ESAIA 40
40
Ɓǝ 'nyah ma pelle
1Masǝŋ ɓii faa: We wuu zahzyil nyi za ɓe, we wuu zahzyil nyi ra. 2We swaa zahzyil nyi za yaŋ Jerusalem, we faa nyi ra laara bone kii ɓe, ame ŋgoŋ kiita tǝ ɓǝǝ mor faɓe' ɓǝǝ mo joŋra daŋ ɓe, zǝzǝ̃ǝ mai faɓe' ɓǝǝ daŋ rwah ge lal ɓe.
3Dǝɓ ki ɓyaŋ ɓǝ tǝ faa: We zyeɓ fahlii kǝsyicok nyi Dǝɓlii! We dǝǝ fahlii ah uu pǝsãhe!#Mt 3:3; Mk 1:3; Yoh 1:23#Lu 3:4-6 4El tǝkine waa ne gee daŋ ga rǝǝ zahki, fahlii marãa ah daŋ a ga dǝǝ uu sǝraŋ. 5So yǝk Dǝɓlii ga cuu gin lalle, za daŋ ga kwora. Dǝɓlii ne suu ah faa naiko.
6Dǝɓ ah so ɓyaŋ ɓǝ faa: Mo faa ɓǝ! Ame fifii faa: Me faa ɓǝ fẽene? So zyii faa: Mo faa dǝfuu daŋ ara tǝgbana fãa, yǝk ɓǝǝ daŋ a tǝgbana fãi fanne.#Yak 1:10-11; 1 Pe 1:24-25 7Fãa a yakke, ne cok Dǝɓlii mo soɓ zyak kuu ge tǝ fãi fan ɓe, a 'mǝr ga sǝŋ ta. Dǝfuu laŋ ara nai ta. 8Oho, fãa a yakke, fãi fan laŋ a 'mǝr ga sǝŋ, amma ɓǝ faa Masǝŋ man yea ga lii.
9Jerusalem, mo yee ge tǝlǝǝ waa sǝŋ ka mo cuu ɓǝ 'nyahre. Sion, mo ɓyaŋ ɓǝ ge sǝŋ pǝ'man mo cuu ɓǝ 'nyahre. Mo ɓyaŋ ɓǝ ge sǝŋ pǝ'manne, mo ɗuu gal ka! Mo faa nyi yaŋ Yuda ma luu: Masǝŋ ɓii tǝ ginni.
10Dǝɓlii tǝ ginni, a ga kaa goŋ ne swah ahe, a ga woo zan ah mai mo ǝ̃ǝ ra ɓo ge ne ko.#Esa 62:11; Caŋ 22:12 11A ga pii zan ah ra tǝgbana pakǝpii moo pii ŋgaɓ fan ahe, a ga tai wee pǝsǝ̃ǝ ah ga wo ki, a ga woo ra gbǝ zahbii, a ga kal pel ma ɓǝǝ syee ne ra ne yella.#Eze 34:15; Yoh 10:11
Masǝŋ ma na Masǝŋ Israel kǝka
12Dǝɓ ma gak lii mabii malii ne jol no ne? Dǝɓ ma gak lii coksǝŋ ne jol ah a no ne? Dǝɓ ma gak lii sǝr ne tahsah, wala lii waa tǝkine gee tǝ kilo no ne? 13Dǝɓ ma gak faa nyi Dǝɓlii mo joŋ naino a no ne? Azu yee gak cuu fan nyi ko tǝkine cuu yella nyi ko ne?#Ro 11:34; 1 Kor 2:16 14Masǝŋ fii zu ka mo cuuko fatan nyi ko, ne yella ka mo tǝko fahlii ka joŋ fan ba ne?
15Za sǝr ne lii ɓǝǝ daŋ ka pǝyǝk pel Dǝɓlii ya, ara tǝgbana bii mai moo zyer ga sǝŋ taŋ nai to, ara tǝgbana nǝn tǝkuu vaŋno mai mo tǝ kilo. Kyo laŋ ka yeara pǝyǝk kal ɓǝm sǝr ne nahnǝn Dǝɓlii ya ta. 16Nǝǝ cok mai mo pǝ gǝ̃ǝ Liban daŋ laŋ, ka kii nǝn joŋ syiŋ wo Masǝŋ man a, kpuu ah ra laŋ ka kii nǝn cok wii pǝ cok joŋ syiŋ ah ya. 17Za sǝr ne lii ɓǝǝ daŋ ka pǝyǝk pel ah ya syaŋsyaŋ.
