ESAIA 61
61
Ɓǝ 'nyah ǝ̃ǝre
1Dǝɓlii baa zahzyil ɓe ne Tǝ'yak ahe. Ako ye nǝǝ me, so pee me ka me cuu ɓǝ 'nyah nyi za syakke, ka me wuu zahzyil nyi za mai mo tǝ swaara ɓǝ, ka me faa ɓǝ wǝǝ za mai mo pǝ byak zah sǝr za ki, tǝkine ɓǝ wǝǝ za mai ara mo pǝ daŋgai nyi ra.#Mt 11:5; Lu 7:22#Lu 4:18-19 2Pee me ka faa zah'nan mai Dǝɓlii mo ga ǝ̃ǝ zan ah ne ge ɓe, so a ga cuu swãa za syiŋ ɓǝǝra. Pee me ka me swaa zahzyil nyi za mai mo tǝ yera yee.#Mt 5:4 3Ka me nyi laa pǝ'nyah tǝkine 'nyah suu nyi za mai mo kaara ɓo Sion zahwaa bone, ka me nyi ɗǝǝ lǝŋ nyi ra pǝ zah zahwaa ɓǝ swaani. Dǝɓlii ne suu ah ako ye ga byak ra, a ga zyeera tǝgbana kpuu moo zyee goo. Zune daŋ a ga joŋ fan matǝ njaŋ ahe, za ga yiira Masǝŋ mor fan mai mo joŋko ɓo. 4A ga vuura yaŋ mai mo yea ciŋ fǝl ɓo daga ɓaaɓe.
5Za Jerusalem, za gwǝǝ ga joŋra mor ɓiiri, a ga piira ŋgaɓ fan ɓiiri, a ga pǝǝra 'wah nyi we, a ga byakra kpuu vin ɓii ra. 6Amma ma ɓii a ga ɗiira we ne za joŋzahsyiŋ Dǝɓlii, we ga laa pǝ'nyah ne joŋ za gwǝǝre. We ga yii suu ɓii ne faa ŋ ma ɓii yo. 7Swãa mai we yea tǝ cuu tǝkine gaɓ mai we laa daŋ ga i zahe, we ga kaa pǝ sǝr ma syak ɓiiri, joŋ ɓii ga ɓoo ga pel zahlǝŋ gwa, we ga laa pǝ'nyah ga lii ga lii.
8Dǝɓlii faa: Me 'yah ɓǝ matǝ goŋga, me syiŋ hǝram ne ɓǝɓe' ɓo. Me ga soo za ɓe pǝsãhe, me ga gbǝ zah ma ga lii ne ra. 9A ga yeara pǝyǝk kǝsyil za sǝrri, koo zune mo kwo ra ɓe daŋ a ga tǝ, za mai Dǝɓlii mo ẽe ra ɓo kŋ yo.
10Jerusalem tǝ laa pǝ'nyah mor fan mai Dǝɓlii mo joŋ ɓo, a tǝgbana woi mai mo zyeɓ fagai ah ge ɓo wo suu mor ɓaŋ worre. Masǝŋ ɓoo ǝ̃ǝ ɓo nyi na mbǝro tǝkine swah ka kaa kacella.#Caŋ 21:2 11Dǝɓlii ga ǝ̃ǝ zan ahe. A ga ǝ̃ǝ ra tǝgbana nah fan moo ciŋni so moo giŋni. Za sǝr daŋ a ga yiira ko mor ɓǝ ahe.
Bible Moundang © Alliance Biblique du Tchad, 1996.