ESAIA 14
14
Za Israel ga piira soo ge sǝr ɓǝǝra
1Dǝɓlii ga kwo syak tǝ zan ah Israel faɗa, a ga nǝǝ ra ka ciŋ za mǝ ah ne ko. A ga soɓ ra kaa pǝ sǝr ɓǝǝ faɗa. Za gwǝǝ ga ge, a ga kaara gŋ ne ra. 2Za sǝr camcam ga gbahra jol za Israel ka pii soo gin pǝ sǝr mai Dǝɓlii mo nyi ɓo nyi ra, so za sǝr camcam ga joŋra byak nyi za Israel gŋ. Za mai mo yea tǝ gbahra za Israel joŋ byak ne ra, zǝzǝ̃ǝ za Israel yee ga joŋ byak ne ra. Za Israel ga kaara swah tǝ za mai mo yea tǝ cuura syak nyi ra.
Goŋ Babilon pǝ cok mai za wul mo gŋ
3Dǝɓlii ga wǝǝ za Israel pǝ cok gaɓ ɓǝǝ ne bone mai mo tǝ laara tǝkine yeɓ magaɓ mai za mo tǝ joŋra ne doole joŋni, ka mo 'yakra. 4Ne cok Dǝɓlii mo joŋ nai ɓe, za Israel ga syakra goŋ Babilon faa:
Goŋ maɓe' kŋ lee ɓe, ka fǝ̃ǝ cuu bone nyi za taa yao syaŋsyaŋ. 5Dǝɓlii vǝr swah za goŋ maɓea 6mai mo ɓaŋra kpãh ɓe, moo cuura bone nyi za ne ko, mo ka kaara ga sǝŋ kpee ya, moo foora mor za sǝr camcam moo renra sǝr ɓǝǝra. 7Zǝzǝ̃ǝko, sǝr daŋ tǝ laa pǝ'nyahre, tǝ 'yakra o, kaara ɓo jam. Zune daŋ tǝ ɗǝǝ lǝŋ ne laa pǝ'nyahre. 8Koo kpuu maswah tǝkine masãh mai mo no Liban daŋ tǝ laara pǝ'nyah ne ɓǝ lee goŋe, mor dǝɓ ma ga cee ra kǝkao, kal ɓe.
9Cok mai za wul mo gŋ zyeɓ suu kaa ɓo ne ka nyiŋ goŋ Babilon. Mǝǝzuwuŋ za mai mo yea kaara swah ɓo tǝ sǝr daŋ tǝŋ gaira suu. Mǝǝzuwuŋ za goŋ urra gin tǝ fakal goŋ ɓǝǝra. 10Ara daŋ tǝŋra faa ɓǝ nyi ko: Zǝzǝ̃ǝ mai amo pǝtǝtǝ̃ǝ tǝgbana ru o ta, amo kǝsyil ɓuu o. 11Yea tǝ woŋra tǝnjuŋ yii mo ne ko, amma zǝzǝ̃ǝ amo pǝ cok mai za wul mo gŋ o! Cwǝ̃ǝ ciŋ faswul ɓo ɓe, ciŋ gwado ma jǝŋ tǝtǝl ɓo ɓe.
12Goŋ Babilon, ŋwǝǝmǝŋgai ma sǝǝ ne zahmor'nanne, amo lee gin sǝŋ ge sǝŋ ɓe! Ɓaaɓe mo yea tǝ ren za sǝr camcam ne salle, amma zǝzǝ̃ǝ mo lee ɓe.#Caŋ 8:10; 9:1 13Amo yea tǝ foo pǝ zahzyil ɓo mo ga yee ga coksǝŋ ka ga ɓyak fakal goŋ ɓo tǝ ŋwǝǝmǝŋgai ma sǝŋ tǝ kǝraɓ ah ra. Amo lǝŋ mo ga kaa tǝgbana goŋ tǝ waa ma fahsǝŋ ah pǝ cok mai masǝŋ ki ra mo tai ɓo gŋ.#Mt 11:23; Lu 10:15 14Amo faa mo ga yee ga tǝ swãh sǝŋ ka mo yea tǝgbana Pa ma ne swah daŋ. 15Amma amo so lee kal ge pǝ lak mor sǝr pǝɗǝk pǝ cok mai za wul mo gŋ.
