ESAIA 6
6
Masǝŋ ɗii Esaia ka joŋ yeɓ profeto Masǝŋ
1Ne syii mai goŋ Osias mo wuu, me kwo Dǝɓlii kaa ɓo tǝ fakal ma'man ahe, a pǝyǝkki, mbǝro ah baa yaŋ Masǝŋ ne lii ah daŋ kǝrkǝr.#2 ZaG 15:7; 2 KeeƁ 26:23 2Angelos maswah uura ɓo kah ahe, ara daŋ ne yee yea yea. Angeloi ah vaŋno vaŋno daŋ a rii zahpel suu ah ne yee gwa, a rii suu ah ne gwa, so a soɓ yee gwa mor ka zoo ne ko. 3A ɗiira ki naiko: Daŋdaŋ, daŋdaŋ, daŋdaŋ! Dǝɓlii ma ne swah tǝ fan daŋ, a daŋdaŋ! Yǝk ah baa sǝr ɓo ne lii ah daŋ kǝrkǝr.#Caŋ 4:8
4Kyaŋ ɓǝ faa ɓǝǝ joŋ mor yaŋ Masǝŋ daŋ laŋ geri geri, suŋwii baa ɓǝr yaŋ Masǝŋ kǝrkǝr.#Caŋ 15:8
5Ame faa: Bone lwaa me ɓe, tǝ'nah me zyak ɓe, ɓǝ faa tǝkpuuzah ɓe daŋ a pǝɓe', mor ame kaa ɓo kǝsyil za mai ɓǝ faa zah ɓǝǝ daŋ mo pǝɓe' tǝkine vǝrvǝrri. Zǝzǝ̃ǝko nahnǝn ɓe kwo Goŋ ɓe, ako ye Dǝɓlii ma ne swah tǝ fan daŋ.
6So angelos vaŋno kǝsyil angeloi ah ra zoo tǝ ge wo ɓe sǝŋ, ɓaŋ yakwii mai mo pǝ cok joŋ syiŋ ne tǝfẽa ge wo ɓe ne ko. 7Ge juu zah nyi me ne yakwii ah faa: Fan mai juu zah ɓo, zǝzǝ̃ǝ mai ɓǝɓe' ɓo kal ɓe, faɓe' ɓo daŋ rwah ge lal ɓe.
8So me laa Dǝɓlii faa: Me ga pee zune? Azu ye ga yea pa pee man ne? Ame zyii faa: Mo pee me o, me ganne.
9So faa nyi me: Mo gyo, mo ge faa nyi za sye: We ga laa ɓǝ pǝlli, amma we ka ga tǝ mor ah ya, we ga kwo fan pǝlli, amma we ka ga tǝ mor ɓǝ fan ah ya.#Mt 13:14-15; Mk 4:12; Lu 8:10; Yoh 12:40; Yeɓ 28:26-27 10So faa nyi me: Mo joŋ zahzyil ɓǝǝ ka mo foora ɓǝ ka. Mo lǝr sok ɓǝǝra, mo rǝ̃ǝ nahnǝn ɓǝǝra, mor ka mo gak laara ɓǝ wala kwo cok ka, mor ka mo lwaara pii soo ge wo ɓe ka me laɓ ra ka.
11Ame fii ko faa: Dǝɓlii, fan ah ga joŋ i zah nekẽne? Zyii zah ɓe faa: Sai ka yaŋ maluu daŋ za vǝr gin gŋ ciŋ gboŋ ɓe, ŋhaa sai ka yaŋ daŋ dǝfuu kǝka gŋ yao, sai ka sǝr daŋ ciŋ cok kol ɓe. 12Me ga myah zan ahe, a kalra ga cok ki pǝɗǝkki, sǝr ah daŋ a ga yea tǝkolle. 13Koo dǝɓ vaŋno kǝsyil za jemma ye mo coŋ ɓo pǝ sǝr ahe, ako laŋ ka ga yea ya ta, dǝɓ ah a ga yea tǝgbana tǝɓǝr kpuu malii ahe.
(Tǝɓǝr ah cuu: tǝtǝŋ za Masǝŋ mafuu.)
Bible Moundang © Alliance Biblique du Tchad, 1996.