YAKUƁ 2
2
We joŋ za camcam ka
1Wee pa ɓe, we ɓeɓ iŋ ɓii mai we ne ko pǝzyil Dǝɓlii man Yesu Kristu mayǝkki, ne joŋ za camcam ka. 2Tǝgbana dǝɓ ki mo pa joŋ yo, mo dan ge yaŋ kee ɓǝ Masǝŋ ɓii mo maa tǝgaa vãm kaŋnyeeri ɓo jolle, mo ɓoo mbǝro masãh ah ɓo taa ɓe, so pa syak mo dan ge gŋ ne mbǝro matãa wo suu ah ɓe, 3we ẽe dǝɓ mai mo ɓaa fan sãh ɓo wo suu we so faa nyi ko: Mo ge kaa pǝ cok masãh ah nyeeno ɓe, so we faa nyi pa syak: Mo uu ɓo ŋhaano, wala: Mo kaa ge tǝ sǝr mor ɓal ɓe nyeeno ɓe, 4ka we joŋ za tǝ gwa rai ɓo ka camcam pǝ zahzyil ɓii ya ne? Ka ɓǝ foo ɓii ka pǝɓe' ya ne?
5Wee pa ɓe mai me 'yah we, we laa ɗao. Masǝŋ ka syen za masyak ah pel za sǝr nyee ka joŋ ra pǝkǝ̃ǝ ne iŋ ka ga ren goŋ ah mai mo faa ɓǝ ah ɓo ka nyi nyi za ma 'yahra ko ya ne? 6Amma awe syẽa pa syakke! So za joŋ jeera we ɓo, ka gbahra we ga pel za kiita ne ya ne? 7Ara yee tǝǝ tǝɗii sãh ɓii mai Masǝŋ mo ɗii we ɓo ne ko.
8We tǝ syee mor ɓǝ malii mai mo faa ɓo pǝ Ɗerewol: Mo 'yah jǝk ɓo tǝgbana moo 'yah suu ɓo ɓe, ka we tǝ joŋ pǝsãhe.#Lew 19:18 9Amma we tǝ joŋ za camcam ɓe, ka we tǝ joŋ faɓe', ɓǝ lai a gban we mor we ka tǝ syee mor ah ya. 10Mor koo zune moo syee mor ɓǝ lai daŋ, so mo zyak ɓǝ ah gin gŋ vaŋno ɓe, ka zyak ɓǝ lai ɓo ne lii ah daŋ. 11Mor Masǝŋ mai mo faa: Mo joŋ ɓǝǝ ka, so faa laŋ: Mo i wul ka ta. Mo ka joŋ ɓǝǝ ya, amma mo so i wul ɓe, ka mo zyak ɓǝ lai ɓe.#Pǝ̃ǝ 20:13,14; CuuƁ 5:17,18 12We faa ɓǝ ɓe, we joŋ fan ah ge cok ah tǝgbana za mai ɓǝ lai ma wǝǝ dǝɓ ye mo tǝ ga ŋgoŋ kiita ɓǝǝra. 13Mor Masǝŋ ka tǝ ga kwo syak tǝ pa ma bai kwan syak tǝ za ki ne cok mo tǝ ga ŋgoŋ kiita ah ya, amma kwan syak a ga ɓoo kiita.
Iŋ ma bai yeɓ iŋ wul o
14Wee pa ɓe, dǝɓ mo faa zye ne iŋni, so mo joŋ yeɓ sãh ne ya ɓe, ɓǝ ah ga joŋ fẽe wol ah ne? Iŋ ma morãi ga ǝ̃ǝ ko no ne? 15Naa ma ɓo maworre, wala mawinni, ara mo ka ne fan wo suu ɓǝǝ pǝsãh ya, so koŋ tǝ in ra ta, 16so dǝɓ ki kǝsyil ɓii mo faa zah kol nyi ra: Masǝŋ mo ẽe we, we noo wii, we re farel ka we ge jam o la, amma we nyi fan mai suu ɓǝǝ mo tǝ 'yah nyi ra ya ɓe, ɓǝ faa ah a ne reba fẽe wo ɓǝǝ ne? 17Iŋ laŋ a nai ta, mo ka ne yeɓ sãh ya ɓe, ka iŋ ma wul ah yo.
18Amma dǝɓ ki ga faa: Amo, mo ne iŋni, ma ɓe me ne yeɓɓe. Me faa sye, mo cuu iŋ ɓo ma bai yeɓ nyi me ɗao, ame laŋ me ga cuu iŋ ɓe nyi mo ne yeɓ mai mee joŋni. 19Amo nyiŋ ɓo: Masǝŋ a vaŋno to. Mo joŋ ɓo pǝsãhe. Amma coksyiŋ laŋ nyiŋra ɓo nai ta, so a coora ne gal coo. 20Amo tǝgwĩi no! Pǝram mo tǝ: Iŋ ma bai yeɓ ka joŋ fan ki ya. 21Pa man lii Abraham ciŋ dǝɓ matǝ njaŋ ah pel Masǝŋ mor yeɓ sãh ah ne cok mo ɓaŋ nan ah Isak sor ge tǝ cok joŋ syiŋ ya ne?#Tǝŋ 22:1-14 22Mo kwo ɓe ne? Iŋ ah ne yeɓ ah taira ki cok vaŋno, so yeɓ ah mo joŋko ye joŋ iŋ ah pǝyǝkki. 23Ɓǝ mai Ɗerewol mo faa, goŋga yo. Faa: Abraham nyiŋ Masǝŋ, so Masǝŋ nyiŋ ko na dǝɓ matǝ njaŋ ah mor iŋ ahe. Masǝŋ ɗii ko ne bai ahe.#Tǝŋ 15:6; 2 KeeƁ 20:7; Esa 41:8 24We kwo ɓe ne? Dǝɓ ka gak yea njaŋ pel Masǝŋ mor iŋ ah mo nyiŋ ɓo to ya, amma iŋ ah a tai ne yeɓ ah moo joŋni.
25Matǝkoi ma ɗii ne Rahaɓ joŋ nai ta. Ciŋ mawin matǝ njaŋ pel Masǝŋ mor yeɓ ah ne cok mo nyiŋ zapee Yahuduen yaŋ ahe, tǝkine mai mo so pee ra ɓaŋ fahlii maki ah cam kalle.#Jos 2:1-21 26Tǝgbana suu mai tǝ'yak mo ka gŋ ya wul o, nai ta, iŋ ma bai yeɓ laŋ ka iŋ wul o.
Bible Moundang © Alliance Biblique du Tchad, 1996.