JOSWA 18
18
Woŋra tǝcoŋ sǝr Kanaan
1Fahfal mo rera sǝr ah daŋ vǝrri, za Israel daŋ taira ge Silo, ɓyakra jul mbǝro ma tai pǝ cok ahe. Sǝr daŋ a pel za Israel.
2Ne cok ah ban Israel mai mo lwaara zah sǝr ma ɓǝǝ ka kaara gŋn a ba coŋ ɓo rǝŋ. 3Joswa faa nyi za Israel: We byak fẽe ne ga ren sǝr mai Dǝɓlii Masǝŋ pa ɓii lii ra mo nyi nyi we ka ren ne? 4We kyeɓ za sai gee me ne ko, we nǝǝ ra gin kǝsyil zahban daŋ, me ga pee ra ka mo ge kyãhra tǝ sǝr ah daŋ, ka mo ẽera ɓǝ sǝr ah ge ne ko tǝgbana mai mo ẽera ɓo ka woŋni, fahfal ah ka mo so gera wo ɓe ne ɓǝ ahe. 5Mo woŋra sǝr ah zahlǝŋ rǝŋ, Yuda mo kaa pǝ sǝr ah nǝfah morkǝsǝŋ, za Yuseɓ laŋ mo kaara pǝ sǝr ah nǝfah kǝsǝŋ. 6Amma we ɗea sǝr ah camcam rǝŋ ka we so gee me nyee ne ko. Ame laŋ me ga i cahcah nyi we tǝl ah nyee pel Dǝɓlii Masǝŋ mana. 7Lewitien ka ne zah sǝr ma ɓǝǝ kǝsyil ɓiir a, yeɓ zahsyiŋ Dǝɓlii ye zah faren ɓǝǝra. Gad ne Ruben tǝkine raita ban Manasse lwaara zah sǝr ma ɓǝǝ kah el Yordan nǝzakǝŋhaa nǝfah kǝmorcomzah'nan ɓe, Mosus dǝɓ yeɓ Dǝɓlii ye nyi ra.
8Ne cok za rai mo urra ka ga ẽe sǝr ahe, Joswa faa nyi ra: We ge kyãh sǝr ah daŋ, we ẽere, ka we pii soo gee me ne ɓǝ ahe, so me ga i cahcah nyi we tǝl ah Silo nyee pel Dǝɓlii. 9Za rai urra kal ge kyãh tǝ sǝr ah daŋ, ŋwǝǝra sǝr ah pǝ ɗerewol camcam rǝŋ tǝgbana pãa yaŋ maluu mo gŋ, so pii soora ge wo Joswa ne pǝ cok ɗǝr Silo. 10So Joswa i cahcah nyi ra tǝl ah Silo pel Dǝɓlii. Joswa wom sǝr nyi za Israel pǝ cok ah tǝgbana woŋ ɓǝǝ mo woŋra ɓo.
Zah sǝr mǝ ban Benyaamin
11Ne cok mo ira cahcah ah o, ako ye cuu zah sǝr mǝ wee Benyaamin nyi ra ne za ɓǝǝra. Cahcah ah woŋ zahsyee sǝr nyi wee Yuda tǝkine wee Yuseɓ. 12Zahsyee ɓǝǝ ma nefah kǝsǝŋ tǝŋ daga kah el Yordan so yee ge kah waa nǝfah kǝsǝŋ Jeriko, so pǝ̃ǝ ge tǝ waa nǝfah kǝmorcomlilli, ŋhaa zah ah ge kan ne kǝsyicok Bet-Haven. 13So ur gin gŋ pǝ̃ǝ ge Lus nǝfah morkǝsǝŋ ahe, (tǝgba faa: Betel), so zahsyee ah ɗǝr kal Atarot-Addar nǝfah morkǝsǝŋ Bet-Horon ma morkǝsǝŋ. 14So zahsyee ah kiŋ kal ge fah kǝmorcomlilli, so kiŋ pee tǝtǝl kal ge nǝfah morkǝsǝŋ kah waa mai mo ɓyaŋ ki ɓo ne Bet-Horon nǝfah morkǝsǝŋ ah ka ga Kirjat-Ba'al mai ako ye mo Kirjat-Jearim, yaŋ mǝ wee Yuda yo, a nǝfah kǝmorcomlilli. 15Ma nefah morkǝsǝŋ laŋ, zahsyee ah tǝŋ daga kah Kirjat-Jearim, so syee kal ge nǝfah kǝmorcomlil ŋhaa ge pǝ̃ǝ kah biikyaŋ Neftoa gwari. 16So zahsyee ah ɗǝr zoo ge kah waa mai mo jaŋjaŋ ne cok tǝforoŋ Ben-Hinnom pǝ cok tǝforoŋ Refaim nǝfahsǝŋ ahe. Zahsyee ah so ɗǝr ge pǝ cok tǝforoŋ Hinnom nǝfah kǝ Jebusien ma morkǝsǝŋ, ŋhaa pǝ̃ǝ zoo kal ge yaŋ En-Rogel. 17So ur gin gŋ kal ge nǝfahsǝŋ, so pǝ̃ǝ kal ge En-Semes, so ur gin gŋ ge Gelilot mai mo gwari ne cok yee ga Adummim, so ɗǝr kal ge tǝ tǝsal Bohan. (Bohan ye we Ruben.) 18Zahsyee ah ge pǝ̃ǝ kah waa Bet-Araba nǝfahsǝŋ, so kal ge kǝsyicokki. 19Zahsyee ah so pǝ̃ǝ zoo kah waa Bet-Hogla nǝfahsǝŋ, so pǝ̃ǝ ge kan ne zah mabii Wul nǝfahsǝŋ ahe, zah ah ma nefah morkǝsǝŋ el Yordan. 20Ma nefah kǝmorcomzah'nan laŋ zahsyee sǝr ah ge kan ne el Yordan. Sǝr ah ne zahsyee ah daŋ mǝ ban Benyaamin ye ne za yaŋ ɓǝǝra.
21Yaŋ mǝ ban Benyaamin ne morsǝ̃ǝ ah a naiko: Jeriko, Bet-Hogla ne Emek-Kesis, 22Bet-Araba, Zamaraim ne Betel, 23Avim, Para ne Ofra, 24Kefar-Ammonai, Ofni ne Geeba, yaŋ maluu jemma tǝl nai tǝkine yaŋ manyee ah ra. 25Gibeon, Rama ne Beerot, 26Mispa, Kefira ne Matsa, 27Rekem, Jirpeel ne Tarala, 28Zeela, Elef ne Jebus mai ako ye mo Jerusalem ne Gibea, tǝkine Kirjat-Jearim, yaŋ maluu jemma tǝ nai tǝkine yaŋ manyee ah ra. Mai daŋ yaŋ mǝ ban Benyaamin ye ne za ɓǝǝra.
Bible Moundang © Alliance Biblique du Tchad, 1996.