ESTAR 6
6
Goŋ yii Mordekai
1Ne suŋ moo goŋ gak nǝnǝm ya, so faa nyi za mo ɓaŋra ɗerewol ma ŋwǝǝ ɓǝ sǝr goŋ gŋ ge ne ko, so keera ɓǝ ah nyi ko. 2Cok mai mo keera nyi goŋe, ŋwǝǝ ɓo gŋ, Mordekai ye joo ɓǝ mai Bigtan ne Teres syẽe matǝ gwa moo byakra yaŋ goŋ mo kyeɓra ka in goŋ Ahasverus pǝ wulli.#Est 2:21-22 3Goŋ fifii faa: Na soo Mordekai tǝkine yii ko tǝ ɓǝ mai ɓo ne fẽene? Za yeɓ ah zyiira zah ah faa: Lwaa fan ki tǝ ɓǝ ah ya. 4Goŋ so faa: Dǝɓ ki vaŋno kǝsyil zaluu pel ɓe no yaŋ nyee ne? Ne cok ah ka Haman ge ɓo yaŋ goŋ mor ka fii ko, ka mo raoko Mordekai ge tǝ kpuu mai mo zyeɓko ɓo mor ahe. 5So za yeɓ zyiira zah goŋ faa: Haman no ge uu ɓo nyeeko, tǝ 'yah ka ga faa ɓǝ ne mo. So goŋ faa: We faa nyi mo kalko ge o. 6Haman so kal ge ɓǝr yaŋ, goŋ faa nyi ko: Dǝɓ ki no me tǝ 'yah ka yii ko pǝ'manne, ko me joŋ wo dǝɓ ah ɗǝne? Haman foo ɓǝ suu ahe, azu ye goŋ tǝ 'yah ka yii ko pǝ'man sye ne? Ame yee yea. 7-8So zyii zah goŋ faa: Goŋe, dǝɓ mai mo tǝ 'yah ka yii ko, mo ɓoo mbǝro mai goŋ moo ɓoo nyi, mo yee ko tǝ pǝr mai goŋ moo yee mo ne fazyee ah 'wa. 9So ka dǝɓ faadal ɓo mabǝ̃ǝ ah vaŋno mai mo kal ra ɓo ne yǝk daŋ mo ɓooko mbǝro ah nyi dǝɓ ahe, mo so ɓaŋ ko yee tǝ pǝrri, ka mo kalko pel ah syee tǝgǝǝ yaŋ ne ko, mo tǝ syeera ga ɓe, dǝɓ ah mo ɓyaŋ ɓǝ pel ah faa: We ẽe o, goŋ a joŋ ne dǝɓ mai mo tǝ 'yah ka yii ko naiko.
10So goŋ faa nyi Haman: Mo hǝǝ mo ge ɓaŋ mbǝro, ne pǝrri, na mai mo faa, ka mo joŋ wo Mordekai Yahuduyo. Mo ga lwaa ko kaa ma zahɓel goŋe. 11Haman ɓaŋ mbǝro, ne pǝrri, ge ɓoo mbǝro ah nyi Mordekai, so Mordekai yee tǝ pǝrri, Haman so kal pel ah syee tǝgǝǝ yaŋ ne ko. Ne cok mo tǝ syeera ganne, a yah ɓyaŋ ɓǝ pel ah faa: We ẽe o, goŋ a joŋ ne dǝɓ mai mo tǝ 'yah ka yii ko naiko.
12Mordekai pii soo ge zahɓel goŋe, amma Haman kal ge fah yaŋ ah ne hǝǝre, zahzyil sye ko pǝlli, so jǝŋ fan ge tǝtǝlli. 13Kee ɓǝ fan mai mo joŋ wol ah daŋ nyi mawin ah ne bai ah ra. So mawin ah ne bai ah mai moo gbahra jol ah faara nyi ko: Amo tǝŋ lee pel Mordekai ɓe. Ako ye Yahuduyo, mo ka gak joŋ fan ki wol ah ya, mo ga lee pel ah lee mgbaŋ. 14Ne cok mo tǝ faara ɓǝ ah faa ba, syẽe yaŋ goŋ ge daira, mor ka ɗii Haman gwari ga pǝ cok farel mai Estar mo joŋ ɓo ne ko.
Bible Moundang © Alliance Biblique du Tchad, 1996.