ESAIA 52
52
Masǝŋ ga wǝǝ yaŋ Jerusalem
1Jerusalem, mo yea pǝswahe, mo yea pǝ'man faɗa! Yaŋ matǝdaŋdaŋ mǝ Masǝŋ, mo joŋ suu ɓo pǝyǝkki! Za gwǝǝ ka fǝ̃ǝ danra ɓǝr ɓo yao syaŋsyaŋ.#Caŋ 21:2,27 2Jerusalem, mo kǝ̃ǝ ɓǝm wo suu ɓo ge lalle! Mo ur gin tǝ sǝr mo kaa ge tǝ fakalle. Awe za Sion mai za mo gbah we ɓo, we wǝǝ celeelu sol ɓii ge lalle!
3Dǝɓlii faa nyi zan ahe: Awe ciŋ byakke, leera we ne lakr a, so ka ga soora tǝ ɓii ne lakr a ta, a ga wǝǝra we myahe. 4We yea kaa ɓo sǝr Egiɓ na gwǝǝre, so Asirien cuura syak nyi we bai mai we joŋ ɓǝ ki. 5So fan ah joŋ pǝ sǝr Babilon zǝzǝ̃ǝ nai ta, gbahra we kal ne tǝkol gakkǝkǝǝ. Za mai mo kaara swah ɓo tǝ ɓii a yiira suu ɓǝǝ tǝ ɓiiri, a ɓeɓra tǝɗii ɓe zah'nan daŋ.#Ro 2:24 6Amma pǝ zah'nan mai mo tǝ ginni, we ga tǝ, ame Masǝŋ, me ye faa ɓǝ ɓo nyi we.
7Ɓǝ dǝɓ mai mo tǝ syee gin tǝwaa cuu ɓǝ 'nyah ne ɓǝ matǝ jam a pǝ'nyah no cam. Ge cuu ɓǝ ma kaa kacella, faa nyi Sion: Masǝŋ ɓo kaa goŋ ɓe.#Na 2:1; Ro 10:15; Ef 6:15 8Za mai mo tǝ byakra yaŋ ah ɗǝǝra lǝŋ ne laa pǝ'nyahre, mor kwora Dǝɓlii tǝ pii soo gin Sion ne nahnǝn ɓǝǝra.
9Awe gboŋ yaŋ Jerusalem, we ɗǝǝ lǝŋ tǝkine laa pǝ'nyahre, mor Dǝɓlii kwo syak tǝ zan ah ǝ̃ǝ yaŋ Jerusalem ɓe. 10Dǝɓlii cuu swah ah malii ǝ̃ǝ zan ah ne ɓe, za sǝr daŋ ga kwora ɓǝ ahe. 11Za mai wee woo fan ma joŋ yeɓ pel Masǝŋ daŋ, we zolle, we pǝ̃ǝ gin Babilon. We juu fan mai Masǝŋ moo kwan na a ne 'nahm ka, we byak suu ɓii ka we yea pǝsãh pel Masǝŋ, we soɓ yaŋ ahe.#2 Kor 6:17 12Mor we ka ga pǝ̃ǝ gin gŋ ne hǝǝ kal a, we ka lal ɗuu gin gŋ ɗuu ya. Dǝɓlii Masǝŋ ɓii ye ga zaŋ we syee ne ko, ako ye ga byak we tǝ fahlii syel ɓii daŋ.
Dǝɓ yeɓ Dǝɓlii (Patǝ nai ɓǝ ahe)
13Dǝɓlii faa: Dǝɓ yeɓ ɓe ga yea ne pejii pǝzyil yeɓ ah daŋ, a ga yea gŋ pǝ'manne, a ga yea pǝyǝk pǝlli. 14Ne cok za pǝlli mo kwora ko, ɗuura galle, mor cok nahnǝn ah fer ɓo ka kwan na mǝ dǝfuu yao. 15Amma ga pel laŋ, za pǝlli ga kaara tǝl ah gǝriŋ, za goŋ ka ga gbǝrra ɓǝ ki ga zah biŋ pel ah ya, a ga kwora fan tǝkine laa ɓǝ matǝ gǝriŋ ah mai mo tǝra ɓǝ ah taa ya.#Ro 15:21
Bible Moundang © Alliance Biblique du Tchad, 1996.