ESAIA 44
44
Dǝɓlii ye Masǝŋ to
1Dǝɓlii faa: Zǝzǝ̃ǝko awe za yeɓ ɓe Israel, morsǝ̃ǝ Yakuɓ mai me nǝǝ we ɓo, we laa. 2Ame ye Dǝɓlii mai mo joŋ we ɓo, me tǝŋ gbah jol ɓii daga ɓǝr ma ɓiiri. We ɗuu gal ka, awe ye za yeɓ ɓe, we ye za ɓe mai me nǝǝ ɓo me tǝ 'yahe.
3Me ga nyi bii nyi sǝr mai mo yak ɓo, me ga joŋ ka bii mo ɗuu pǝ cok mayak ahe. Me ga nyi Tǝ'yak ɓe nyi wee ɓǝr ɓiiri, me ga ẽe morsǝ̃ǝ ɓiiri. 4A ga giŋra tǝgbana fãa mai mo kah lak bii, a yeara tǝgbana kpuu mai mo uu ɓo tǝkee bii.
5Za ga faara ne zah ɓǝǝ vaŋno vaŋno daŋ: Azye ye mǝ Dǝɓlii. A ga gera ka tai ki ne za Israel, zune daŋ ga ŋwǝǝ tǝɗii Dǝɓlii tǝ sol jol ahe, a ga kee suu ah kǝsyil za Masǝŋ.
6Dǝɓlii mai mo kaa goŋ ɓo, ako ye pa ma byak Israel, Dǝɓlii ma ne swah daŋ faa: Ame ye tǝtǝŋ fan daŋ, ame ye in zah fan daŋ ta. Masǝŋ maki ah kǝka, sai ame to.#Esa 48:12; Caŋ 1:17; 22:13 7Dǝɓ ma gak joŋ fan mai me joŋ ɓo ŋhaa ka mo so faako ɓǝ fan mai mo joŋ ɓo daga tǝtǝŋ fanne, tǝkine ma in zah ah daŋ, a no ne?
8Za ɓe, we ɗuu gal ka! Mor ame cuu ɓǝ fan mai moo ga joŋ nyi we daga kǝpel ɓaaɓe, we so tǝ ɓǝ ah ɓo ŋhaa dai tǝ'nahko, awe ye za syedowal ɓe. Masǝŋ maki ah na me no ne? Masǝŋ maswah maki ah na me kǝka.
Syee mor masǝŋ ki, ɓǝ tǝgwĩi yo
9Za mai moo zyeɓra masǝŋ ki daŋ, tǝgwĩi ye ra, masǝŋ mai moo yiira ra, ka ne yeɓ ya. Za mai moo juura pel wo masǝŋ ah ra laŋ rǝ̃ǝra ɓo rǝ̃ǝ, tǝra fan ki ya. Swãa ga re ra. 10Ka ɓaŋ foto masǝŋ ki ra ne vãm syẽ, so juupel wol ahe, yeɓ makol ah yo. 11Koo zune moo juupel wo masǝŋ ki daŋ swãa ga re ko. Za mai mo zyeɓra masǝŋ ki, ara ye dǝfuu ara ye ka fan ki ya. Mo taira ge wo ki pel kiita, gal tǝkine swãa ga re ra.
12Pa cwak a woo zah vãm maa ga mor wii cwakke, so a ɓaŋ tǝfẽare ko a nǝǝ vãm gin mor wii ne ko. A ɓaŋ bik ga sǝŋ ne jol ne swah suu ah daŋ coo masǝŋ ki ne ko. Fahfal ah koŋ in ko, koŋ bii laŋ a in ko, a gaɓ ta. 13Pa zyeɓ kpuu a lii kpuu ne salle, a so ɗea cok ah ne makǝrelle, a so ŋgom zyeɓ masǝŋ ki ne tǝgbana foto dǝfuu ka kan pǝ yaŋ ahe. 14A cen kpuu bah ka joŋ yeɓ ah ne ko, wala a kyeɓ kpuu mǝŋgiŋrĩ koo kpuu tao mai mo kǝsyicok lalle. Wala a pea kpuu masãh maki ahe, a kaa byak ka mo joŋ pǝluuri. 15Dǝfuu ciŋ zahwii ne kpuu ahe, a coo masǝŋ ki ne juupel wol ahe. A cok wii ne maki ah nooni, a zoo wol ne maki ahe, a so ɓaŋ foto masǝŋ ki ne a kea ga sǝŋ pel ah ta. 16Raita kpuu ah a cok wii kǝǝ nǝǝ ne ko, a ren kǝ̃ǝ laa pǝ'nyahre, cok a lǝǝ wol ah a faa: Cok lǝǝ ɓo wo ɓe pǝ'nyahre, wii mai a pǝ'nyah ɗii nai ne! 17Tǝcoŋ kpuu ah maki a joŋ masǝŋ ki ne, a kea ga sǝŋ pel ah a faa: Amo ye masǝŋ ɓe, mo ǝ̃ǝ me.
