PACUUƁƏ 9
9
1So me kaa foo ɓǝ marai daŋ. Me so faa: Masǝŋ syak ah ye pa ma ne swah tǝ yeɓ za matǝ njaŋ ne za fatanne. Dǝfuu tǝra sõone rǝ ga zyaŋ ne 'yah ne, wala rǝ ga zyaŋ ne syiŋ ne, tǝra ya. Ka gak tanra fan ma ga joŋ pel a. 2A nai mor za daŋ. Ɓǝ mai moo ga ge tǝ dǝɓ matǝ njaŋ ne dǝɓ faɓe', dǝɓ sãh ne dǝɓ ɓe', a tǝki. Camcam kǝka kǝsyil dǝɓ ma ɗuu Masǝŋ, ma joŋ syiŋrĩ, ne dǝɓ ma bai joŋ ah ya, kǝsyil dǝɓ masãh ah ne dǝɓ faɓe' ya, kǝsyil dǝɓ ma gban zah ne Masǝŋ ne dǝɓ mai mo gbǝ ya ya. 3Ɓǝ matǝ vaŋno a gin tǝ za daŋ, mor ah ɓǝ maɓea ah a joŋ wo sǝrri. Mor ah dǝfuu a soɓ suu ɓǝǝ mor joŋ ɓǝɓe' tǝkine 'yah joŋ fan ma bai tǝtǝl ahe. Fahfal mai ka coŋ wul ɓo nyi ra to o. 4Amma sai dǝɓ mai mo ne cee ba to yee byak fanne. Goo ma ne cee a pǝram kal ɓol mai mo wǝ ɓo ɓe. 5Mor za ma ne cee tǝra ɓe, rǝ ga wuu, amma za mai mo wukra ɓe tǝra ɓǝ ki ya. Ara ka ne fan mai ka mo kanra nahnǝn mor ah yao, za yaŋ tǝtǝl ɓǝǝ ɓe. 6'Yah ɓǝǝra, syiŋ ki ɓǝǝra, ne tǝwon ɓǝǝ daŋ wuk ne ra ɓe, so ka gak urra ka gin dan pǝ ɓǝ ma joŋ wo sǝr ne na yao.
7Mo re farel ɓo, mo zwǝ fan ne zahzyil vaŋno ne laa pǝ'nyahre, mor Masǝŋ nyiŋ yeɓ ɓo ɓe. 8Cẽecẽe mo ɓoo mbǝro masãhe, so mo sõm cok nǝn ɓo ne nǝmmi. 9Mo laa pǝ'nyah pǝ zah'nan cee ɓo ne mawin mai mo tǝ 'yahe, pǝ zah'nan mai Masǝŋ mo nyi ɓo nyi mo wo sǝrri. Zah ma ɓo pǝ dunia mor gaɓ ɓo nyee koiko. 10Yeɓ makẽne daŋ mo ge uu pel ɓo ka joŋ ɓe, mo joŋ ne swah suu ɓo daŋ tǝgbana moo gak no. Mor pǝ cok mai mo tǝ yah ga lwaa za wul gŋ, dǝɓ ka gak joŋ fan koo foo ɓǝ gŋ ya, fatan tǝkine yella laŋ ka gŋ ya ta.
Fatan ka gak yea pǝsãh cẽecẽe ya
11Me kwo fan manyeeki ah pǝlli wo sǝr faɗa. Za ma ɗul lii ah ye ka pǝ̃ǝra za ki pǝ cok lii zah maɗul cẽecẽe ya, so za sal maswah ah ye ka nĩira sal cẽecẽe to ya. Dǝɓ ma ne fatan laŋ, comki a lwaa fan wol suu ah ne pǝgaɓ ta, dǝɓ ma ne yella ye ka ciŋ pa joŋ cẽecẽe ya, so za ka tai yii za fatan ne lii ɓǝǝ daŋ ya. Azune daŋ gak yea ne fakke. 12Mor dǝfuu ka tan cok mai ɓeɓ moo ga ge tǝl ah ne ya. A lwaa ɓeɓ gin ma tǝl ah hai, tǝgbana syiŋ moo lwaa suu ah pǝ jinni, wala tǝgbana juu moo gban mǝmmǝǝ.
13Me kwo ɓǝ maki ah ɓo faɗa tǝ ɓǝ yeɓ fatan pǝ dunia, me kwo ɓǝ ah ɓo a pǝyǝkki. 14Yaŋ maki yea no, yaŋ laŋ yo, ka ne dǝfuu gŋ pǝlli ya. Goŋ ki no a pǝswahe, ge ka ren yaŋ ahe, ryaŋ yaŋ ahe, so kyeɓ ka dah ɓaale ah ga sǝŋ. 15Ɓǝr yaŋ ah dǝɓ ki no gŋ, pa syak yo, a ne yella. A gak ǝ̃ǝ kǝnah yaŋ ah ne yella ahe. Amma koo dǝɓ vaŋno foo ɓǝ ka ga wo pa syak na ko taa ya. 16Ame faa sye: yella kal swah ɓe, amma ne cok dǝɓ ma ne yella mo pǝsyak ɓe, za syẽa ko, so ka syiira sok mor ɓǝ faa ah ya. 17Pǝram laa ɓǝ dǝɓ ma ne tǝtǝl moo rǝk suu sak faa ɓǝ nyi dǝɓ ne ko, kal tǝ goŋ mai moo ɓyaŋ ɓǝ ne cok mo tǝ faako ɓǝ nyi tǝgwĩi ɓe. 18Yella a joŋ yeɓ kal fan ruu sal ɓe, amma zyak fan tǝ ɓiŋ, a ɓeɓ fan sãh mai yella moo gin ne ko.
Bible Moundang © Alliance Biblique du Tchad, 1996.