PACUUƁƏ 7
7
Ɓǝ foo tǝ ɓǝ kal dǝfuu
1Kacii kal ɓǝrdi mai lee ah mo pǝgaɓ ɓe, so zah'nan wul dǝɓ kal zah'nan byaŋ ah ɓe.#ƁǝT 22:1
2Pǝram ga ɓǝr yaŋ mai za mo tǝ yee wul gŋ kal tǝ ma ga yaŋ mai fĩi mo tǝ joŋ gŋ ɓe. Wul sye in zah man daŋ yo, so a pǝsãh ka zune daŋ mo foo ɓǝ ahe.
3Swaa ɓǝ kal syesyak ɓe, a joŋ cok nǝn dǝɓ woo kaŋne, amma a joŋ dǝɓ tan mor ɓǝ pǝsãhe.
4Dǝɓ mai moo foo ɓǝ ka laa pǝ'nyah to, tǝgwĩi yo. Amma dǝɓ ma ne tǝtǝl a foo ɓǝ wulli.
5Pǝram syii sok mor lai dǝɓ ma ne tǝtǝl kal tǝ syii sok tǝ lǝŋ mai tǝgwĩi moo corra mo ne ɓe. 6Mor dǝɓ ma bai tǝtǝl mo tǝ syesyak ɓe, a tǝgbana waa mai mo tǝ syen wii ɓe moo ciini, ka yea ne mor a.
7Dǝɓ ma ne tǝtǝl mo tǝ cuu bone nyi dǝfuu ɓe, a ciŋ dǝɓ bai tǝtǝlli. Fan ɗǝǝ cok kol a gak joŋ ko ciŋ dǝɓ tǝ vǝrvǝrri.
8Pǝram in zah ɓǝ kal ka dǝɓ mo tǝŋ mor ɓǝ ɓe.
Pǝram ka yea ne rõm ɓǝ kal ma yea ne yii suu ɓe.
9Mo ɓaŋ kpãh gwari ka, mor dǝɓ moo ɓaŋ kpãh gwari ɓe, ka tǝgwĩi yo.#Yak 1:19
10Na fii sõone zah'nan ma tǝsoo sye a pǝ'nyah kal ma tǝ'nah ɓe mor fẽene ka. Fii ah fii dǝɓ ma ne tǝtǝl ye ka.
11Koo zune daŋ mo yeako ne fatanne, mor fatan a pǝsãh tǝgbana fan mai dǝɓ moo ren yaŋ ne ko. 12A gak wǝǝ gaɓ tǝ dǝɓ tǝgbana lak tǝɗe'. A joŋ ka zune daŋ mo syee mor ɓǝ ah ɓe, mo kaako jam, mor ah a pǝsãh ka dǝɓ mo tǝko fanne.
13Na kan nǝn ẽe yeɓ Masǝŋ mo joŋ ɓo ɓe, a ɗǝne? Dǝɓ ma gak dǝǝ fan mai ako mo rãa ɓo kǝka. 14Ne cok ɓǝ daŋ mo tǝ syee ga pǝsãh ɓe, ka mo laa pǝ'nyahre. Ne cok ɓǝ daŋ mo tǝ syee ga pǝɓe' ɓe, ka mo foo ɓǝ ɗǝ: Masǝŋ yee pee ɓǝ 'nyah ne gaɓ gwa daŋ ginni. Mor ah na ka tan ɓǝ fẽe ye tǝ ga ge pel ne kpee ya.
15Pǝ zah'nan cee ɓe matǝ biŋ me kaani, me kwo fan camcam joŋni. Dǝɓ gak wunni, koo mo dǝɓ sãh ye laŋ ko, so dǝɓ ki mo dǝɓ ɓe' ye laŋ, a nǝn wo sǝrri. 16Mo kyeɓ ka mo yea dǝɓ matǝ njaŋ ah kal tǝ yella ka, so mo yea dǝɓ ma ne yella kal jol ka ta. Mo ga i suu ɓo pǝ wul mor fẽene? 17Mo yea pǝɓe' kal tǝ yella ka, so mo yea pǝ tǝgwĩi kal tǝ yella ka ta. Mo 'yah ka mo hǝǝ wǝ kǝpel zah'nan wul ɓo mo ge dai mor fẽene? 18A pǝsãh ka mo gbǝ lai matǝ gwa raiko, mor dǝɓ ma ɗuu Masǝŋ ka lee ga pǝzyil ɓǝ fan joŋ ma morãi ya.
19Fatan a gbah jol dǝɓ mai mo ne pǝsãh kal zaluu jemma mo haira ɓo tǝ yaŋ vaŋno ɓe. 20Koo dǝɓ vaŋno wo sǝr nyee matǝ njaŋ ma gak joŋ fan sãh ka mo zyakko ka syaŋsyaŋ kǝka.
21Mo kan lǝŋ ɓǝ mai za moo faara daŋ ka, maki mo zyak gbǝ dǝɓ yeɓ ɓo cok faa ɓǝɓe' tǝ ɓo. 22Amo ne suu ɓo laŋ mo tǝ ɓe, mo faa ɓǝɓe' ɓo tǝ za ki ɓal pǝpãa ɓe.
23Me lii ɓǝ mai daŋ ɓo ne yella. Me so faa: Sai me ga yea pa fatanne. Amma me lwaa ɓǝ ah a pǝɗǝk kal tǝtǝl ɓe ɓe. 24Fatan sye a pǝɗǝk ɓoroo, azu gak lwaa tǝ ne? 25So me nyi suu ɓe mor fatanne tǝkine kyeɓ mor fanne. Me 'yah ka me lwaa tǝ, fatan sye kpak, mor ah a ɗǝne, so ka me tǝ mor ɓǝ fan daŋ moo gin joŋni. Me fee ɓǝ mai lwaa tǝ: ka yea pǝzwãhe, wala ka yea madǝfuulii, tǝgwĩi ye ɓǝ ah gwa daŋ.
26Me lwaa ɓǝ maki no a pǝɓe' kal ma wul ɓe, ako ye madǝwinni. 'Yah ah mo ne ko a na tǝdahe wala mǝmmǝǝ. Jol ah a tǝgbana sal ma baŋ fanne. Dǝɓ ma 'nyah suu Masǝŋ a ǝ̃ǝ jol ah kalle, amma dǝɓ faɓe' ka ǝ̃ǝ jol ah ya#7:26 Mo ẽe Ɓǝ tǝ Ɓoroo 2:16-19; 6:24-7:27; 22:14.. 27-28Pacuuɓǝ faa: Oho, me ẽe ɓǝ fan marai vaŋno vaŋno daŋ ne yella ka me lwaa mor ahe, so me nǝn ne kyeɓ ah pǝlli me lwaa ya. Gur o kǝsyil za wǝǝ ujenere me lwaa dǝwor gŋ vaŋno to, amma mǝ ŋwǝǝ ne pãa ɓǝǝ ne lii ah daŋ me lwaa mai ka me gak kee na ŋwǝǝ gŋ vaŋno ya. 29Fan vaŋno to me laa mor ah ɓo ako ye mai Masǝŋ mo joŋ dǝfuu ɓo bai ɓǝ ki, ara njaŋ ta, amma so dǝfuu joŋra suu ɓǝǝ ciŋ za tǝ vǝrvǝrri.
Bible Moundang © Alliance Biblique du Tchad, 1996.