ESAIA 64
64
1Mor fẽe mo ŋgǝ̃ǝ coksǝŋ ka mo gbǝr mo ɗǝr ge sǝŋ ya ne? Waa ga kwora mo, a ga ɗuura galle. 2A ga coora coo tǝgbana wii moo zǝǝ bii zǝǝre. Mo ge mo cuu swah ɓo nyi za syiŋ ɓo. Mo joŋ za sǝr ka mo coora pel ɓo coo. 3Amo ge, mo joŋ dǝǝbǝǝri mai ru kwo wala laa ɓǝ ah taa ya. Waa kwora mo, so laŋra ne gal geri geri.#1 Kor 2:9 4Koo dǝɓ vaŋno laa wala kwo Masǝŋ maki ah ma na mo, ka ǝ̃ǝ za mai mo soɓra suu ɓǝǝ wol ah taa ya. 5Amo nyiŋ za mai moo laara pǝ'nyah ne joŋ fan matǝ njaŋ ahe, za mai moo syeera tǝgbana mo 'yahe. Amo ɓaŋ kpãh ɓo ne ru, amma so ru joŋ faɓe', ru 'yaŋ kpãh ɓo malii ah urri, ru joŋ faɓe' ge pel tǝgbana matãa. 6Aru daŋ ru ye za joŋ faɓe', yeɓ sãh ɓuu a tǝgbana mbǝro mai mo ii ɓo ne 'nahmme. Aru tǝgbana goo kpuu mayak ah mai zyak moo woo kal ne ko mor faɓe' mai ruu joŋni. 7Koo dǝɓ ma juupel wo ɓo vaŋno kǝka, dǝɓ ma ga wo ɓo mor fii gbah jol vaŋno laŋ kǝka ta. Amo muŋ suu ɓo ɓo wo ɓuuru, mo soɓ ru ɓoo ɓo mor faɓe' ɓuu ruu joŋni.
8Amma Dǝɓlii, amo ye pa ɓuuru, aru tǝgbana vuuri, amo ye pa vuu ahe, mo ye joŋ ru daŋ. 9Mo ɓaŋ kpãh tǝ ɓuu pǝ'man nai ka, mo foo ɓǝ faɓe' ɓuu ge liilii kao, mor aru ye za ɓo, mo kwo syak tǝ ɓuuru. 10Yaŋ ɓo maluu mai mo nǝǝ ra ɓo kŋ ciŋra cok kol ɓe. 11Jerusalem ciŋ fǝl ɓe, yaŋ Masǝŋ ɓuu mai mo daŋdaŋ pǝ cok masãh ah mai pa ɓuu lii mo yea tǝ yiira mo gŋ kŋ sye wii ɓe, cok mai ru 'yah pǝlli daŋ ciŋ fǝl ɓo ta. 12Dǝɓlii, ɓǝ ah mo joŋ ɓo naiko, mo ga kaa 'wa nai bai joŋ ɓǝ ki ka soɓ ru laa bone kal tǝ mai ruu gak uu gŋ ne?
Bible Moundang © Alliance Biblique du Tchad, 1996.