ESAIA 48
48
Masǝŋ cuu fan mai mo tǝ ga joŋ pelle
1Awe za Israel morsǝ̃ǝ Yuda, we laa ɓǝ maino. Awe haa zah ne tǝɗii Dǝɓlii, awe juupel wo Masǝŋ Israel. Amma we ka tan mor ɓǝ mai awe ne suu ɓii wee faa ya. 2Awe yii suu ɓii we faa awe ye wee yaŋ matǝdaŋdaŋ ahe, awe gbǝ ɓǝ Masǝŋ Israel mai moo ɗii ne Dǝɓlii ma ne swah daŋ ɓo.
3Dǝɓlii faa nyi za Israel: Me faa ɓǝ fan mai mo ga joŋ pel ɓo daga ɓaaɓe, so me soɓ fan ah ɓo tǝ joŋ zǝzǝ̃ǝko. 4Mor me tǝ ɓe, zahzyil ɓii pǝyak tǝgbana vãmme, a tǝgbana vãm syẽ mai mo ka gak rãa ya. 5Ame faa ɓǝ ɓii ma pel ɓo daga ɓaaɓe, me hǝǝ faa ɓǝ ah ɓo ka fan ah ɓah joŋ ya ba, ka we faa sõone masǝŋ ɓii ra ne foto ɓii ra ma ɓaŋ ne vãm syẽ ye ge joŋra fan ah ɓo ka.
6Fan mai me hǝǝ faa ɓǝ ah ɓo kǝpel ɓaa daŋ tǝ joŋ zǝzǝ̃ǝko, wee gak joŋ syedowal ah ɓe, we faa, me faa goŋga ɓo. Zǝzǝ̃ǝko me ga faa ɓǝ mafuu ah mo tǝ gin nyi we, koo me faa ɓǝ ah ɓo ka nyi we kǝpel ɓaa ya laŋ ko. 7Amma me tǝ soɓ ɓǝ ah joŋ zǝzǝ̃ǝko, so ɓǝ ma morãi joŋ taa ya ba. Ko ka ɓǝ ah mo ge tǝ joŋ ɓe, ka we faa sõone we tǝ ɓǝ ah ɓo daga ɓaaɓe ka. 8Me tǝ ɓe, awe ye ka zan a, we ye za ŋwookyaŋ daga byaŋ ɓiiri, mor ah we ka gak laa mor ɓǝ fan mai ya, ɓǝ ah ka gak ga sok ɓiir a.
9Me soɓ ɓaŋ kpãh mai me ɓaŋ ɓo, mor ka za mo yiira tǝɗii ɓe, me ga rõmme, me ka muŋ we yao. 10Ame lii we ne bone tǝgbana dǝɓ moo hǝǝ vãm solai tǝ wii ka mo yea pǝsãhe, amma ame lwaa we ka pǝsãh ya. 11Ɓǝ mai me tǝ joŋ daŋ me joŋ mor tǝɗii ɓe, me ka soɓ dǝɓ ki ɓeɓ tǝɗii ɓe wala nyiŋ yǝk ɓe kaa ne ya ta.
Ɓǝ Kirus mai Masǝŋ mo nǝǝ ko kan ɓo
12Awe za Israel, za mai me ɗii we ɓo, we laa! Ame ye Masǝŋ vaŋno to, me ye tǝtǝŋ fan daŋ, me ye in zah fan daŋ ta!#Esa 44:6; Caŋ 1:17; 22:13 13Jol ɓe ye kpii mor dunia, so me ye joŋ coksǝŋ ɓo. Ne cok fẽene daŋ me ɗii sǝr ne coksǝŋ ɓe, a zoo pǝ̃ǝra uu ga lal taŋraŋ sǝ.
14Awe daŋ we tai ge, we laa! Azu ye kǝsyil masǝŋ ki rai gak cuu ɓǝ dǝɓ mai me nǝǝ ɓo mor ka ga ruu sal ne Babilon so a ga joŋ fan mai me 'yah ka mo joŋko daŋ ne? 15Ame ye faa ɓǝ ahe, me so ɗii ko, me zaŋ ko, me joŋ ko ka mo yeako ne pejii pǝzyil yeɓ ah daŋ.
16Zǝzǝ̃ǝko we tǝɓ ge wo ɓe, we laa ɓǝ mai me tǝ faani. Me faa ɓo nyi we wat daga tǝtǝŋ ah sǝ, so me joŋ ɓǝ faa ɓe ge ɓo pǝ cok ahe.
(Masǝŋ Dǝɓlii nyi Tǝ'yak ah ɓo nyi me, so pee me.)
Dǝɓlii cuu ɓǝ mai mo 'yah mo joŋ kǝnah ɓo mor zan ahe
17Dǝɓlii Masǝŋ Matǝdaŋdaŋ mǝ za Israel mai mo ǝ̃ǝ we faa: Ame ye Masǝŋ ɓiiri, me ye Dǝɓ mai me 'yah cuu fan nyi we ka gbah jol ɓiiri, ka zaŋ we syee ne tǝ fahlii mai we ga syee gŋ daŋ. 18Kǝnah we syee mor ɓǝ lai ɓe ɓe, me rǝk ẽe ɓe ma tǝ ɓii tǝgbana bii el mai moo ɗuu mo ka yak ya, kacella ɓii mai wee kaa a yea tǝgbana bii ɗul moo weani, 19morsǝ̃ǝ ɓii a yea ma na tǝkuu zahbii, me byak kǝnah ra ka mo muŋra ka syaŋsyaŋ. So we joŋ nai ya!
20We pǝ̃ǝ gin sǝr Babilon we gyo! We myah ɓǝ ah ne ɓyaŋ ɓǝ ne laa pǝ'nyahre, mor ka za kẽne daŋ mo laara: Dǝɓlii ǝ̃ǝ za yeɓ ah za Israel ɓe.#Caŋ 18:4 21Ne cok mai Dǝɓlii mo zaŋ zan ah syee ne pǝ cok magaɓ ah kǝsyicok mayakke, koŋ bii lwaa i ra ya, soɓ pǝɗakka ɓal bii ge lal ka mo zwahra.
22Amma Dǝɓlii faa: Jam kǝka wo za faɓe' ya.#Esa 57:21
Bible Moundang © Alliance Biblique du Tchad, 1996.