16Za wul mai moo ga kwora mo daŋ a ga ẽera mo. A ga fiira ki faa: Dǝɓ mai mo yea tǝ ren sǝr ne joŋ za goŋ cocoo kŋ ye ne? 17Dǝɓ mai mo yea tǝ ɓeɓ yaŋ maluu moo joŋ sǝr ciŋ cok kol kŋ ye ne? Mai mo ka zyii wǝǝ za mai mo gbah ra ɓo, wala mo ka soɓ ra ga yaŋ ɓǝǝ yao syaŋsyaŋ kŋ ye ne? 18Za goŋ sǝr daŋ swahra ɓo ɓǝr pal ɓǝǝ masãhe. 19Amma ɓoora wul ɓo ge lal ka mo sõo gŋ, wul sooje mai mo ikra ra ge lal zah sal ryaŋra wul ɓo ɓoo kǝsyilli, so woora wul ɓǝǝ ne ma ɓo ɓaa ge pǝ yii tǝgǝǝ waare, dahra ge gŋ ne ɓalle.
20Ka ga ciira mo na za goŋ manyeeki ah ra ya, mor amo ɓeɓ sǝr ɓo, mo ik za ɓo pǝ wulli. Morsǝ̃ǝ ɓe' ɓo ka ga coŋ sǝŋ ne cee vaŋno ya.
21We zyeɓ suu ka ik wulli! Wee goŋ mai a ga wukra mor faɓe' mai pa ɓǝǝ lii mo joŋra. Koo dǝɓ vaŋno kǝsyil ɓǝǝ ka ga kaa goŋ tǝ sǝr wala ka ga lwaa vuu yaŋ maluu ah camcam ya.
Masǝŋ ga muŋ Babilon
22Ame Dǝɓlii ma ne swah daŋ me ga ruu sal ne Babilon joŋ yaŋ ah ciŋ gboŋni, me ka ga soɓ fan ki gŋ ya, koo wee nyeere, fan ma ne cee daŋ ka ga yea gŋ ya. Ame Dǝɓlii me ye faa ɓo naiko. 23Me ga joŋ yaŋ Babilon tǝgbana fahlle, woŋguu ga kaara gŋ. Me ga gbǝǝ Babilon ne tahl mai moo ga gbǝǝ fan daŋ ga lalle. Ame Dǝɓlii ma ne swah daŋ, me ye faa ɓo naiko.
Masǝŋ ga muŋ Asirien
24Dǝɓlii ma ne swah daŋ haa zah faa: Fan mai me zyeɓ ɓo ka joŋni, a ga joŋ. Ɓǝ mai me foo ɓo ka joŋ ahe, a ga joŋ.#Esa 10:5-34; Na 1:1–3:19; Zef 2:13-15 25Me ga vǝr Asirien gin pǝ sǝr ɓe Israel, me ga dah ra tǝwaa ɓe ne ɓalle. Me ga wǝǝ celeelu Asirien gin ɓal za ɓe tǝkine faswaa mai mo ɓaŋra ɓo. 26Ɓǝ foo ɓe me foo ɓo ka joŋ wo sǝr a naiko, me ga ŋgoŋ kiita tǝ za sǝr daŋ. 27Dǝɓlii ma ne swah daŋ foo ɓo ka joŋ naiko, tǝ zyeɓ suu ka ŋgoŋ kiita, koo dǝɓ vaŋno ma gak cak ko kǝka.
Masǝŋ ga muŋ Filistien
28Ne syii mai goŋ Akas mo wuu, ame Esaia me laa ɓǝ mai zah Masǝŋ, faa:#2 ZaG 16:20; 2 KeeƁ 28:27
29Za Filistia, kǝndaŋ in ɓii hao ɓe, amma we 'nyah suu ne ɓǝ ah ka. Ne cok soo mo wǝ ɓe, pãa ah a syer soo maɓe' lii ah pǝ cok ah faɗa! Soo ah a zooni.#Jer 47:1-7; Eze 25:15-17; Jo 3:4-8; Am 1:6-8; Zef 2:4-7; Zak 9:5-7 30Dǝɓlii yee ga pii zan ah mai ara mo pǝsyakke, a ga joŋ ra kaa jam. Amma a ga pee koŋ magaɓ ah tǝ ɓii Filistien, ka ga coŋ dǝɓ vaŋno ne cee ya.
31Awe za yaŋ Filistien maluu daŋ, we yeyee tǝkine ɓyaŋ ɓǝ fii gbah jolle! We ɗuu gal ne lii ɓii daŋ! Mor ɓǝm malii ah tǝ gin fahsǝŋ ginni, ara ye kul sooje mai mo ka ɗuura gal a.
32Na ga zyii ɓǝ faa zah zapee mai mo peera gin sǝr Filistien ge wo man ɗǝne? Na ga faa nyi ra: Dǝɓlii ye kan Sion ɓo, zan ah mai mo tǝ laara bone, a ga lwaara cok 'yak gŋ.
Bible Moundang © Alliance Biblique du Tchad, 1996.