PACUUƁƏ 2
2
1Me faa nyi suu ɓe: Sai me ga kyeɓ ka laa pǝ'nyah pǝ dunia tǝkine kaa jam. So mai laŋ ɓǝ kol ye daŋ. 2Syesyakke, ɓǝ tǝgwĩi yo, so laa pǝ'nyah laŋ ka ga cok ki ne dǝɓ ya. 3Me faa: Sai me ga laa 'nyah zwan yimmi, so ka me kor kal za bai tǝtǝlli, amma ka ma ɓee me gbǝ tǝtǝl suu ɓe pǝsãhe. Me kyeɓ ka me tǝ fan mai dǝfuu moo gak joŋra pǝsãh kal fan maki ah daŋ pǝ zah'nan cee ɓǝǝ wo sǝrri.
4Me woo yeɓ maluu ah joŋni. Me vuu yaŋ mor suu ɓe tǝkine pea kpuu vin.#1 ZaG 10:23-27; 2 KeeƁ 9:22-27 5Me zyeɓ 'wah nãa tǝkine 'wah kpuu ne zahban kpuu ma lelee ah camcam daŋ gŋ. 6Me gea lak bii mor sah bii nyi wee kpuu. 7Me lea byak mawǝǝ ne maŋwǝǝ tai mai mo jol ɓe ne ko. Ame ne faɓal maluu ne manyee ah daŋ kal za mai daŋ mo kaara Jerusalem kǝpel ɓe ɓe.#1 ZaG 5:3 8Me tai joŋ vãm solai ne vãm kaŋnyeeri mai za goŋ matǝ sǝr ɓe moo peara gin nyi me. Za wǝǝ ne ŋwǝǝ ma ɗǝǝ lǝŋ gin ɗǝǝra lǝŋ nyi me, so me woo ŋwǝǝ pǝpãa na mai zahzyil za wǝǝ daŋ moo 'yahe.#1 ZaG 10:10,14-22
9Me ciŋ dǝɓ malii ah kal za mai mo kaara yaŋ Jerusalem kǝpel nyi me daŋ#2:9 Mo ẽe verse 4-9 ka mo lii ɓǝ ah ne 1 KeeƁ 29:25; 1 ZaG 5:2-4.. Amma ne cok ah me gbǝ tǝtǝl suu ɓe pǝsãhe.#1 KeeƁ 29:25 10Fan mai zahzyil ɓe mo tǝ 'yah daŋ me jiŋ nyi ya. Me cak suu ɓe gin tǝ fan mai moo joŋ me laa pǝ'nyah koo vaŋno ya. Oho, me re reba yeɓ mai me joŋ daŋ pǝlli, me laa pǝ'nyah pǝzyil yeɓ ɓe me joŋ daŋ, reba ɓe kooko. 11So me kaa ẽe yeɓ rai me joŋni, tǝkine gaɓ mai me gaɓ ne joŋ ahe, me i zah ne faa: Fan mai daŋ a tǝkol tǝgbana ɓǝ nĩi zyak ka gbanne. Dǝfuu ka lwaara fan masãh matǝ goŋga ah koo vaŋno laŋ pǝ zah'nan cee ɓǝǝ wo sǝr a. 12Me kyeɓ ka tanne: Pa tan ɓǝ sye kal tǝgwĩi wala dǝɓ bai tǝtǝl ɓo ne fẽene? Me so foo ne ɓǝr ɓe: Dǝɓ mai moo gin kaa pǝ cok ɓe, a ga joŋ fan cam ne za goŋ ma kǝpel ne?
