ESAIA 57
57
Faɓe' za Israel
1Za matǝ goŋga ah a wukra, dǝɓ ma tan mor ɓǝ ah wala ɓaŋ syiŋ ɓǝ ah ka yea ya. Amma ne cok mo wukra ɓe, a gara pǝ cok mai bone mo ka gŋ ya. 2Za mai mo syeera jam, a ga lwaara jam tǝkine 'yah pǝ cok kal ɓǝǝra.
3Awe za faɓe' mai we pǝɓe', we ge ka mo ŋgoŋra kiita tǝ ɓiiri, mor awe zahki ne za ẽe ciŋ ne za joŋ ɓǝǝ ne za tǝkoi. 4Awe syak zu sye ne? Awe gwah ber zah zu ne tǝǝ ko sye ne? 5Awe juupel wo masǝŋ ki ra mor kpuu mapǝ̃ǝ maluu ah ra daŋ, we joŋ tǝkoi daŋ. Awe ŋgom wee ɓii pǝ cok ma tǝforoŋ ah ne pǝ yii tǝsal joŋ syiŋ ne ko. 6We woo tǝsal marwãh ah gŋ gin juupel wol ah tǝgbana Masǝŋ, awe sǝǝ ra ne yimmi, we ɓaŋ sor gin nyi ra ne ko. Awe lǝŋ fan mai daŋ me laa pǝ'nyah ne ɓǝ ah no ne? 7Awe yee ga tǝlǝǝ waa sǝŋ ka ŋgom fan joŋ syiŋ ne gŋ tǝkine joŋ tǝkoi. 8Awe kan masǝŋ ki ka foo ɓǝ ah zahfah ɓii kǝɓǝr yaŋ. Awe yaŋ me, we wǝǝ mbǝro wo suu ɓii ɓoo ga lalle, we yee ga tǝ ɗee ɓii ma'ah ne za 'yah ɓii mai we soo ra ɓo ne lak ka mo swahra ne we, so we in zah koŋ fan cwaa suu ɓii gŋ. 9Awe sah ɓǝrdi ga wo suu we tah nǝmmi, we kal ga juupel wo masǝŋ Molok. We pee zapee kal ga pǝ cok maɗǝk ahe, ŋhaa pǝ cok mai za wul mo gŋ mor ka lwaa masǝŋ ki cam mafuu ah gŋ ka juupel wo ɓǝǝra. 10Awe gaɓ suu ɓii ne kyeɓ masǝŋ ki, amma we faa sõone ru ga soɓ ɓǝ ah myah o ya. Awe lǝŋ masǝŋ ki ɓii a ga nyi swah nyi we, we ka yea pǝtǝtǝ̃ǝr a.
11Dǝɓlii faa: Azu ye masǝŋ ki rai ka we ɗuu gal ɓǝǝ we so gwah ber wo ɓe we yaŋ me tǝɗe' nai ne? We ka tǝ zyii ɗuu me yao, mor me kaa ɓo daga ɓaa me so faa ɓǝ ki ge zah ya ko ne? 12Awe lǝŋ fan mai wee joŋ a njaŋ, amma me ga joo fan joŋ ɓii mai we tǝ joŋ gin lalle, masǝŋ ki ɓii rai ka gak gbahra jol ɓii ya. 13Ne cok we yeyee ka fii gbah jol ɓe, ka masǝŋ ki ɓii rai mo ge ǝ̃ǝra we o! Zyak ga kuu a woo ra kal ne ko. Amma za mai mo soɓra suu ɓǝǝ ɓo wo ɓe, a ga nǝnra wo sǝrri, a ga juura pel wo ɓe pǝ yaŋ ɓe.
Masǝŋ faa zye ga gbah jol za 'minni
14Dǝɓlii faa: We soɓ za ɓe mo pii soora ge wo ɓe, we woo fan ma ɓee tǝ ɓal tǝl ah tǝ fahlii pel ɓǝǝ ge lalle, we zyeɓ fahlii ka mo yea pǝsãhe.
15Ame ye Masǝŋ Matǝdaŋdaŋ ma coksǝŋ mai moo yea ga lii. Ame kaa ɓo coksǝŋ pǝ cok matǝdaŋdaŋ ahe, amma me so kaa ɓo ne za mai moo swaara ɓǝ tǝ faɓe' ɓǝǝ moo wonra suu ɓǝǝ ta, mor ka swaa zahzyil ɓǝǝ tǝkine wuu tǝ'yak ɓǝǝra. 16Me nyi cee nyi za ɓe, me ka so ŋgoŋ kiita tǝ ɓǝǝ wala joŋ kpãh ne ra ga liilii yao. 17Me yea tǝ joŋ kpãh ne ra mor faɓe' ɓǝǝ ne fan cwaa ɓǝǝra. Ne kpãh mai me ɓaŋ, me ŋgoŋ kiita tǝ ɓǝǝ ne me soɓ ra ɓoo. Amma ŋwoora kyaŋ ne me so ɓaŋra fahlii suu ɓǝǝra.
18Me kwo yeɓ ɓǝǝ mo joŋra ɓe, amma me ga laɓ ra, me ga zaŋ ra syee ne ko, me ga gbah jol ɓǝǝra, me ga wuu zahzyil nyi za mai mo tǝ yera yee. 19Me ga nyi jam nyi za matǝ gwari ne za maɗǝk daŋ! Me ga laɓ za ɓe.#Ef 2:17 20Amma za maɓea ah ara tǝgbana mabii mai moo wea ne ɗul mo ka gak kaa 'wa ya, bii ah moo ŋwom ma ne. 21Dǝɓlii faa: Jam kǝka wo za faɓe' ya.#Esa 48:22
Bible Moundang © Alliance Biblique du Tchad, 1996.