HOSEA 13
13
Kiita ma fahfal tǝ lii ah tǝ za Israel
1Ne cok ma fahfal mo pǝ̃ǝ kalle, za Efraim mo faara ɓǝ ɓe, za ki ɗuura galle. Za Israel manyeeki ah daŋ a gbanra yǝk za Efraim. Amma za Efraim joŋra faɓe' ne juupel wo Ba'al, mor ahe, a ga wukra. 2Tǝ joŋra faɓe' ga joŋ ba. Ɓaŋra foto fan ne vãm syẽ ka juupel wol ahe, zyeɓra masǝŋ ki mai dǝfuu ye moo zyeɓra ne vãm solai ne ɓǝ foo ɓǝǝra. So faara wo ki: Na ŋgom fan joŋ syiŋ wo ɓǝǝ ne ko. Ko dǝfuu gak keara ga sǝŋ pel fan mai mo joŋra jur dǝǝ ko ɓo suu ɗǝne? 3Mor ah za mai a ga muŋra tǝgbana mabǝm mai moo gin ne zah'nan moo so ceere, a ga yeara tǝgbana mahm mai moo hǝǝ 'mǝr ne zah'nan ɓaa. A ga yeara tǝgbana kun mai zyak moo ɓaŋ kal ne ko, tǝgbana suŋwii mai moo pǝ̃ǝ zahtǝwoo.
4So Dǝɓlii faa: Ame ye Dǝɓlii Masǝŋ ɓiiri, mai mo zaŋ we pǝ̃ǝ gin sǝr Egiɓ ne ko. We ka ne masǝŋ maki ah ya, sai ame to. Ame vaŋno to, me ye pa ǝ̃ǝ we. 5Ame byak pa ɓii lii ra pǝ sǝr mayak ah kǝsyicokki.#CuuƁ 8:11-17 6Amma ne cok mo ge danra pǝ sǝr masãhe, kǝ̃ǝra, laara pǝ'nyahre, so tǝŋ yiira suu yaŋra me. 7Mor ahe, me ga ur ne we na ɓolle. Me ga swǝ kah fahlii byak we tǝgbana kpiŋ. 8Me ga ur ne we na swãhtǝkeekee mai za mo lal woo wee ah ɓo mo tǝ kyeɓɓe. Me ga cur we ne fyãh na ɓolle, me ga pahl we na fan cok moo pahl fanne.
9Za Israel, me ga muŋ we, ko azu yee gak gbah jol ɓii ne? 10Awe fii me mor goŋ tǝkine zaluuri, amma a gak ǝ̃ǝra we no ne?#1 Sa 8:5-6 11Ame nyi goŋ nyi we ne zahzyil syenne, me so ɓaŋ kpãhe, me nǝǝ ra ge lalle.#1 Sa 10:17-24; 15:26
12Ɓǝɓe' za Israel tǝkine faɓe' ɓǝǝ daŋ ŋwǝǝ kan ɓo no. 13Israel a ne pejii ka yea ne cee, amma ka ne tǝtǝl a, a tǝgbana we mai mo tǝ ga byaŋ, so zyii pǝ̃ǝ ɓǝr mam gin lal a. 14Me ka ga ǝ̃ǝ za mai gin zah wul a, me ka ga ǝ̃ǝ ra ne ga pǝ pal a. Ma wulli, mo ge ne ɓeɓɓe! Cok za wulli, mo ge woo ra! Me ka ga kwo syak tǝ za mai ya.#1 Kor 15:55 15Israel tǝ ga pel kǝsyil wee pah ah ra, amma me ga pee zyak sǝŋ macwak ah kuu gin fah kǝsyicok ge, a ga yak biikyaŋ ah ra tǝkine bii pǝ lak bii ah daŋ. A ga woo fan ah mabǝ̃ǝ ah daŋ kal ne ko. 16Za yaŋ Samaria ga lwaa kiita, mor ŋwookyaŋ mai mo ŋwoora ne Masǝŋ. A ga wukra zah salle. Za syiŋ ɓǝǝ ga dahra wee ɓǝǝ tǝ sǝr ne ɓalle, a ga reara ɓǝr ŋwǝǝ ma ne ɓil daŋ.
Bible Moundang © Alliance Biblique du Tchad, 1996.