13Me tǝ ɓe, tan ɓǝ a pǝsãh kal ɓǝ tǝgwĩi ɓe, tǝgbana cokfãi mo pǝsãh kal cokfuu ɓe. 14Mor pa tan ɓǝ tǝ cok mai mo tǝ gako gŋ ɓe, amma tǝgwĩi a syee ne rǝ̃ǝ cok kpakpa. So me tǝ ɓe ta, in zah ɓǝǝ gwa daŋ a zahki. 15Me so foo ne ɓǝr ɓe: In zah ɓe ka tǝ ga yea cam ne mǝ tǝgwĩi ya. Ko mo nai ɓe, fatan ɓe me tǝ kal ko ɓo a ga joŋ fẽe mor ɓe ne? Me so faa: Ɓǝ ah daŋ a tǝkolle. 16Ɓǝ mo joŋ ɓe ka nǝn zah'nan pǝlli ya, ka za yaŋ ɓe. Pa tan ɓǝ a wunni, tǝgbana tǝgwĩi moo wun ta. So za a yaŋra tǝtǝl ɓǝǝ gwa daŋ. Ɓǝ ah a nai mor fẽene? 17So ɓǝ kal wo sǝr ge kǝ̃ǝ me. Mor fan daŋ mai dǝfuu moo joŋra tǝ sǝr ka 'nyah suu ɓe koo vaŋno ya, mor ɓǝ ah daŋ a tǝkolle, tǝgbana ɓǝ nĩi zyak ka gbanne.
18Yeɓ tǝkine ɓǝ swaa magaɓ daŋ nyiŋ cok jol ɓe pǝ zah'nan cee ɓe pǝlli, me so syiŋ ɓǝ ahe, mor a na doole me tǝ yah ka soɓ fan mai me joŋ ɓo nyi dǝɓ mai moo ga kaa pǝ cok ɓe. 19A ga joŋko fan na dǝɓ ma ne tǝtǝl ne? Wala a ga joŋ fan na tǝgwĩi ne? Pa tan ah kǝka. So ne daŋ, fan mai daŋ me tai pǝ zah'nan cee ɓe ne yeɓ ɓe tǝkine fatan ɓe daŋ mǝ ah ye ga yea. Mai daŋ ka ne mor a. 20Ɓǝ foo gaɓ yeɓ mai me joŋ pǝlli tǝ sǝr joŋ me coŋ biŋ ka dan pǝ ɓǝ swaa malii ahe. 21Dǝɓ joŋ yeɓ ne yella, ne fatanne, tǝkine ga pel pǝsãhe, so dǝɓ ah tǝ yah ga soɓ fan mai mo joŋko ɓo nyi nyi dǝɓ ki mai mo joŋ yeɓ ki gŋ ya. Ɓǝ mai laŋ ɓǝ bai mor tǝkine bai joŋ fan njaŋ yo. 22Pǝzyil ɓǝ marai daŋ dǝfuu sye a ne reba fẽe gŋ ka mo gaɓra suu ɓǝǝ ne joŋ fan mai mo tǝ 'yahra joŋ ah ne? 23Yeɓ ɓǝǝ ka joŋ fan ki nyi ra ya, sai ɓǝ swaa tǝkine gaɓ pǝ zah'nan Masǝŋ daŋ, so ne suŋ laŋ zahzyil ɓǝǝ ka 'yak ya. Mai laŋ ɓǝ bai mor o.#Joɓ 5:7; 14:1
24Laa pǝ'nyah dǝfuu masãh ah ma kal ren fanne, zwan fanne, tǝkine laa pǝ'nyah pǝzyil yeɓ ɓǝǝ kǝka. Me ẽe ɓǝ ah ɓo ɓe, Masǝŋ ye tǝ nyi laa pǝ'nyah mai nyi ra.#Pa 3:13; 5:17; 9:7; Lu 12:19; 1 Kor 15:32 25Mor dǝɓ ka gak ka ren fan ka mo laa pǝ'nyah ne ya, sai ka Masǝŋ ye nyi fahlii ah ɓo nyi. 26Mor Masǝŋ a nyi yella, fatanne, tǝkine laa pǝ'nyah nyi dǝɓ mai ɓǝ ah mo 'nyah suu ah ɓo. Amma a joŋ dǝɓ faɓe' tai joŋ nyi dǝɓ mai mo 'nyah suu ah ɓo. Ɓǝ mai laŋ ɓǝ kol ye tǝgbana ɓǝ nĩi zyak ka gbanne.#Joɓ 32:8; ƁǝT 2:6
Bible Moundang © Alliance Biblique du Tchad, 1996.