GALATIEN 4
4
1Me faa sye: wel ren yaŋ mo pǝlaŋ ba ɓe, ka yea cam ne byak ya, koo ako ye mo pa ga ren fan pam daŋ laŋ ko. 2A yea ma mor jol za ma wol ko tǝkine za ma byak fan ah ŋhaa ka dai zah'nan mai pam mo cuu ɓo. 3Ana laŋ na nai ta, ne cok na yea tǝgbana wee nyeere, na yea na byak mor ɓǝ lai dǝfuu camcam. 4Amma cok ah mo ge o, Masǝŋ pee Wel ah ge, byaŋ ne madǝwinni, syee mor ɓǝ lai Yahuduen, 5mor ka mo wǝǝko za mai ɓǝ lai mo ne swah tǝ ɓǝǝra, mor ka na ciŋ wee ah matǝ goŋga.#Ro 8:15-17
6Masǝŋ 'yah ka cuu awe ye weere, mor ahe, pee Tǝ'yak Wel ah ge ɓo pǝ zahzyil mana, mai moo faa: “Daddǝ”. 7Zǝzǝ̃ǝko mo ye ka byak yao, amo ye welle. Amma amo ye wel ɓe, ka mo ye we ma ren fan Masǝŋ ta.
Paulus kaa ne swaa ɓǝ eklesia Galatien
8Amma ne cok we tǝ Masǝŋ matǝ goŋga ya, we yea tǝ joŋ byak masǝŋ ki ra. 9Amma zǝzǝ̃ǝko we tǝ Masǝŋ ɓe - pǝram me faa Masǝŋ ye tǝ we ɓo - mor fẽe we 'yah jin ga wo fan matǝtǝ̃ǝ ne magwah ah ka so joŋ byak ɓǝǝ ne? 10Awe gbǝ yǝk ɓǝ zah'nan mai a naino, fĩi mai a sõo, cok mai a naino, tǝkine syii mai a sõo ɓo. 11Me tǝ ɗuu galle, ɗah maki me gaɓ ɓo ne we tǝkol ne?
12Me pǝǝ we wee pa ɓe, we yea na me, ame laŋ me yea na we. We joŋ ɓǝɓe' wo ɓe ya. 13We tǝ ɓe, ne cok me ge cuu ɓǝ Masǝŋ nyi we kǝpelle, syem suu ɓe ye joŋ me ge. 14Kǝnah we syẽa me, we soɓ me ɓoo mor me ne syemme. Amma we joŋ nai ya, we nyiŋ me tǝgbana angelos, na Yesu Kristu ne suu ahe. 15Ne cok ah we laa pǝ 'nyah pǝlli. Ko ɓǝ 'nyah ɓii kŋ kẽne? Me lǝŋ kǝnah ne cok ah wee gak no ɓe laŋ, ka we nǝǝ nahnǝn ɓii nyi me ɓe! 16Me so ciŋ pa syiŋ ɓii ɓo ne faa goŋga nyi we ne?
17'Yah mai za ki mo tǝ 'yahra we ne 'yah sãh ye ka, mor tǝ kyeɓra ka woŋ we ne me, ka we ge wo ɓǝǝra. 18Oho, a pǝsãh ka dǝɓ mo joŋ 'yah ne cok daŋ, amma mo yea tǝ fahlii goŋga, 'yah ah mo joŋ ne cok me no kǝsyil ɓii to ka. 19Wee ɓe mai me tǝ laa syen byaŋ ɓii faɗa, ka Kristu mo giŋ pǝ zahzyil ɓii ge pelle. 20Me 'yah kǝnah ka me yea wo ɓii zǝzǝ̃ǝko, ka me fer kyaŋ ɓǝ faa ɓe, mor me kaa ɓo tǝ swaa ɓǝ ɓiiri.
Ɓǝ kikiŋ tǝ Hagar ne Sara
21We faa nyi me ɗǝ, awe za mai we tǝ 'yah syee mor ɓǝ lai Mosus, we laa ɓǝ lai mo faa ya ne? 22Ɓǝ ah ŋwǝǝ ɓo gŋ Abraham ne wee gwa, vaŋno ah we mabyak yo, maki ah we mawin ma ne tǝtǝl suu ah yo.#Tǝŋ 16:15; 21:2 23Mabyak byaŋ wel ah ne fahlii mai dǝfuu moo byaŋ ne ko, mawin ma ne tǝtǝl suu ah byaŋ wel ah ne ɓǝ mai Masǝŋ mo faa. 24-25Ɓǝ mai ɓǝ kikiŋ yo. Ŋwǝǝ matǝ gwa rai a tǝgbana ɓǝ gbanzah mai Masǝŋ mo zyeɓ gwa. Mabyak mai mo bem byakke, Hagar yo. Mor Hagar cuu waa Sinai ma sǝr Arabia ɓo, mawin ah a tǝgbana ɓǝ gbanzah ma tǝ waa Sinai, a na Jerusalem Yahuduen ma tǝ'nahko, a pǝ byak ne wee ah daŋ. 26Amma Jerusalem mai mo no sǝŋ, a ne tǝtǝl suu ahe, ma man o. 27Mor Ɗerewol faa:
“Mo laa pǝ'nyahre masoore!
Mo ɓyaŋ ɓǝ ne 'nyah suu.
Mor mo laa gaɓ byaŋn a,
Wee mawin ma bai wor ga kal wee mawin ma kan worre!”#Esa 54:1
28Wee pa ɓe, awe laŋ we tǝgbana Isak, awe ye wee ma bem ne ɓǝ faa Masǝŋ. 29Amma tǝgbana ɓǝ ah mo joŋ ne cok ahe, zǝzǝ̃ǝ laŋ a nai ta, we mai mo byak yo, foo mor we mai mo byaŋ ne ɓǝ faa Masǝŋ.#Tǝŋ 21:9 30Amma Ɗerewol faa ɗǝne? “Mo nĩi ma byak ne nan ah daŋ ɓoo, mor na ma byak ka woŋ yaŋ ne na mawin ma ne tǝtǝl suu ah ya.”#Tǝŋ 21:10 31Mor ahe, wee pa ɓe, na ye ka wee mabyak ya, amma na ye wee mawin ma ne tǝtǝl suu ahe.
Bible Moundang © Alliance Biblique du Tchad, 1996.