18Za ma morãi tǝgwĩi ye ra, tǝra fan mai moo joŋra ya, nahnǝn ɓǝǝ ne ɓǝ foo ɓǝǝ coo ɓo tǝ goŋga coo. 19Dǝɓ ma ne tǝtǝl kǝka kǝsyil za ma coo masǝŋ ra ya ne? Dǝɓ maki ah ma faa zye ga woo kpuu maki ah cok wii ne ko, so zye ga cwah wol ne yak ahe, maki ah laŋ zye ga kǝǝ nǝǝ ne re, tǝcoŋ ah zye ga joŋ masǝŋ ki ne ko, zye ga kea sǝŋ pel ahe kǝka ne?
20Dǝɓ ma joŋ fan makol ma morãi a tǝgbana dǝɓ ma ren sãh zahwaa farelle. Ɓǝ foo tǝgwĩi ah muŋ ko ɓe, dǝɓ ka gak gbah jol ah ya, ka gak tan sõone masǝŋ ki mai mo gbǝ ko ɓo pǝ jolle masǝŋ ye ka ya.
Dǝɓlii ye pa ma joŋ fan ne pa ǝ̃ǝre
21Dǝɓlii faa: Za Israel, we foo ɓǝ maraino. We foo, awe ye za yeɓ ɓe, me joŋ we ɓo ka we yea za yeɓ ɓe, me ka yaŋ we ya syaŋsyaŋ. 22Me ɓaŋ faɓe' ɓii kal ne tǝgbana swãh bam moo kalle. We pii soo ge wo ɓe, ame ye pa ma ǝ̃ǝ we.
23Coksǝŋ, we laa pǝ'nyahre! Awe cok ma mor sǝr pǝɗǝkki, we ɗǝǝ lǝŋni! Awe waa tǝkine kpuu ma pǝ gǝ̃ǝ daŋ we 'nyah suu! Dǝɓlii ǝ̃ǝ zan ah Israel ɓe, cuu yǝk ah mo ne ge ɓo lalle.
24Ame ye Dǝɓlii pa ma joŋ ɓii tǝkine pa ǝ̃ǝ ɓiiri, ame ye Dǝɓlii pa ma joŋ fan daŋ. Ne cok me joŋ fan daŋ, ame syak ɓe, me ye joŋ coksǝŋ ɓo na daagol, dǝɓ ma gbah jol ɓe gŋ kǝka. 25Me ga joŋ ɓǝ faa za maber mai moo faara ɓǝ ma ga joŋ pel ciŋ ɓǝ kolle. Me ga ɗii za ma joŋra yiila ne tǝgwĩi, me ga tǝr za fatanne, me ga joŋ fatan ɓǝǝ ciŋ ɓǝ tǝgwĩi.#1 Kor 1:20 26Amma ne cok za yeɓ ɓe mo cuura ɓǝ fan mai mo tǝ ga joŋ pelle, ne cok me pee zapee ɓe mo ge cuura ɓǝ foo ɓe me zyeɓ ɓo ɓe, ame joŋ ɓǝ ah tǝkine ɓǝ fan ma ga joŋ pel daŋ baa ga cok ahe. Ame faa ɓǝ tǝ yaŋ Jerusalem, za ga kaara gŋ faɗa, a ga zyeɓra yaŋ sǝr Yuda maluu ah ra, me ga zyeɓ gboŋ ah faɗa. 27Ame faa ɓǝ nyi mabii malii a yakke. 28Ame faa nyi Kirus: Mo ga kaa goŋ zahwaa ɓe, mo ga joŋ fan mai daŋ me 'yah ka mo joŋ, mo ga nyi fahlii ka mo vuura yaŋ Jerusalem, ka mo kpiira mor yaŋ Masǝŋ ahe.#2 KeeƁ 36:23; Ezr 1:2
Bible Moundang © Alliance Biblique du Tchad, 1996.