PACUUƁƏ 5
5
1Mo foo ɓǝ kǝpel ɗǝ ka mo faa ba, mo hǝǝ faa ɓǝ pel Masǝŋ bai foo ɓǝ ah ka. Masǝŋ ye Dǝɓlii tǝ fan joŋ ah daŋ, ma ɓo mo ye dǝfuu. Mor ah mo lii ɓǝ faa ɓo ra ɗǝ. 2Mor dǝɓ mo tǝ faa ɓǝ pǝlli ɓe, mo ka zyee ne faa ɓǝ matǝ byãh ah ya, tǝgbana dǝɓ mo ne ɓǝ swaa ɓe, mo ka zyee ne lolom maɓea ah ya ta. 3Mo faa ɓǝ pel Masǝŋ ɓe, ka mo gbǝ rol ne joŋ ɓǝ ah ka, mor Masǝŋ ka zyii ɓǝ za ma faa ɓǝ ne kyẽm ya, mor ahe mo joŋ ɓǝ mai mo faa ɓo.#Lǝŋ 66:13-14 4Pǝram mo faa ɓǝ pel Masǝŋ ka, kal tǝ mai moo faa ɓǝ pel ah mo ka so joŋ ya ɓe. 5Mo joŋ yella ka ɓǝ faa zah ɓo mo dan mo pǝ faɓe' ka. Mo faa nyi pa joŋzahsyiŋ me zyezyak ɓo ka. Mo ka nai ya ɓe, Masǝŋ ga ɓaŋ kpãh tǝ ɓǝ faa ɓo ra, so a ga ɓeɓ fan mai mo joŋ daŋ. 6Mor ɓǝ pãa lii sye a tǝkol na lolom pãa ta. Mor ahe pǝram mo ɗuu Masǝŋ.
Za ma ne swah a cuura bone nyi zana
7Mo kaa gǝriŋ ne kwan za moo cuura bone nyi pa syak tǝkine mai moo dahra ɓǝ lai ne ɓǝ matǝ njaŋ ah ne ɓal wo sǝr ka. Mor dǝɓ malii ah mo kaa ɓo, a mor dǝɓ malii maki ah mai mo kal ko ɓo, mo so tǝ byak ko, so ara gwa daŋ za mai mo kal ra ne luu ɓe ye tǝ byak ra.
8Pǝram ka sǝr mo yea ne goŋ mai moo 'yah ɓǝ yeɓ fakpãhpǝǝ.
Joŋ a tǝkolle
9Dǝɓ mai mo tǝ 'yah lakre, lak ka kǝ̃ǝ ko kpee ya, so dǝɓ mai mo tǝ 'yah yea ne joŋni, ka lwaa fan ki gŋ ya. Ɓǝ ah ka ne yeɓ ya. 10Dǝɓ mo ne joŋ pǝlli ɓe, dǝfuu ma byak farel gin mor jol ah a yea pǝlli ta. Fan mai mo kalko za ki ne ko ako ye mai ka mo kaako ẽe joŋ ah rai to. 11Pa yeɓ a nanǝm pǝsãhe, koo mo ka ne farel pǝlli ya, wala mo ne pǝlli daŋ. Amma mǝ pa joŋ a ne fan pǝlli, mor ah ka gak nanǝm ya.
12Me kwo ɓǝ magaɓ maki ah joŋ wo sǝrri: dǝɓ ki tai lak kanne, so ge ne ɓeɓ tǝ suu ah soosǝŋ. 13A ɓeɓ lak ah pǝzyil ɓǝ maɓea ahe, so ne cok mo ge byaŋ wel o ɓe, ka fan ki kǝkao. 14Sai a ga soɓ sǝr maiko, a ga kal ne suu kol na mai mo pǝ̃ǝ gin ɓǝr mah ah ge. Lwaako fan ki gin tǝ yeɓ ah re ya, so fan mai moo gak ɓaŋ kal ne kǝka.#Joɓ 1:21; Lǝŋ 49:18; 1 Tim 6:7 15Ka mo soɓko sǝr na mai mo byaŋko ge gŋ, ɓeɓ malii ye wol ahe. Fan lwaa ah a kẽne? Joŋ yeɓ ma cok kol ɓo. 16Pǝ zah'nan cee ah daŋ kaa ne ɓǝ swaani, ne kpãhe, tǝkine bone.
17Ɓǝ mai me 'yah ka faa tǝ ɓǝ marai daŋ a naiko: Ɓǝ masãh lii ah wo dǝfuu ma kal ren fanne, zwan fanne, ne laa pǝ'nyah pǝzyil yeɓ ah pǝ zah'nan cee ah Masǝŋ mo nyi ɓo nyi ko kǝka. Zah mǝ ah ko ŋhooko. 18Comki Masǝŋ a nyi nyi dǝɓ ki ka yea pǝkǝ̃ǝre, tǝkine laa pǝ'nyah ne fan ahe. Dǝɓ mai a gak lwaa re zah fan mǝ ahe, a gak lwaa re lee syẽm yeɓ ahe. Mai fan ɗǝǝ Masǝŋ yo. 19Dǝɓ ah ka gaɓ suu ah ne foo ɓǝ zah'nan cee ah mo pǝcõo ya, mor Masǝŋ joŋ zahzyil ah ɓo tǝ laa pǝ'nyahre.
Bible Moundang © Alliance Biblique du Tchad, 1996.