HOSEA 1
1
1Dǝɓlii faa ɓǝ nyi Hosea, we Beeri, ne cok ah Osias ne Yutam, Akas ne Ezekias ye kaara goŋ Yuda. Ne cok ah laŋ ka Jeroboam we Joas ye kaa goŋ Israel ɓo.#2 ZaG 14:23–15:7; 15:32–16:20; 18:1–20:21; 2 KeeƁ 26:1–27:8; 28:1–32:33
Mawin Hosea ne wee ahe
2Ne cok Dǝɓlii mo tǝŋ faa ɓǝ nyi za Israel ma zahnahpel ah ne zah Hosea, faa nyi ko: Mo ge ɓaŋ mawin kanne, mawin ɓo matǝkoi ye ga yea, so wee ɓii laŋ a ga yeara pǝɓea na ko ta, mor za ɓe soɓra me ɓoo, so kal tǝ joŋra ɓǝǝ ne masǝŋ ki ra.
3So Hosea ɓaŋ Gomer mǝlaŋ Diɓlaim kanne, mawin ah gbǝ ɓilli, byaŋ we wor nyi ko. 4Dǝɓlii faa nyi Hosea: Mo ɗii ko ne Jezereel, mor cok coŋ ɓo ka pǝlli yao, me ga ŋgoŋ kiita tǝ goŋ Israel, mor wul mai pamlii Jehu mo ik za Jezereel, me ga mgboo morsǝ̃ǝ goŋ Jehu#1:4 Goŋ Jehu: wala: Goŋ Israel..#2 ZaG 10:11 5Mor ne zah'nan ah me ga vǝr swah za Israel pǝ cok tǝforoŋ Jezereel.
6So Gomer gbǝ ɓil faɗa, byaŋ mǝlaŋ winni. Dǝɓlii faa nyi Hosea: Mo ɗii ko ne Kwosyak ya, mor me ka ne 'yah ka kwan syak tǝ za Israel wala ka rõm ra ya. 7Amma me ga kwo syak tǝ za Yuda, ame Dǝɓlii Masǝŋ ɓǝǝ me ga ǝ̃ǝ ra, me ka ga joŋ ɓǝ ah ne ruu sal ne kafahe, ne saŋ ne guu ne pǝr tǝkine za ma yee pǝr a.
8Fahfal Gomer mo yee zah mǝlaŋ ah gin tǝ wonni, so gbǝ ɓil kpǝ, byaŋ we wor maki ahe. 9Dǝɓlii faa nyi Hosea: Mo ɗii ko ne Zaɓeyeka, mor za Israel ara ye ka za ɓe ya, ame laŋ me ye ka Masǝŋ ɓǝǝr a.
Israel ga laara pǝ'nyah faɗa
10Zah'nan ah ga ge ba, pãa za Israel ga yea tǝgbana tǝkuu zahbii, dǝɓ ka gak kee wala ka lii ya. Zǝzǝ̃ǝ mai Masǝŋ tǝ faa nyi ra: Awe ye ka za ɓe ya, amma zah'nan ah no ginni, ne cok ah a ga faa nyi ra: Awe ye wee Masǝŋ ma ne cee. 11Za Yuda ne za Israel a ga taira ki, a ga nǝǝra dǝɓlii ma kal pel ɓǝǝ vaŋno, a ga ɓoora ga pel pǝ sǝr ɓǝǝ a laara gŋ pǝ'nyahre. Oho, zah'nan Jezereel#1:11 Tǝɗii Jezereel: 'yah faa: Masǝŋ tǝ ruu fanne. Masǝŋ ɗii ra naiko mor ga pel ɓe, a ga ẽe ra. a ga yea zah'nan malii ahe.
Bible Moundang © Alliance Biblique du Tchad, 1996.