18Dǝɓ gak ɓaŋ Masǝŋ lii ne zune? Mo gak faa Masǝŋ a naino no ne?#Yeɓ 17:29 19Masǝŋ ka tǝgbana masǝŋ ki mai za ma zyeɓ fan moo zyeɓ ra, so za ma ɓaŋ vãm syẽ moo syeera vãm kaŋnyeeri ga wol ah moo so zyeɓra gǝǝnyiŋ ne vãm solai ma wol ah ya.
20Dǝɓ mai mo ka gak lwaa vãm solai wala vãm kaŋnyeeri ya, a kyeɓ kpuu mai mo ka sõo ya, so a kyeɓ pa zyeɓ fan masãh ne ka mo zyeɓko masǝŋ ki mai mo ka gak lee ga sǝŋ ya nyi ne ko.
21We tǝ ya ne? We laa ya ne? Faara ɓǝ ah nyi we daga ɓaa ya ne? We laa ɓǝ joŋ sǝr Dǝɓ ah mo joŋ ne fahlii naino ya ne? 22Dǝɓ mai mo kaa ɓo tǝ fakal ah coksǝŋ nǝn masyiibam nǝkǝŋhaa ye joŋni, a kwan za sǝr gin sǝŋ tǝgbana datǝ̃ǝre. Syel masyiibam ge lal tǝgbana zyimmi, a tǝgbana tal mbǝro ka za mo kaa gŋ.
23A tǝr swah za goŋ sǝr ga falle, a joŋ ra na fan kolle. 24Ara tǝgbana kpuu mai mo pee ɓo pǝfuu mo tǝŋ da sǝ̃ǝ ɓo mor sǝrri. Ne cok Dǝɓlii mo pee zyak ge kuu tǝl ah ɓe, a yakke, a so ɓaŋ kal ne tǝgbana kunni.
25Dǝɓ gak lii Masǝŋ Matǝdaŋdaŋ ne zune? Dǝɓ ma na ko no ne? 26We woo nahnǝn ẽe cok ge sǝŋ ɗao, azu ye joŋ ŋwǝǝmǝŋgai mai we tǝ kwan ne? Dǝɓ mai mo rǝk ra ɓo pǝ cok ɓǝǝ tǝ pãa ɓǝǝ ɓe, ɗii ra ɓo ne tǝɗii vaŋno vaŋno daŋ, ka muŋ gin gŋ koo vaŋno laŋ ya. Mor swah ah mo ne a pǝ'manne.
27Za Israel, mor fẽe we kyãh ɓǝ nyee ŋ Dǝɓlii tǝ gaɓ ɓii ya, wala zyii ka zyeɓ fahlii ɓǝ ɓii uu pǝsãh ya ne? 28We tǝ ya ne? We laa ɓǝ mai taa ya ne? Dǝɓlii ye Masǝŋ ma ga lii, ako ye joŋ sǝrri, ka gaɓ ya, ka pǝtǝtǝ̃ǝr a. Dǝɓ ma tan ɓǝ foo ah laŋ kǝka. 29A nyi swah nyi za matǝtǝ̃ǝ tǝkine za mai mo gaɓ ɓo, ka mo gak uura. 30Wee manyee a gak yeara pǝtǝtǝ̃ǝre, wee tǝbanna a gak leara ga sǝŋ. 31Amma za mai mo soɓra suu ɓǝǝ ɓo wo Dǝɓlii ka mo gbah jol ɓǝǝra, a ga lwaara swah mafuu ga pelle. A ga zoora ne yee tǝgbana vakke. Ne cok mo tǝ ɗuura ɓe, ka ga laara gaɓ ya, koo mo tǝ syeera syee laŋ, suu ɓǝǝ ka ga yea pǝtǝtǝ̃ǝ ya ta.
Bible Moundang © Alliance Biblique du Tchad, 1996.