbana mai Mosus mo faa nyi ra, 13pãa ɓǝǝ tǝgbana ujenere jemma nai, pǝ̃ǝra pel Dǝɓlii mor ka ga ruu sal pǝ cok tǝforoŋ kah yaŋ Jeriko. 14Com ah Dǝɓlii yii Joswa ne nahnǝn za Israel daŋ. Ɗuura ko tǝgbana mo ɗuura gal Mosus ne zah'nan cee ah daŋ.
15Dǝɓlii faa nyi Joswa: 16Mo ree nyi za joŋzahsyiŋ ma ɓaŋra sunduku gbanzah mo yeera pǝ el Yordan ge lalle. 17So Joswa faa nyi za joŋzahsyiŋrĩ: We yee gin pǝ el Yordan ge lal o. 18Ne cok za joŋzahsyiŋ ma ɓaŋra sunduku gbanzah Dǝɓlii mo yeera gin pǝ el Yordan, ɓal ɓǝǝ mo kan ge tǝ sǝr mayak zahgeere, bii Yordan pii soo ge pǝ cok ahe, kal tǝ ɗuu na matãa, a ne zahcii ah lǝkahm lǝkahm.
19Za yeera el Yordan ne fĩi patǝ vaŋno ah ne zah'nan jemma ahe. Ge ɗǝrra Gilgal tǝ zahsyee Jeriko nǝfah kǝmorcomzah'nanne. 20Tǝsal matǝ jemma tǝ gwa mai mo woora pǝ el Yordan, Joswa pea ge sǝŋ Gilgal. 21So faa nyi za Israel: Ne cok wee ɓii mo ge fiira we comki tǝsal mai 'yah cuu fẽene ɓe, 22ka we cuu mor ah nyi wee ɓii we faa: Za Israel yeera el Yordan mai ne ɓal yakke. 23Mor Dǝɓlii Masǝŋ ɓii yak bii el Yordan pel ɓii ŋhaa we yeeni, tǝgbana Dǝɓlii Masǝŋ ɓii mo joŋ ne mabii Syẽ, yak bii ah pel man ŋhaa na yeeni. 24Fan ah joŋ mor ka za sǝr daŋ mo tǝra, Dǝɓlii a pǝswahe, ka awe laŋ we yea ne ɗuu gal Dǝɓlii Masǝŋ ɓii cẽecẽe.
Bible Moundang © Alliance Biblique du Tchad, 1996.